ꓣꓦꓮ ꓡꓲ-ꓢꓴ ꓓꓳꓽ

1.ꓗ‐ꓛꓲ ꓗꓴꓷꓼ ꓫꓴꓻ ꓠ‐ꓟ‐ꓔꓲ. ꓡꓳ ꓒꓱ ꓗꓪ ꓞꓳ ꓫꓵꓽ ꓮ ꓙꓵꓽ ꓐꓰ ꓘꓴ ꓜꓲꓼ ꓞꓳ ꓮ ꓙꓵꓽ ꓗꓪ ꓟ ꓞꓳ ꓡꓱ ꓐꓴ ꓜꓲꓼ ꓡꓯ ꓘꓳ, ꓓꓴ ꓬꓰˍ ꓟ ꓓꓳꓽ

2. Franciscans’s ꓔꓲꓺ ꓟ ꓔꓬ ꓦꓲꓻ ꓬꓲ, ꓫꓵꓼ ꓔꓯ ꓡꓳ‐ꓟꓲ ꓟꓵꓽ ꓐꓰ ꓧꓶꓽ ꓟꓵꓽ ꓫ. ꓗ ꓗꓪ ꓫꓬ, ꓓꓳꓻ ꓡꓰ ꓟ ꓓꓳꓽ

3.Ukraine ꓗꓴꓷꓼ ꓗꓪ ꓫꓵꓽ ꓟꓬ ꓐꓲꓻ ꓓꓳꓻ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ Francis ꓐꓯ ꓟ ꓓꓳꓽ

1.ꓗ‐ꓛꓲ ꓗꓴꓷꓼ ꓫꓴꓻ ꓠ‐ꓟ‐ꓔꓲ. ꓡꓳ ꓒꓱ ꓗꓪ ꓞꓳ ꓫꓵꓽ ꓮ ꓙꓵꓽ ꓐꓰ ꓘꓴ ꓜꓲꓼ ꓞꓳ ꓮ ꓙꓵꓽ ꓗꓪ ꓟ ꓞꓳ ꓡꓱ ꓐꓴ ꓜꓲꓼ ꓡꓯ ꓘꓳ, ꓓꓴ ꓬꓰˍ ꓟ ꓓꓳꓽ

3 ꓦ ꓟ 30 ꓠꓬꓲ 2022 ꓘꓳꓼ ꓠꓽ ꓢꓽ ꓠꓬꓲ ꓕꓯ ꓗ‐ꓛꓲ ꓗꓴꓷꓼ ꓫꓴꓻ ꓠ‐ꓟ‐ꓔꓲ. ꓡꓳ ꓒꓱ ꓠꓬꓰ‐ꓓꓮꓴ ꓣ ꓚ Camp ꓗꓪ ꓗꓟꓢꓢ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓞꓳ ꓫꓵꓽ ꓮ ꓙꓵꓽ ꓘꓴ ꓜꓲꓼ ꓞꓳ ꓮ ꓙꓵꓽ ꓗꓪ ꓟ ꓞꓳ ꓡꓱ ꓞꓳ ꓡꓯ. ꓐꓴ ꓜꓲꓼ ꓡꓯ ꓘꓳ ꓓꓴ ꓙꓵ, ꓔꓯ ꓧꓪ. ꓧꓪꓸꓼ ꓐꓰ ꓬꓰ ꓓꓳꓻ ꓡꓰꓳ꓾ ꓐꓰ ꓢꓷ. ꓪ ꓡꓳ꓿

ꓕꓱ ꓜꓲꓼ ꓡꓯ ꓘꓳ ꓓꓴ ꓙꓵ, ꓗꓪ ꓟꓯꓼ ꓘꓰ, ꓟꓯꓼ ꓑꓬ ꓔꓬ ꓢꓴ ꓞꓳ ꓡꓯ. ꓐꓴ ꓐꓰ ꓗ‐ꓕꓳ‐ꓡꓲꓗ꓾ ꓗꓐꓚ꓾ ꓮ ꓖ ꓾ ꓮꓽ ꓢ,(ꓐꓶ‐ꓬꓲ)꓾ ꓞꓳ ꓡꓯ. ꓐꓴ (150) ꓣꓳ ꓜꓲꓼ ꓡ ꓟ ꓥ ꓡꓳ꓿ ꓞꓳ ꓡꓯ. ꓐꓴ ꓜꓲꓼ ꓡꓯ ꓘꓳ ꓓꓴ ꓬꓲ ꓔꓶꓺ ꓙꓱꓼ ꓠꓬ ꓡ ꓠ, ꓟ ꓙꓵ, ꓗꓪ ꓘꓴ ꓜꓲꓼ ꓞꓳ ꓕꓲ ꓟ ꓡꓰ ꓕꓲ ꓟ ꓐꓰ ꓞꓳ ꓫꓵꓽ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓪꓽ ꓡꓯ ꓘꓳ ꓠ, ꓟ ꓐꓱ ꓶ ꓥ ꓡꓳ꓿

ꓜꓲꓼ ꓡꓯ ꓘꓳ ꓓꓴ ꓙꓵ, ꓗꓪ ꓟ. ꓒ ꓟ. ꓟ ꓐꓴ ꓡꓰ ꓞꓳ ꓡꓯ. ꓐꓴ ꓐꓱ ꓶ ꓙꓲꓻ ꓖꓴ ꓮ ꓟꓬ, ꓙꓳˍ ꓟ ꓢꓷ. ꓠꓲ, ꓚꓱ, ꓐꓰ ꓮꓚꓔꓲꓳꓠ ꓢꓳꓠꓖ ꓟꓴꓽ ꓖꓪ ꓮ ꓟꓬ, ꓟ. ꓖꓶ ꓗꓷꓳ꓾ ꓐꓰ ꓗꓟꓢꓢ ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿2. Franciscans’s ꓔꓲꓺ ꓟ ꓔꓬ ꓦꓲꓻ ꓬꓲ, ꓫꓵꓼ ꓔꓯ ꓡꓳ‐ꓟꓲ ꓟꓵꓽ ꓐꓰ ꓧꓶꓽ ꓟꓵꓽ ꓫ. ꓗ ꓗꓪ ꓫꓬ, ꓓꓳꓻ ꓡꓰ ꓟ ꓓꓳꓽ

3 ꓦ ꓟ 25 ꓠꓬꓲ 2022 ꓘꓳꓼ ꓕꓯ ꓗ‐ꓕꓳ‐ꓡꓲ ꓘꓴ ꓜꓲꓼ ꓞꓳ ꓐ‐ꓟꓮꓪ ꓢ‐ꓢꓶ‐ꓠ  ꓡꓳꓲ ꓙꓰ ꓡꓳ ꓒꓱ Htang Nya ꓘ, ꓗꓪ Franciscans ꓔꓲꓺ ꓟ ꓜꓴꓻ ꓔꓬ ꓠ, ꓟ ꓦꓲꓻ ꓫꓬ, ꓓꓳ ꓡꓰꓳ꓿ ꓐ‐ꓟꓮꓪ ꓔꓲꓺ ꓒ ꓓꓽ Ram Mu Sum Lu Gum ꓡꓰ ꓪꓴ‐ꓢ ꓟꓬꓱꓽ ꓬꓰ ꓠ, ꓟ Franciscan ꓔꓲꓺ ꓟ ꓜꓴꓻ ꓔꓯ ꓘꓴˍ ꓟ ꓑꓶ. ꓓꓴ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓡ, ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿

ꓔꓲꓺ ꓟ ꓐꓴ ꓠꓬ ꓔꓲꓺ ꓒ ꓐꓴ ꓟꓽ ꓔꓬ ꓟ ꓞꓳ ꓘ, ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓐꓰ ꓟꓲ ꓠꓯ ꓢꓷ. ꓠꓲ, ꓕꓳꓽ ꓶ ꓚꓱ, ꓗꓪ ꓬꓰ ꓙ ꓠ, ꓟ ꓥ ꓡꓳ꓿ ꓧꓔꓮꓠꓖ ꓠꓬꓮ ꓘ, ꓠꓬ ꓡꓳꓲ‐ꓙꓰ ꓡꓳ ꓒꓱ ꓗꓪ ꓐꓰ ꓟꓲ ꓕꓲꓽ ꓕꓷ, ꓶꓽˍ ꓟ ꓞꓳ ꓘ, ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿3.Ukraine ꓗꓴꓷꓼ ꓗꓪ ꓫꓵꓽ ꓟꓬ ꓐꓲꓻ ꓓꓳꓻ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ Francis ꓐꓯ ꓟ ꓓꓳꓽ

3 ꓦ 24 ꓠꓬꓲ 2022 ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓠꓬ Ukraine ꓗꓴꓷꓼ ꓗꓪ ꓫꓵꓽ ꓟꓬ ꓐꓲꓻ ꓓꓳꓻ ꓔꓬ ꓡꓳ ꓐꓰ ꓐꓯ ꓖꓶ ꓗꓷꓳ꓿  ꓣ‐ꓫ.꓾ ꓗꓴꓷꓼ  ꓠꓬ  ꓴꓗꓮꓣꓲꓠꓰ ꓗꓴꓷꓼ ꓔꓯ ꓢꓰꓼˍ ꓟ ꓑꓶ. ꓓꓴ ꓑ ꓫꓬ ꓮ ꓟꓬ, ꓫꓵꓻ ꓡꓰꓳ꓿ ꓤ ꓠꓱ ꓤ ꓐꓴ ꓐꓰ ꓞꓲꓼ ꓪꓴꓽˍ ꓟ ꓞꓳꓻ ꓟꓳꓽ ꓐꓴ ꓠꓬ ꓟꓯꓼ ꓘꓰ, ꓔꓬ ꓟ ꓑꓶ. ꓓꓴ ꓜꓽ ꓓꓴ ꓓꓳꓻ ꓓꓴ ꓣꓱꓽ ꓬꓯꓼ ꓔꓬ ꓡꓳ꓿ ꓴꓗꓣꓮꓲꓠꓰ ꓗꓴꓷꓼ ꓗꓪ ꓫ. ꓓꓴ ꓟꓶ  ꓓꓴ ꓔꓳ, ꓜꓳꓽ ꓔꓬ ꓟ ꓑ ꓫꓬ, ꓐꓴ ꓐꓱ ꓶ ꓬꓰ ꓶ ꓔꓳ, ꓙ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓓꓰꓽ ꓩꓴ ꓡˍ ꓟ ꓥ ꓡꓳ꓿

ꓔꓲꓺ ꓒ ꓪ ꓔꓲ ꓠꓬ ꓟꓯꓼ ꓘꓰ, ꓟꓯꓼ ꓐꓬ ꓔꓬ ꓢꓴ ꓐꓴ ꓔꓯ ꓠꓲ, ꓒꓴ ꓒꓴ ꓐꓰ ꓘꓳ, ꓣꓴ ꓖꓶ ꓗꓷ ꓟ ꓗꓴꓷꓼ  ꓐꓴ ꓬꓰ ꓙ ꓔꓳ, ꓙ ꓖꓶ ꓢꓴ ꓮ ꓟꓬ, ꓔꓯ ꓫ. ꓟꓳ ꓘꓶꓽ ꓕꓱ ꓖꓶ ꓗꓷꓳ꓿ ꓑꓶ. ꓑꓶ.ˍ ꓐꓰ ꓴꓗꓣꓮꓲꓠꓰ ꓗꓴꓷꓼ ꓓꓳꓽ ꓔꓯ ꓟꓵꓽ ꓗꓳ, ꓓꓵ ꓓꓵ ꓔꓯ ꓐꓯ ꓟ. ꓖꓶ ꓢꓴ ꓔꓯ ꓥ ꓟꓲ ꓫ. ꓟꓳ ꓘꓶꓽ ꓫ. ꓕꓱ ꓖꓶ ꓗꓷꓳ꓿

ꓝꓮꓲ ꓔꓲꓺ ꓒ ꓪ ꓔꓲ ꓠꓬ ꓣ‐ꓫ. ꓐꓰ ꓴ‐ꓗ‐ꓣꓲ ꓢꓲ ꓡꓲ ꓟꓶ ꓠ, ꓟ ꓐꓱ ꓶ ꓔꓲꓺ ꓒ ꓓꓽ (2) ꓣꓳ ꓔꓯ ꓴ‐ꓗ‐ꓣꓲ ꓗꓴꓷꓼ ꓗꓪ ꓝꓲ ꓩꓴ ꓗꓷ ꓢꓲ ꓠꓬꓲ ꓣꓱꓽ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓟꓬꓱꓽ ꓬꓰ ꓖꓶ ꓝꓲꓳ꓿ ꓔꓲꓺ ꓒ ꓪ ꓔꓲ ꓠꓬ ꓴ‐ꓗ‐ꓣꓲ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓗꓷꓳ꓿