ꓣꓦꓮ ꓡꓲ-ꓢꓴ ꓓꓳꓽ

1Karen ꓗꓴꓷꓼ ꓗꓪ ꓟ ꓟꓯꓼ ꓘꓰꓹ ꓑꓬ ꓔꓶꓸ-ꓸ ꓔꓬꓹ ꓖꓴꓸ ꓦꓲꓸꓹ ꓫꓬ ꓠꓹ ꓟ ꓐꓱ ꓶ ꓣꓱꓽ ꓬꓯꓼ ꓔꓬ ꓟ ꓓꓳꓽ

ꓟꓶ ꓦ ꓦ ꓡ ꓟ ꓪꓴꓸ ꓠꓬꓲ ꓟꓯꓼ ꓘꓰꓹ ꓑꓬ ꓔꓶꓸ ꓐꓬ ꓡꓰ ꓟ Karen ꓗꓴꓷꓼ Myawaddy ꓡꓳ ꓒꓱ ꓖꓴ ꓟꓶꓸ ꓕꓲ ꓛꓱꓽ ꓗꓪ ꓙꓳˍ ꓟ ꓔꓮꓳ-ꓬꓲꓸ ꓬꓲꓻ ꓟ ꓒ ꓕꓲꓸꓸ ꓗꓪ ꓟ ꓟꓯꓼ ꓘꓰꓹ ꓑꓬ ꓢꓴ ꓐꓱ ꓶ ꓔꓬ ꓖꓴ ꓦꓲꓸꓹ ꓫꓬ ꓠꓹ ꓟ ꓣꓱꓽ ꓬꓯꓼ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓧꓶꓸ ꓕꓯ ꓟ ꓦꓬꓼ ꓠꓬꓲ ꓗꓪ ꓟꓳꓸ ꓗ ꓗꓪ ꓐꓰ ꓫꓬꓹ ꓔ ꓥ ꓟꓲ ꓟꓶ ꓦ ꓦ꓾ ꓟꓲꓽ ꓦꓲꓸꓹ ꓓ ꓟ ꓙꓱꓼ ꓡ ꓟ ꓪꓴꓸ ꓠꓬꓲ ꓦꓲꓸꓹ ꓮ ꓙꓵꓽ ꓐꓬ ꓡꓰ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓔꓬ ꓖꓴ ꓦꓲꓸꓹ ꓫꓬꓹ ꓠꓹ ꓟ ꓐꓱ ꓶ ꓟꓳꓸ ꓗ ꓐꓰ ꓦꓲꓸꓹ ꓑꓲꓸ ꓓꓴ ꓢꓲꓸ ꓛꓬꓽ ꓣꓱꓽ ꓬꓯꓼ ꓔꓬ ꓡꓳ꓾ ꓐꓰ The 74 Media ꓓꓳꓽ ꓗꓪ ꓐꓯ ꓔ ꓡꓳ=

ꓞꓳ ꓣꓳ 700 ꓣꓳ ꓟꓽ ꓞꓲꓺ ꓐꓱ ꓶ ꓞꓳ ꓦꓲꓸꓹ 300 ꓦꓲꓸꓹ ꓫꓬꓹ ꓠꓹ ꓟ ꓥ ꓢꓲ-ꓸ ꓤ ꓟꓶ ꓤ ꓐꓰ (ꓟꓶ ꓛꓵꓼ ꓟ) ꓞꓲꓼ ꓟꓳꓽ ꓡꓰ ꓢꓴ ꓐꓴ ꓐꓱ ꓶ ꓡꓰꓽ ꓫꓬꓹ ꓔꓬ ꓡꓳ꓾ ꓐꓰ ꓟꓯꓼ ꓘꓰꓹ ꓑꓬ ꓢꓴ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ=

ꓕꓱ ꓟꓯꓼ ꓘꓰꓹ ꓑꓬ ꓔꓶꓸ ꓠꓬ 2021 ꓘꓳꓼ12 ꓦ ꓖ ꓡꓯ ꓖ ꓙꓲ ꓕꓯ ꓞꓳ ꓘꓹ ꓛꓳꓼ ꓘꓹ ꓗꓪ ꓐꓰ ꓟꓯꓼ ꓘꓰꓹ ꓑꓬ ꓡ ꓢꓴ ꓐꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ=

2 ꓟꓬ-ꓟ ꓟꓯꓼ ꓠꓬ ꓞꓳ ꓤ ꓛꓴ ꓞꓰꓹ ꓡꓰ ꓠ ꓢꓰꓼ ꓢꓴ ꓥ ꓡꓳ꓾ ꓐꓰ ꓐꓶ- ꓡꓲ- ꓗꓲ ꓡꓰ ꓐꓯ ꓟ ꓓꓳꓽ

ꓟꓬ-ꓟ ꓟꓯꓼ ꓡꓰ ꓣꓳ-ꓦꓲ-ꓙ ꓐꓴ ꓔꓯ ꓟꓶ ꓤ ꓫꓸ ꓟꓴ ꓫꓸ ꓚꓬ ꓬꓰ ꓡ ꓟ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓢꓯꓸ ꓔꓬ ꓙꓳ ꓔꓬ ꓟ ꓔꓯ ꓗꓸ ꓧꓪˍ ꓟ-ꓸ ꓢꓰꓼ ꓩꓴ ꓡ ꓟ ꓥ ꓡꓳ ꓐꓰ ꓴꓢ ꓐꓶꓽ ꓗꓴꓷꓼ ꓔꓯ ꓟꓳꓸ ꓢꓲꓽ ꓒꓽ Antony ꓐꓶ-ꓡꓲ-ꓗꓲ ꓡꓰ 2022 ꓘꓳꓼ 3 ꓦ ꓟ 21 ꓠꓬꓲ ꓕꓯꓽ Holocaust ꓚꓲꓸ ꓟꓶ ꓓꓴ ꓦꓲ ꓗꓪ ꓢꓷꓸ ꓙ ꓟꓴ ꓙ ꓡꓳ= ꓠ-ꓜꓰ ꓙ-ꓟꓶ-ꓠꓰ ꓐꓴ ꓡꓰ ꓬꓲ-ꓢꓷ-ꓡꓰ 6 ꓫꓬꓹ ꓟꓽ ꓞꓲꓺ ꓢꓰꓼ ꓗꓷ ꓟ ꓚꓲꓸ ꓟꓶ ꓓꓴ Burmas Path to Genocide ꓬꓲꓸ ꓐꓬꓱꓽ ꓟꓳꓸ ꓖꓶˍ ꓟ ꓔꓯ  ꓡꓳꓸ ꓠꓬꓲ ꓢꓲ꓾ ꓕꓱ ꓡꓱ ꓢꓷꓸ ꓙ ꓟꓴ ꓙ ꓩꓴ ꓡ ꓟ ꓥ ꓡꓳ꓾ ꓐꓰ The lisu Times ꓓꓳꓽ ꓗꓪ ꓐꓯ ꓔ ꓡꓳ=

3   ꓚꓬꓴꓠꓹ-ꓢꓴ ꓡꓳ ꓒꓱ ꓗꓪ ꓟꓶ ꓦꓲꓸꓹ ꓙꓱꓼ ꓡ ꓟ ꓪꓴꓸ ꓠꓬꓲ ꓞꓳ ꓦꓲꓸꓹ ꓐꓰ ꓓꓽ ꓖꓴ ꓐꓬ ꓡꓰ ꓟ ꓓꓳꓽ

Tanintharyi, Myeik ꓚꓬꓴꓠꓹ-ꓢꓴ ꓡꓳ ꓒꓱ ꓪꓯꓸ-ꓚꓬꓴꓠ ꓘꓹ ꓗꓪ 3ꓦ ꓟ 21 ꓠꓬꓲ ꓟꓶꓼ ꓘꓶꓼ ꓙꓵꓹ ꓕꓯ ꓟꓲꓽ ꓦꓲ ꓙꓱꓼ ꓬꓲꓻ ꓙꓬ ꓟꓶꓸ ꓡˍ ꓟ ꓪꓴꓸ ꓠꓬꓲ ꓞꓳ ꓦꓲꓸꓹ ꓥꓪꓽ ꓦꓲꓸꓹ꓾ ꓓꓽ ꓖꓴ ꓕꓲ ꓟ ꓐꓬ ꓡꓰꓳ꓾ ꓐꓰ ꓞꓳ ꓘꓹ ꓗꓪ ꓔꓬ ꓟ ꓞꓳ ꓪꓴ ꓕꓲ ꓣꓳ ꓡꓰ ꓐꓯ ꓡꓳ= ꓕꓱ ꓡꓱ ꓐꓬ ꓡꓰ ꓟ ꓮ ꓙꓵꓽ ꓠꓬ 820ꓹ000 ꓒꓵꓽ ꓥ ꓢꓲ-ꓸ ꓞꓳ ꓣꓳ ꓐꓰ ꓢꓯꓸ ꓫꓵꓽ ꓢꓯꓸ ꓙꓰꓽ ꓐꓴ ꓠꓬ ꓠꓻ ꓓꓴ ꓡꓰ ꓟ ꓟꓽ ꓙꓳ꓾ ꓐꓰ Mizzima ꓓꓳꓽ ꓗꓪ ꓐꓯ ꓔ ꓡꓳ=

4. ꓑꓴ-ꓔ-ꓳ ꓡꓳ ꓒꓱ ꓗꓪ ꓐꓰ ꓟꓯꓼ ꓘꓰꓹ ꓢꓴ ꓑ ꓫꓬꓼ ꓐꓴ ꓬꓲ ꓪ ꓔꓬ ꓖꓴ ꓦꓲꓸꓹ ꓗꓪ ꓬꓲꓼ ꓙꓰ ꓪ ꓡꓰ ꓟ ꓓꓳꓽ

ꓟꓯꓼ ꓓꓶ: ꓡꓯ ꓘꓳˍ ꓟ ꓑꓶ. ꓓꓴ ꓢꓶꓹ ꓠꓯꓺ ꓢꓶꓹ ꓐ: ꓗꓪ ꓘꓰꓹ ꓑꓬꓺ ꓔꓬꓹ ꓢꓴ ꓥ ꓟ ꓢꓴ-ꓑꓲ-ꓬ ꓘ ꓐꓰ ꓲꓠ-ꓢꓲ-ꓬ ꓘ ꓗꓪ ꓔꓬꓹ ꓢꓴ ꓐꓴ ꓠꓬ꓾ ꓔꓲꓺ ꓒ ꓐꓴ ꓐꓰ ꓟ. ꓒ ꓟ. ꓟ ꓐꓴ ꓟꓯꓼ ꓠꓬꓲ: ꓗꓴ. ꓝꓲ.ˍ ꓗꓪ ꓙꓲ: ꓟꓳ ꓬꓰ ꓖꓶ: ꓟ ꓗꓪ ꓐꓰ ꓚꓲ. ꓛꓬ ꓦꓲꓻ ꓗꓪ ꓮ ꓟꓶ 3 ꓦ ꓟ 22 ꓠꓬꓲ ꓗꓪ ꓚꓱꓹ ꓬꓲꓼ ꓙꓰ ꓠꓹ ꓟ ꓖꓪ ꓙꓱ ꓜꓲꓼ ꓗꓷꓳ=