ꓟꓲ ꓠꓯ ꓖꓴ ꓙꓴꓽ ꓕꓯꓽ ꓢꓲ ꓞꓳ ꓤ ꓠꓬ ꓪꓺ ꓙꓲꓻ ꓒꓵꓽˍ ꓡꓳ=

ꓟꓲ ꓠꓯ ꓖꓴ ꓙꓴꓽ ꓕꓯꓽ ꓢꓲ ꓞꓳ ꓤ ꓠꓬ ꓪꓺ ꓙꓲꓻ ꓒꓵꓽˍ ꓡꓳ=

9 ꓦ ꓟ 22 ꓠꓬꓲ꓾ 2019

ꓕꓲꓽ ꓠ ꓡꓰ ꓕꓲꓽ ꓠ ꓠ-ꓦꓬ-ꓠꓬꓲ ꓞꓳ ꓜꓴ ꓜꓲꓼ ꓡꓳꓽˍ ꓟ ꓐꓰ Angelus ꓪꓽ ꓘꓴˍ ꓟ ꓗꓪ ꓠ-ꓦꓬ-ꓠꓬꓲ ꓢꓲꓽ ꓫꓬ ꓟꓸ ꓟꓲ ꓔꓯ ꓟꓳꓸꓼ ꓟꓲ ꓠꓯ ꓖꓴꓽ ꓙꓴꓽ ꓔꓯ ꓣꓱꓽ ꓢꓲ ꓪꓺ ꓙꓲꓻ ꓙꓲꓻˍ ꓟ ꓠꓲꓹ ꓧꓳꓹ ꓫꓵꓽ ꓧꓳꓹ ꓟ ꓔꓯ ꓫꓬꓹ ꓠ ꓟ ꓢꓲꓺ ꓒꓽ ꓬꓰ-ꓢꓴ ꓡꓰ ꓟꓸ ꓖꓶꓽ ꓔꓬꓹ ꓟ ꓔꓯ ꓐꓯ ꓟꓸ ꓖꓶꓽ ꓗꓷ ꓟ ꓥꓳ=

ꓔꓱꓹ ꓚꓵˍ ꓟ ꓟꓽ ꓙꓳ ꓟ ꓟꓲ ꓠꓯ ꓖꓴꓽ ꓙꓴꓽ ꓔꓯ ꓩ ꓔ ꓠ ꓗˍ ꓡꓳ=ꓖꓳ ꓟ ꓠꓬ ꓞꓳ ꓤ ꓐꓴ ꓔꓯ ꓗꓶꓹ ꓶꓽ ꓡꓰ ꓝꓲˍ ꓟꓲ ꓟꓽ ꓧꓳꓹ ꓡꓯꓽ ꓘꓳ ꓟ ꓔꓯ ꓫꓬꓹ ꓔꓱ ꓝꓲˍ ꓡꓳ꓾ ꓒꓬꓱꓼ ꓡ ꓝꓲˍ ꓡꓳ꓾ ꓢꓲꓺ ꓒꓽ ꓬꓰ-ꓢꓴ ꓐꓯ ꓠꓲꓹ ꓫꓵˍ ꓟ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓖꓴꓽ ꓙꓴꓽ ꓗꓪ ꓐꓰ ꓞꓳ ꓤ ꓐꓴ ꓗꓳꓺ ꓡꓳꓺ ꓗꓪ ꓙꓲˍ ꓟ ꓠꓲꓹ ꓧꓳꓹ ꓫꓵꓽ ꓧꓳꓹ ꓟ ꓔꓯ ꓡꓰꓽ ꓬꓰ ꓖꓶꓽˍ ꓡꓳ꓾ ꓗꓶꓹ ꓶꓽ ꓡꓰ ꓝꓲˍ ꓟ꓾ ꓠꓬꓲꓸ ꓤꓲꓹ ꓟ ꓔꓯ ꓠꓽ ꓢꓯꓼ ꓟꓽ ꓖꓶꓽ= ꓟꓲ ꓠꓯ ꓖꓴꓽ ꓙꓴꓽ ꓔꓯ ꓣꓱꓽ ꓢꓲ ꓙꓲˍ ꓟ ꓔꓯ ꓧꓪꓺ ꓢꓲ ꓾ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬꓻ ꓟꓶ ꓠꓹ ꓟ ꓬꓲꓸ ꓚꓱꓹ ꓡꓰꓽ ꓬꓰ ꓠ ꓗꓹ ꓟ ꓔꓯ ꓟꓸ ꓖꓶꓽˍ ꓟ ꓥꓳ=ꓖꓳ ꓟ ꓪꓴꓸ ꓠꓬꓲ ꓟꓲ ꓠꓯ ꓖꓴꓽ ꓙꓴꓽ ꓖꓳ ꓟ ꓔꓯ ꓕꓲꓽ ꓠꓲꓹ ꓕꓲꓽ ꓪꓺꓽ ꓟ꓾ ꓢꓲꓺ ꓡꓲꓺ ꓟ꓾ ꓔꓱꓹ ꓚꓵˍ ꓟ ꓐꓰ ꓠꓬꓲꓽ ꓢ ꓫꓵꓸ ꓠꓲꓹ ꓟ ꓪꓴꓽ ꓟꓴ ꓡ ꓝꓲˍ ꓟ ꓚꓱꓹ ꓡꓰ ꓐꓰ ꓣꓱꓽ ꓠ ꓗˍ ꓡꓳ=

ꓪꓴ-ꓢ ꓠꓬ ꓣꓳꓽ ꓡꓯꓽ ꓒꓯꓹ ꓗꓪ ꓡꓯꓼ ꓙꓱꓻ ꓔ ꓟ ꓔꓯ ꓞꓳ ꓫꓸ ꓐꓴ ꓔꓯ ꓐꓬꓱꓻ ꓖꓶꓽ ꓠꓹ ꓟ ꓖꓶꓽ ꓔ ꓟ ꓔꓯ ꓕꓽ ꓟꓲ ꓡꓲ ꓝꓲ=ꓚꓲꓸ ꓛꓬꓼ ꓫꓸ ꓙꓵˍ ꓟ ꓗꓪ ꓐꓰ ꓡꓲꓹ ꓙꓰ ꓗꓴˍ ꓟ ꓝꓲꓸ ꓫ ꓢꓴ꓾ ꓒꓴ ꓫ ꓢꓴ ꓡꓰ ꓐꓰ ꓚꓲꓸ ꓛꓬꓼ ꓫꓸ ꓙꓵˍ ꓟ ꓔꓯ ꓒꓳꓹ ꓗꓷ ꓠꓯˍ ꓡꓳ=ꓕꓱ ꓗꓪ ꓐꓯ ꓠꓲꓹ ꓫꓵˍ ꓟ ꓠꓬ꓾ ꓛꓳꓸ ꓔꓬꓹ ꓟ ꓤꓶ ꓗꓪ ꓐꓰ ꓔꓱꓹ ꓚꓵˍ ꓟ ꓤꓶ ꓗꓪ ꓡ ꓠꓹ ꓟ ꓥ ꓡꓳ=ꓚꓲꓸ ꓛꓬꓼ ꓗꓪ ꓐꓰ ꓠꓱꓸ ꓐꓯꓼ ꓢꓴ ꓟꓬꓻ ꓐꓲ ꓓꓳ ꓡꓰˍ ꓠꓬ ꓬꓲꓸ ꓔꓯ ꓗꓹ ꓛꓲꓽ ꓠ ꓛꓲ ꓬꓰ ꓖꓶꓽ=ꓣꓳꓽ ꓔꓯ ꓣꓱꓽ ꓡꓳꓼˍ ꓟ ꓕꓯꓽ ꓢꓲ ꓐꓲꓺ ꓡꓶꓽ ꓓꓹ ꓠꓬ ꓣꓱꓽ ꓞ ꓢꓴ ꓔꓯ ꓐꓬꓱꓻ ꓖꓶꓽ=ꓖꓳ ꓡꓱ ꓬꓰˍ ꓟ ꓗꓪ ꓐꓰ ꓪꓴ-ꓢ ꓬꓲꓸ ꓠꓲꓹ ꓠꓵˍ ꓟ ꓔꓯ ꓘꓳꓹ ꓣꓴ꓾ ꓐꓰ ꓔꓲꓺ ꓒꓽ ꓪ ꓔꓲ Francis ꓡꓰ ꓐꓯ ꓖꓶꓽ ꓗꓷ ꓟ ꓥꓳ=

Credit to Vatican News

https://bit.ly/2mqsub2