NYI. NYI ꓗꓪ M DO:

1. Asia ꓗꓪ ꓚꓬ, ꓟꓬꓱꓼ  ꓠꓻ ꓫꓵꓽ ꓠꓸꓹ ꓢꓴ ꓕꓲ ꓣꓳ ꓫꓵꓻ ꓟ ꓓꓳꓽ

India ꓗꓴꓷꓼ ꓖꓴ ꓪꓴꓸ ꓗꓰ-ꓡꓮ-ꓣꓮ ꓗꓴꓷꓼ ꓫꓴ ꓗꓪ ꓞꓳ ꓡꓱ ꓕꓲ ꓣꓳ ꓚꓬ, ꓟꓬꓱꓼ  ꓠꓻ ꓫꓵꓽ ꓠꓸꓹ ꓢꓲ ꓫꓵꓻꓳ꓾ ꓐꓰ ꓢꓷꓸ ꓪ ꓡꓳ= Asia ꓗꓪ ꓚꓬ, ꓟꓬꓱꓼ  ꓠꓻ ꓫꓵꓽ ꓠꓸꓹ ꓢꓲ ꓫꓵˍ ꓟ ꓬꓲ ꓪꓴꓸ ꓕꓲ ꓣꓳ ꓥ ꓡꓳ꓾ ꓐꓰ India ꓠꓯꓸꓹ ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓐꓯ ꓩꓴ ꓡ ꓡꓳ ꓐꓰ ꓢꓷꓸ ꓪ ꓡꓳ= ꓡꓳ ꓬꓰ ꓟ ꓕꓲ ꓫꓵꓽ ꓠ ꓗꓪ ꓚꓬ, ꓟꓬꓱꓼ  ꓠꓻ ꓫꓵꓽ ꓑꓶ ꓓꓴ ꓫꓵꓼ ꓢꓴ Spain ꓗꓴꓷꓼ ꓗꓪ (2) ꓣꓳ Brazil ꓗꓴꓷꓼ ꓗꓪ (2) ꓣꓳ ꓥ ꓡꓳ ꓐꓰ ꓠꓯꓸꓹ ꓞꓲꓼ ꓟꓬꓱꓽ ꓣꓱ ꓜꓴ ꓐꓴ ꓡꓰ ꓐꓯ ꓡꓳ=

ꓚꓬ, ꓟꓬꓱꓼ  ꓠꓻ ꓫꓵꓽ ꓑꓶ ꓓꓴ ꓫꓵꓻ ꓢꓴ ꓮ ꓘꓶꓸ ꓟꓬꓽ ꓡ ꓔꓬ ꓟ ꓪꓴꓸ ꓠꓬꓲ ꓤ ꓟꓴ ꓓꓴ ꓬꓰ ꓡꓯ ꓐꓰ WHO ꓡꓰ ꓢꓷꓸ ꓙ ꓟꓷ ꓙ ꓡꓳ ꓐꓰ Popular News Journal ꓓꓳꓽ ꓗꓪ ꓐꓯ ꓔ ꓡꓳ=

2. ꓟꓴ-ꓖꓴ ꓡꓳ ꓒꓱ  ꓗꓪ ꓟꓶ ꓦ ꓜꓯꓼ꓾ ꓬꓲꓻ ꓙꓬ ꓙꓵꓽ ꓔꓬ ꓟ ꓓꓳꓽ

ꓡꓳ ꓬꓰ ꓟ 2022 ꓘꓳꓼ 7 ꓦ 30 ꓠꓬꓲ ꓕꓯ ꓟ-ꓓꓲ-ꓡꓲ ꓟꓵꓽ ꓫꓴ꓾ ꓟꓴ-ꓖꓴ ꓡꓳ ꓒꓱ ꓗꓪ ꓟꓶ ꓦ ꓜꓯꓼ꓾ ꓬꓲꓻ ꓙꓬ ꓙꓵꓽ ꓔꓬ ꓡꓳ ꓐꓰ ꓢꓷꓸ ꓪ ꓡꓳ꓿ 24 ꓙꓵꓹ ꓟ ꓘꓴꓽ ꓗꓪ ꓟꓶꓽ ꓦ ꓮ ꓘꓶꓸ ꓜꓯꓼ ꓡ ꓠꓬꓲ 2.12 ꓡꓯ ꓟꓼ ꓙꓳˍ ꓡꓳ꓾ ꓐꓰ ꓞꓳ ꓘꓹ ꓢꓴ ꓕꓲ ꓣꓳ ꓡꓰ ꓐꓯ ꓡꓳ ꓐꓰ ꓢꓷꓸ ꓪ ꓡꓳ= ꓕꓱ ꓡꓱ ꓟꓶ ꓦ ꓜꓯꓼ ꓬꓲꓻ ꓙꓬ ꓙꓵꓽ ꓡ ꓠꓬꓲ ꓪ ꓙꓵꓽ ꓐꓽ ꓘꓶꓽ ꓗꓪ ꓦꓲ ꓫꓬꓹ ꓢꓲ ꓔꓬ ꓢꓴ ꓐꓴ ꓐꓱ ꓶ ꓓꓵꓽ ꓙ ꓫꓸ ꓓꓴ ꓙꓳˍ ꓠꓬꓲ꓾ ꓤ ꓟꓳ ꓠꓹ ꓟ ꓚꓬꓴꓸ ꓙ ꓬꓰ ꓙ ꓜꓴ ꓐꓴ ꓡꓰ ꓢꓷ ꓙ ꓟꓴ ꓙ ꓩꓴ ꓡˍ ꓡꓳ= ꓮ ꓠꓲꓹ 8 ꓦ ꓗꓪ ꓥ ꓟꓲ ꓟꓵꓽ ꓡꓶꓽ ꓡ ꓢꓲ ꓡ ꓞꓳ ꓞꓲ ꓣꓳ ꓛꓲ ꓟꓵꓽ ꓡꓶꓽ ꓔꓲꓸ ꓢꓲ ꓫꓵꓻ ꓬꓰ ꓟ ꓙꓳˍ ꓡꓳ ꓐꓰ ꓐꓯ ꓡꓳ=

3ꓸ ꓚꓬꓮꓲꓹ-ꓔꓳ ꓗ-ꓕꓳ-ꓡꓲꓗ ꓢ-ꓢꓶ-ꓠ ꓗꓪ ꓔꓲꓸꓸ ꓒ ꓐꓴ ꓘꓳꓼ ꓚꓳ ꓪꓽ ꓘꓴˍ ꓟ   

ꓚꓬꓮꓲꓹ-ꓔꓳ ꓗ-ꓕꓳ-ꓡꓲꓗ ꓢ-ꓢꓶ-ꓠ ꓗꓪ ꓔꓲꓸꓸꓸꓒ ꓐꓴ ꓬꓲꓸ ꓪꓴꓸ ꓕꓲ ꓠꓬꓲ ꓪ ꓘꓴ ꓜꓲꓼ ꓓꓴ ꓔꓯ ꓮ ꓟꓰ ꓠꓯꓼ ꓠꓯꓼ (7) ꓙꓵꓹ ꓕꓯ ꓬꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ= ꓟꓲ-ꓢ ꓪ ꓘꓴ ꓓꓴ ꓔꓯ ꓠꓬ ꓔꓲꓺ ꓒ Augustin ꓗꓪ ꓐꓰ ꓪꓴꓸ ꓔꓴ ꓢꓲ ꓫꓵꓽ ꓫꓵ ꓕꓲ ꓙꓵꓹ ꓪ ꓘꓴ ꓟ ꓬꓲ ꓙꓵꓹ ꓔꓯ ꓠꓬ ꓔꓲꓺ ꓒ Michael Shwe Khoit ꓗꓪ ꓐꓰ ꓥ ꓟꓲ꓾ ꓟꓸ ꓟꓲꓽ ꓚˍ ꓟ ꓔꓯ ꓠꓬ ꓔꓲꓸꓸ ꓒ Stephen Ano ꓗꓪ ꓐꓰ ꓧꓳꓽ ꓪꓴꓸ ꓟꓳ ꓗꓷ ꓟ ꓥ ꓡꓳ=             ꓔꓲꓸꓸ ꓒ Stephen Ano ꓡꓰ (16) ꓧꓪꓹ ꓟ ꓗ-ꓕꓳ-ꓡꓲꓗ ꓔꓲꓸꓸ ꓒ ꓐꓴ ꓪ ꓘꓴ ꓜꓲꓼ ꓔꓶꓸ ꓗꓪ ꓔꓲꓸꓸ ꓒ ꓪ ꓔꓲ Francis ꓐꓯ ꓑꓶ ꓩꓴ ꓡ ꓟ ꓦ ꓢꓯꓼ ꓟꓶ ꓟ ꓬꓲꓸ ꓚꓱꓹ ꓔꓯ ꓢꓷꓸ ꓙ ꓟꓷ ꓙ ꓡꓳ ꓐꓰ ꓢꓷꓸ ꓪ ꓡꓳ=

ꓚꓬꓮꓲꓹ-ꓔꓳ ꓗ-ꓕꓳ-ꓡꓲꓗ ꓢ-ꓢꓶ-ꓠ ꓔꓲꓸꓸ ꓒ ꓐꓴ ꓪ ꓘꓴ ꓜꓲꓼ ꓓꓴ ꓔꓯ ꓠꓬ ꓟꓶꓽ ꓘꓶꓼ 9ꓽ00 ꓙꓵꓹ ꓔꓯ ꓬꓰ ꓓꓳ ꓡꓰꓳ꓾ ꓐꓰ ꓢꓷꓸ ꓪ ꓡꓳ=

4.ꓬꓲ ꓜꓶ ꓠꓻˍ ꓟ ꓫꓵꓽ ꓓꓯ ꓠˍ ꓟ ꓑꓶ ꓓꓴ ꓫꓵꓻ ꓢꓴ (43) ꓣꓳ ꓙꓳˍ ꓡꓳ꓾ ꓐꓰ ꓠꓯ., ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓐꓯ ꓟ ꓓꓳꓽ

ꓟꓬ‐ꓟ ꓗꓴꓷꓼ ꓗꓪ ꓡꓳꓹ ꓬꓰ ꓟ 2022 ꓘꓳꓼ 6 ꓦ ꓟ ꓕꓲ ꓠꓬꓲꓽ ꓗꓪ ꓐꓰ 2022 ꓘꓳꓽ 7 ꓦ ꓟ 16 ꓠꓬꓲ ꓗꓪ ꓛꓲ

ꓬꓲ ꓜꓶ ꓠꓻˍ ꓟ ꓫꓵꓽꓓꓯ ꓠꓻˍ ꓟ ꓑꓶꓸ ꓓꓴ ꓠ., ꓢꓴ 10766 ꓣꓳ ꓐꓰ ꓫꓵꓻ ꓢꓴ ( 43) ꓣꓳ ꓙꓳˍ ꓡꓳ ꓐꓰ ꓠꓯꓼ ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓐꓯ ꓡꓳ꓿ 2022 ꓘꓳꓼ ꓬꓲ. ꓘꓴꓽ ꓗꓪ ꓬꓲ ꓜꓶ  ꓠꓻˍ ꓟ ꓫꓵꓽ ꓓꓯ ꓠꓻˍ ꓟ ꓠꓬ ꓮ ꓘꓶ. ꓟꓬꓽ ꓡ ꓓꓴ ꓥꓳ ꓐꓰ ꓢꓷ. ꓙ ꓟꓳ ꓙ ꓔ ꓡꓳ꓿ 2022 ꓘꓳꓼ 7 ꓦ ꓟ ꓬꓲ. ꓟꓶꓽ ꓕꓲ ꓠꓽ ꓘꓴꓽ ꓗꓪ ꓖꓪ ꓙꓱꓻ ꓜꓲꓼ ꓓꓴ ꓗꓪ ꓬꓲ ꓜꓶ ꓠꓻˍ ꓟ ꓫꓵꓽ ꓓꓯ ꓠꓻˍ ꓟ ꓔꓯ ꓗꓽ ꓠꓹ ꓟ ꓐꓱ ꓶ ꓦꓬꓽ ꓕꓳꓹ ꓢꓰꓼ ꓠꓯ., ꓞꓲꓼ ꓒꓬꓸ ꓓꓴ ꓬꓰ ꓡꓯ ꓐꓰ ꓠꓯ., ꓞꓲꓼ ꓟꓬꓱꓽ ꓣꓱꓽ ꓜꓴ ꓐꓴ ꓡꓰ ꓢꓷ. ꓙ ꓩꓴ ꓡˍ ꓡꓳ꓿ 

 

 

 

Add new comment

1 + 5 =