ꓪꓴ-ꓢ ꓐꓱ ꓶ꓾ ꓘꓴ-ꓜꓲꓼ-ꓞꓳ ꓐꓱ ꓶ ꓢꓯꓼ ꓟꓬꓻ ꓖꓶꓽ ꓗꓷ ꓢꓴ ꓪꓴꓸ ꓠꓬꓲ ꓪꓴ-ꓢ ꓬꓲꓸ ꓤꓽ ꓠꓱ ꓐꓴ ꓣꓱꓽ ꓛꓰꓽ ꓟꓶˍ ꓡꓳ=

ꓪꓴ-ꓢ ꓐꓱ ꓶ꓾ ꓘꓴ-ꓜꓲꓼ-ꓞꓳ ꓐꓱ ꓶ ꓢꓯꓼ ꓟꓬꓻ ꓖꓶꓽ ꓗꓷ ꓢꓴ ꓪꓴꓸ ꓠꓬꓲ ꓪꓴ-ꓢ ꓬꓲꓸ ꓤꓽ ꓠꓱ ꓐꓴ ꓣꓱꓽ ꓛꓰꓽ ꓟꓶˍ ꓡꓳ=

9 ꓦ ꓟ 25ꓠꓬꓲ꓾ 2019

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓠ-ꓢ-ꓠꓬꓲ ꓞꓳ ꓜꓴꓻ ꓜꓲꓼ ꓡꓳꓽˍ ꓟ ꓐꓰ ꓘꓴ-ꓜꓲ-ꓞꓳ ꓚꓱꓹ ꓟꓸ ꓖꓶꓽˍ ꓟ ꓗꓪ ꓡꓴ-ꓘ ꓕꓳꓽ ꓶꓽ ꓔꓯ ꓟꓳꓸꓼ ꓘꓴ-ꓜꓲ-ꓞꓳ ꓗꓪ ꓫꓵꓽ ꓪꓴꓽ ꓙꓳˍ ꓟ ꓐꓰ ꓾ ꓮꓽ ꓠꓱꓻ ꓘꓴ-ꓜꓲ-ꓞꓳ ꓢꓲꓺ ꓤ ꓐꓴ ꓦꓬꓼ ꓠꓬꓲ ꓕꓯ ꓡꓰ ꓙꓳˍ ꓟ ꓔꓯ ꓟꓸ ꓖꓶꓽ ꓗꓷꓳ=

ꓮꓽ ꓠꓱꓻ ꓢꓲꓺ ꓤ ꓐꓴ ꓜꓴꓻ ꓠꓬ ꓟꓽ ꓪꓽ ꓡꓯꓽ ꓘꓳ ꓟ ꓡꓲꓽ ꓒꓰ꓾ ꓦ ꓡꓱꓻ ꓪꓴꓸ ꓓꓵꓺ ꓕꓱˍ ꓟ ꓗꓪ ꓐꓰ ꓙꓲꓻ ꓢꓴ ꓢꓲꓺ ꓤ ꓒꓬꓱꓼ ꓡ ꓗꓷ ꓟ ꓥꓳ= ꓖꓳ ꓡꓱ ꓟꓽ ꓪꓽ ꓡꓯꓽ ꓘꓳ ꓟ ꓪꓴꓸ ꓠꓬꓲ ꓘꓴ-ꓜꓲ-ꓞꓳ ꓘꓴꓽ ꓠꓯꓸꓼ ꓗꓪ ꓟꓽ ꓠꓲꓹ ꓧꓳꓹ ꓟ ꓙꓳˍ ꓡ ꓟ ꓡꓰ ꓐꓰ꓾ ꓪꓴ-ꓢ ꓬꓲꓸ ꓣꓱꓽ ꓛꓰ ꓗꓪ ꓐꓰ ꓖꓪ ꓙꓱꓻ ꓡꓯꓽ ꓘꓳˍ ꓟ ꓚꓱꓹ ꓔꓯ ꓣꓱꓽ ꓢꓲ ꓕꓲꓽ ꓠꓲꓹ ꓕꓲꓽ ꓪꓽ ꓗꓷ ꓡꓰ ꓠ ꓬꓰ ꓗꓷ  ꓟ ꓥ ꓡꓳ=

ꓮꓽ ꓠꓱꓻ ꓢꓲꓺ ꓤ ꓥ ꓟ ꓖ-ꓣꓲ ꓞꓳ ꓫꓵꓽ ꓐꓴ ꓠꓬ ꓞꓳ ꓜꓴꓻ ꓘꓴꓽ ꓠꓯꓸꓼ ꓗꓪ ꓟꓶꓽ-ꓛꓵꓽ-ꓟ ꓐꓴ ꓠꓬ ꓡꓳꓺ ꓗꓷˍ ꓟ ꓟꓶˍ ꓡꓳ ꓐꓯ ꓢꓲ꓾ ꓘꓴ-ꓜꓲ-ꓞꓳ ꓗꓪ ꓙꓵꓽ ꓪꓽ ꓙꓳ ꓢꓴ ꓐꓴ ꓔꓯ ꓐꓯ ꓖꓶꓽ ꓡ ꓔꓬꓹ ꓡꓳ=

ꓕꓱꓻ ꓗꓪ ꓘꓴ-ꓜꓲ-ꓞꓳ ꓗꓪ ꓟ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓜꓲꓼ ꓡꓳꓽ ꓢꓲ꓾ ꓐꓯ ꓑꓶꓻˍ ꓟ ꓐꓰ ꓣꓱꓽ ꓙˍ ꓟ ꓟꓬꓱꓽ ꓔꓯ ꓫꓬꓽ ꓫꓬꓽ ꓡꓰ ꓬꓰ ꓠꓹ ꓟ ꓖꓪ ꓙꓱꓻ ꓗꓷꓳ= ꓪꓴꓽ ꓟꓴ ꓡ ꓔꓬꓹ ꓟ ꓘꓴ-ꓜꓲ-ꓞꓳ ꓔꓯ ꓔꓱꓹ ꓚꓵˍ ꓟ ꓗꓪ ꓙꓵꓽ ꓠꓹ ꓟ ꓞꓳ ꓫꓸ ꓐꓴ ꓔꓯ ꓠꓬꓲ ꓡꓳꓸ ꓗꓪꓼ ꓫꓵꓼ ꓠꓹ ꓟ ꓐꓱ ꓶ ꓢ-ꓔꓲ-ꓩ-ꓠꓳ ꓐꓰ ꓟꓬꓱꓻ ꓓꓳꓽ ꓙꓳˍ ꓟ ꓾ ꓫꓱꓸ ꓖꓶꓽ ꓒꓵꓽˍ ꓟ ꓞꓳ ꓤ 7 ꓣꓳ ꓔꓯ ꓢꓲꓺ ꓢꓲ꓾ ꓬꓲꓸ ꓪ ꓐꓴ ꓔꓯ ꓔꓲꓺ ꓒꓽ ꓟꓽ ꓒꓬꓱꓼ ꓡ ꓟ ꓧꓶꓸ ꓕꓯꓽ ꓟ ꓙꓵꓽ ꓪ ꓟꓶ ꓢꓴ (Deacon) ꓐꓰ ꓘꓴ ꓢꓲ ꓾ ꓘꓴ-ꓜꓲ-ꓞꓳ ꓗꓪ ꓟ ꓫꓱꓸ ꓤ ꓠꓲꓹ ꓟꓬꓱꓽ ꓗꓪ ꓙꓵꓽ ꓠꓹ ꓟ ꓟꓬꓱꓽ ꓖꓶꓽ ꓗꓷ ꓢꓲ꓾ ꓘꓴ-ꓜꓲ-ꓞꓳ ꓓꓳꓽ ꓐꓯ ꓑꓶꓻˍ ꓟ ꓔꓯ ꓠꓬ ꓘꓴ-ꓜꓲ-ꓞꓳ ꓪꓴꓸ ꓓꓵꓺ ꓥ ꓟ ꓝꓲ ꓓꓴ ꓐꓴ ꓡꓰ ꓣꓱꓽ ꓬꓰ ꓗꓷ ꓟ ꓕꓯ ꓟꓳ ꓪ ꓓˍ ꓡꓳ=

Deacon ꓐꓴ ꓠꓬ ꓔꓲꓺ ꓒꓽ ꓟꓽ ꓥ ꓾ ꓬꓲꓸ ꓪ ꓐꓴ ꓠꓬ ꓘꓴ-ꓜꓲ-ꓞꓳ ꓗꓪ ꓣꓱꓽ ꓙ ꓢꓴ ꓡꓰꓽ ꓥ ꓡꓳ=Deacon ꓜꓴꓻ ꓜꓴꓻ ꓖꓶꓽ ꓗꓷ ꓟ ꓪꓴꓸ ꓠꓬꓲ ꓘꓴ-ꓜꓲ-ꓞꓳ ꓗꓪ ꓒꓬꓱꓼ ꓔꓬꓹ ꓟ ꓫꓵꓽ ꓪꓴꓽ ꓐꓴ ꓔꓯ ꓫꓬꓹ ꓔꓱꓹ ꓐ ꓡ ꓗꓷ ꓟ ꓡꓰꓽ ꓟꓽ ꓞꓲ꓾ ꓘꓴ-ꓜꓲ-ꓞꓳ ꓗꓪ ꓪꓴ-ꓢ ꓟꓸ ꓟꓲ ꓐꓯ ꓑꓶˍ ꓟ ꓐꓰ ꓣꓱꓽ ꓙˍ ꓟ ꓗꓪ ꓢ ꓡꓰ ꓝꓲˍ ꓟ ꓐꓰ ꓘꓴ-ꓜꓲ-ꓞꓳ ꓔꓯˍ ꓟꓲ ꓪꓺ ꓙꓲꓺ ꓕꓶꓻ ꓡꓰ ꓠ ꓬꓰ ꓖꓶꓽ ꓗꓷꓳ=

Deacon ꓐꓴ ꓬꓰˍ ꓟ ꓣꓱꓽ ꓙˍ ꓟ ꓪꓴꓸ ꓠꓬꓲ ꓟꓬꓱꓻ ꓓꓳꓽ ꓪꓴꓽ ꓡˍ ꓟ ꓡꓰ ꓐꓰ ꓢꓲꓺ ꓒꓽ ꓬꓰ-ꓢꓴ ꓬꓲꓸ ꓞꓳ ꓤ ꓒꓬꓱꓼ ꓡˍ ꓟ ꓾ ꓫꓵꓻ ꓗꓷ ꓟ ꓐꓰ ꓢꓯꓸ ꓬꓲꓼ ꓡ ꓗꓷ ꓟ ꓓꓳꓽ ꓔꓯ Deacon ꓢ-ꓔꓲ-ꓩ-ꓠꓳ ꓠꓬ ꓠꓲꓹ ꓪꓴꓽ ꓪꓴꓽ ꓡꓰ ꓐꓰ ꓐꓯ ꓒꓬꓱꓻ ꓗꓷꓳ= ꓖꓳ ꓡꓱ ꓥˍ ꓟꓲ ꓘꓴ-ꓜꓲ-ꓞꓳ ꓔꓯ ꓛꓴꓽ ꓙꓳ ꓢꓴ ꓐꓴ ꓡꓰ ꓢ-ꓔꓲ-ꓩ-ꓠꓳ ꓔꓯ ꓟꓽ ꓔꓱꓹ ꓟ ꓓꓰꓺ ꓗꓷ ꓢꓲ꓾ ꓭꓸ ꓛꓲ ꓐꓰ ꓡꓳꓺ ꓢꓰꓼ ꓗꓷꓳ= ꓢꓲꓽ ꓫꓬꓹ ꓟ ꓦ ꓣꓱꓽ ꓛꓱ ꓐꓰ ꓐꓲꓻ ꓞꓹ ꓢꓴ꓾ ꓬꓰ-ꓢꓴ ꓗꓸ ꓠꓯꓸ ꓛꓳ ꓢꓴ ꓢ-ꓔꓲ-ꓩ-ꓠꓳ ꓠꓬ ꓟꓽ ꓫꓵꓻ ꓧꓶꓸ ꓕꓯ ꓬꓲꓸ ꓦꓻ ꓔꓯ ꓪꓴ-ꓢ ꓔꓯ ꓡꓯꓼ ꓙꓱꓻ ꓗꓷ ꓢꓲ꓾ ꓬꓲꓸ ꓔꓯ ꓢꓰꓼ ꓢꓴ ꓐꓴ ꓐꓱ ꓶ꓾ ꓢꓲꓺ ꓒꓽ ꓳ ꓾ ꓬꓲꓸ ꓪ ꓬꓰ ꓗꓷ ꓟ ꓝꓴꓲꓸ ꓔꓯ ꓬꓲꓸ ꓪꓽ ꓟꓽ ꓢꓷꓸ ꓟ ꓪꓴꓸ ꓠꓬꓲ ꓬꓲꓸ ꓪ ꓔꓯ ꓖꓼ ꓖꓶꓽ꓾ ꓐꓰˍ ꓟꓲ ꓪꓽ ꓘꓴ ꓖꓶꓽ ꓗꓷꓳ=

ꓢ-ꓔꓲ-ꓩ-ꓠꓳ ꓬꓰ ꓗꓷ ꓟ ꓟꓬꓱꓽ ꓠꓬ꓾ ꓣꓳꓽ ꓪꓴ-ꓢ ꓤ ꓠꓱ ꓐꓴ ꓠꓲꓹ ꓟ ꓔꓯ ꓟꓳꓸ ꓖꓶꓽ ꓗꓷ ꓟ  ꓥ ꓡꓳ= ꓚꓲꓸ ꓛꓬꓼ ꓤꓶꓻ ꓔꓯ ꓪꓴ-ꓢ ꓔꓯ ꓡꓯꓼ ꓙꓱꓻ ꓗꓷˍ ꓟ꓾ ꓚꓲꓸ ꓛꓬꓼ ꓔꓯ ꓢꓰꓼ ꓢꓴ꓾ ꓠꓻ ꓡꓰ ꓠ ꓬꓰ ꓢꓴ꓾ ꓫꓸ ꓔꓳ ꓫꓸ ꓒꓯꓼ ꓗꓷ ꓡꓰ ꓝꓲ ꓢꓴ ꓐꓴ ꓔꓯ ꓖꓼ ꓖꓶꓽ ꓠꓹ ꓟ ꓟꓲ ꓓꓰꓽ ꓗꓷꓳ= ꓢ-ꓔꓲ-ꓩ-ꓠꓳ ꓡꓰ ꓐꓰ ꓪꓴ-ꓢ ꓐꓱ ꓶ꓾ ꓶꓼ ꓓꓳꓽ ꓫꓱꓹ ꓓꓳꓽ ꓐꓱ ꓶ ꓾ ꓘꓴ-ꓜꓲ-ꓞꓳ ꓐꓱ ꓶ ꓢꓯꓼ ꓟꓬꓻ ꓖꓶꓽ ꓢꓲ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓒꓬꓱꓻ ꓗꓷ ꓢꓴ ꓐꓴ ꓪꓴꓸ ꓠꓬꓲ꓾ ꓘꓴ-ꓜꓲ-ꓞꓳ ꓠꓬ ꓮ ꓟꓶꓻ ꓗꓪ ꓛꓲꓺ ꓪꓴꓽ ꓡ ꓟꓴ ꓡ ꓔꓬꓹ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓐꓱ ꓶ꓾ ꓶꓼ ꓓꓳꓽ ꓫꓱꓹ ꓓꓳꓽ ꓐꓱ ꓶ ꓾ ꓘꓴ-ꓜꓲ-ꓞꓳ ꓐꓱ ꓶ ꓢꓯꓼ ꓟꓬꓻ ꓖꓶꓽ ꓗꓷ ꓢꓴ ꓡꓰ ꓐꓰ ꓚꓲꓸ ꓛꓬꓼ ꓤꓶꓻ ꓗꓪ ꓣꓱꓽ ꓬꓰ ꓢꓯꓸ ꓔꓬꓹ ꓡꓯ꓾ ꓐꓰ ꓟꓸ ꓖꓶꓽ ꓗꓷ ꓟ ꓥꓳ=

Credit to Vatican News

https://bit.ly/2n2HRXz