ꓞꓳ ꓤ ꓮ ꓟꓬꓹ ꓙꓲꓻ ꓖꓴ ꓙꓳ ꓠꓹ ꓟ ꓐꓱ ꓶ ꓝꓲ-ꓓꓴ ꓐꓴ ꓡꓰ ꓐꓰ ꓛꓳ ꓫꓱꓽ ꓢꓴ ꓒꓬꓱꓼ ꓠ ꓗˍ ꓟ=

ꓞꓳ ꓤ ꓮ ꓟꓬꓹ ꓙꓲꓻ ꓖꓴ ꓙꓳ ꓠꓹ ꓟ ꓐꓱ ꓶ ꓝꓲ-ꓓꓴ ꓐꓴ ꓡꓰ ꓐꓰ ꓛꓳ ꓫꓱꓽ ꓢꓴ ꓒꓬꓱꓼ ꓠ ꓗˍ ꓟ=

8 ꓦꓻ 7 ꓠꓬꓲ꓾2019

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓾ ꓠꓽ-ꓢꓽ-ꓠꓬꓲ ꓜꓲꓼ ꓡꓳꓽˍ ꓟ ꓠꓬꓲ꓾ ꓞꓳꓻ ꓜꓴꓻ ꓜꓲꓼ ꓡꓳꓽˍ ꓟ꓾ ꓘꓴ-ꓜꓲ-ꓞꓳ ꓡꓲꓽ ꓟꓸ ꓖꓶꓽˍ ꓟ ꓗꓪ꓾ ꓢꓲꓺ ꓒꓽ ꓬꓰ-ꓢꓴ ꓠꓯꓸꓼ ꓗꓪ ꓕꓲꓽ ꓠꓲꓹ ꓟ ꓡꓱꓸꓼ ꓙꓵꓻ ꓠꓹ ꓟ꓾ ꓞꓳ ꓙꓳ ꓢꓯꓸ ꓔꓬꓹ ꓠꓹ ꓟ ꓐꓱ ꓶꓼ ꓝꓲ-ꓓꓴ ꓕꓳꓽ ꓶꓼ ꓔꓯ ꓟꓳꓸꓼ ꓬꓲꓸ ꓚꓰꓻ ꓣꓴ ꓢꓲ ꓟꓸ ꓖꓶꓽ ꓗꓷꓳ=

ꓝꓲ ꓓꓴ ꓕꓳꓽ ꓶꓽ  3 ꓽ 3 - 6  ꓗꓪ꓾ ꓒꓲ-ꓕꓱ ꓐꓰ ꓬꓳ-ꓦ ꓐꓴ ꓗꓪ ꓐꓰ ꓛꓲ ꓫꓳꓸ ꓔꓬꓹ ꓟ ꓓꓰꓽ ꓜꓽ ꓓꓰꓽ ꓓꓳꓻ ꓢꓴ ꓕꓲꓽ ꓣꓳ ꓔꓯ ‘’ꓥꓪ ꓠꓽ ꓒꓴˍ ꓐꓰ ꓫꓵꓺ ꓟꓽ ꓙꓳꓻ=ꓖꓳ ꓡꓱ  ꓥˍ ꓟꓲ ꓥꓪ ꓙꓳˍ ꓟ ꓥꓪ ꓠꓴꓻ ꓔꓯ ꓖꓶ ˍ ꓥꓳ=ꓠ-ꓢ-ꓡꓱ ꓢꓴ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓙ ꓖꓴ ꓫꓱꓽ ꓙꓰ ꓾ ꓐꓯ ꓢꓲ꓾ ꓠꓻ ꓫꓬꓹ ꓖꓶꓽˍ ꓡꓳ= ꓝꓲ-ꓓꓴ ꓐꓴ ꓠꓬ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓡꓯꓼ ꓕꓲꓺ ꓣꓱꓽ ꓗꓷ ꓟ ꓥꓳ= ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓐꓯ ꓑꓶꓺ ꓖꓶꓽˍ ꓟ ꓡꓰꓽ ꓟꓽ ꓥ꓾ ꓚꓵꓺ ꓚꓵꓺ ꓥ ꓟ꓾ ꓔꓱꓹ ꓚꓵˍ ꓟ ꓗꓪ ꓐꓰ ꓓꓳ ꓡˍ ꓟ ꓡꓯꓼ ꓕꓲꓺ ꓥ ꓟ ꓠꓻ ꓫꓬꓹ ꓖꓶꓽˍ ꓟ ꓗꓪ ꓐꓰ ꓢꓷꓸ ꓙ ꓟꓳ ꓙ ꓗꓷ ꓟ ꓥ ꓡꓳ=

ꓢꓲꓺ ꓒꓽ ꓬꓰ-ꓢꓴ ꓟꓬꓱꓺ ꓗꓪ ꓐꓰ ꓪꓽ ꓠꓬꓲˍ ꓟ ꓢꓷ ꓡꓰ ꓓꓴ ꓔꓯ ꓬꓰ ꓟꓸ ꓖꓶꓽ ꓗꓷꓳ= ꓕꓱ ꓟ ꓠꓬ ꓬꓰ-ꓢꓴ ꓙꓲ-ꓢꓴ ꓕꓯꓽ ꓢꓲ ꓗꓪ ꓐꓲꓻ ꓜꓲꓼˍ ꓟ ꓙꓵꓻ ꓠꓲꓹ ꓐꓰ ꓪꓴ-ꓢ ꓐꓯ ꓘꓶꓽ ꓪꓽ ꓠꓬꓲˍ ꓟ ꓔꓯ ꓖꓴꓻ ꓟꓸ ꓖꓶꓽ ꓔꓬꓹ ꓟ ꓥ ꓡꓳ=

ꓒꓲ-ꓕꓱ ꓠꓬ ꓛꓲ ꓫꓳꓸ ꓢꓴ ꓔꓯ ꓖꓳꓻ ꓔꓴꓺ ꓢꓲ꓾ ꓙ ꓖꓴ ꓫꓱꓽ ꓐꓻ ꓡ ꓠꓹ ꓟ ꓬꓰ ꓙ ꓖꓶꓽ ꓗꓷꓳ= ꓒꓲ-ꓕꓱ ꓠꓽ ꓘꓴ-ꓜꓲ-ꓞꓳ ꓔꓯ ꓔꓯˍ ꓟ ꓥꓳ꓾ ꓘꓴ-ꓜꓲ-ꓞꓳ ꓠꓬ ꓓꓳꓽ ꓡꓰ ꓢꓴ ꓐꓴ꓾ ꓙꓽ ꓫꓸ ꓔꓬꓹ ꓢꓴ ꓐꓴ ꓾ ꓫꓸ ꓙꓵꓻˍ ꓟ ꓔꓳꓹ ꓜꓳꓽ ꓔꓬꓹ ꓢꓴ ꓐꓴ ꓔꓯ ꓖꓳꓻ ꓔꓴꓺ ꓖꓶꓽ ꓔꓬꓹ ꓟ ꓥꓳ= ꓖꓳ ꓟ ꓪꓴꓸ ꓠꓬꓲ ꓠꓴꓻ ꓪꓽ ꓟꓬꓻ-ꓢꓲꓽ ꓕꓽ ꓚꓵꓸ ꓔ꓾ ꓞꓳ ꓤ ꓐꓴ ꓔꓳꓹ ꓜꓳꓽ ꓔꓬꓹ ꓟ ꓫꓸ ꓙꓵꓻ ꓔꓬꓹ ꓟ ꓔꓯ ꓟꓳꓻ ꓠ ꓛꓲ ꓡꓳꓸ ꓠꓬꓲ ꓖꓶꓽ ꓡꓯ= ꓗꓷꓹ ꓶꓽ ꓡꓰ ꓝꓲˍ ꓟ ꓫꓬꓸ- ꓗꓺ ꓫꓬꓹ ꓢꓲ꓾ ꓟꓽ ꓙꓲꓻ ꓟ ꓡꓰꓽ ꓣꓱꓽ ꓬꓰ ꓔꓬꓹ ꓟ ꓟꓲ ꓠꓯ ꓗꓪ ꓾ ꓔꓱꓹ ꓚꓵˍ ꓟ ꓛꓳꓽ ꓒꓯꓹ ꓥ ꓟ ꓠꓵ ꓠꓲꓹ ꓫꓬꓸ-ꓗꓺ ꓔꓯ ꓡꓰꓽ ꓫꓬꓹ ꓠ ꓗꓹ ꓡꓳ= ꓬꓲꓸ ꓬꓲꓺ ꓢꓲꓺ ꓙꓳˍ ꓟ ꓧꓳꓹ ꓡꓯꓽ ꓘꓳꓹ ꓟ ꓔꓯ ꓟꓸ ꓖꓶꓽˍ ꓟ ꓠꓵ ꓠꓲꓹ ꓗꓺ ꓫꓵꓺ ꓔꓯ ꓫꓬꓹ ꓡꓯ=

ꓝꓲ ꓓꓴ  ꓒꓲ-ꓕꓱ ꓐꓰ ꓬꓳ-ꓦ ꓠꓬ ꓛꓲ ꓫꓳꓸ ꓔꓬꓹ ꓟ  ꓓꓰꓽ ꓜꓽ ꓢꓴ ꓔꓯ ꓶꓼ ꓤ ꓫꓱꓹ ꓤ ꓖꓶꓽ ꓠꓲꓹ ꓙꓳˍ ꓟ ꓪꓴꓸ ꓠꓬꓲ꓾ ꓥꓪ ꓠꓴꓽ ꓔꓯ ꓡꓳꓸ ꓠꓬꓲ  ꓐꓯ ꓢꓲ꓾ ꓛꓳ ꓫꓳꓸ ꓢꓴ ꓔꓯ ꓕꓲꓺ ꓡꓰˍ ꓗꓪ ꓛꓲˍ ꓡꓯꓽ-ꓒꓯꓹ ꓛꓱꓻ ꓖꓶꓽ ꓢꓲ ꓖꓳꓻ ꓔꓴꓺ ꓖꓶꓽ ꓗꓷꓳ꓾ ꓠꓻ ꓫꓬꓹ ꓖꓶꓽ ꓗꓷꓳ= ꓕꓱ ꓡꓱ ꓬꓰˍ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓬꓰ ꓗꓷˍ ꓟ ꓡꓰ ꓐꓰ ꓝꓲ ꓓꓴ ꓐꓴ ꓬꓰ ꓗꓷ ꓟ ꓥ ꓡꓳ=

ꓣꓳ ꓤꓶꓻ ꓗꓪ ꓫꓸ ꓙꓵꓻ ꓓꓰꓺ ꓡꓰˍ ꓟ ꓙꓵꓹ꓾ ꓫꓸ ꓑꓬꓻ ꓖꓴ ꓟꓽ ꓙꓳ ꓢꓲ ꓙꓽ ꓫꓸ ꓔꓬꓹ ꓟ ꓙꓵꓹ ꓗꓪ ꓬꓰ-ꓢꓴ ꓙꓲ-ꓢꓴ ꓠꓬ ꓡꓯꓽ-ꓒꓯꓹ ꓛꓱꓺ ꓖꓶꓽ ꓔꓬꓹ ꓡꓳ꓾ ꓥꓪ ꓔꓯ ꓡꓳꓸ ꓠꓬꓲ꓾ ꓥꓪ ꓕꓱ ꓗꓪ ꓔꓬꓹ ꓡꓳ ꓾ ꓐꓰ ꓐꓯ ꓔꓬꓹ ꓟ ꓔꓯ ꓢꓷ ꓔ ꓢꓲ꓾ ꓬꓰ-ꓢꓴ ꓙꓲ-ꓢꓴ ꓠꓻ ꓫꓬꓹ ꓖꓶꓽˍ ꓟ ꓔꓯ ꓘꓳꓹ ꓣꓴ ꓠꓹ ꓟ ꓾ ꓣꓳ ꓟꓲ ꓡꓯꓽ-ꓒꓯꓹ ꓛꓱꓺ ꓢꓲ ꓙꓲ-ꓢꓴ ꓔꓯ ꓪꓳꓺ ꓔ ꓠ ꓗˍ ꓡꓳ꓾ ꓕꓲꓺ ꓔ ꓠ ꓗˍ ꓡꓳ=

ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓕꓲꓽ ꓠꓲꓹ ꓕꓲꓽ ꓪꓺꓽ ꓬꓰˍ ꓟ ꓠꓬ ꓙꓲꓻˍ ꓟ ꓥ ꓡꓳ ꓐꓯ ꓟ ꓔꓯ ꓢꓷ ꓔ ꓠ ꓗˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓣꓳ ꓐꓴ ꓔꓯ ꓖꓳꓻ ꓔꓴꓺ ꓠꓹ ꓟ ꓬꓲꓸ ꓡꓯꓽ-ꓒꓯꓹ ꓛꓱꓺ ꓖꓶꓽ ꓔꓬꓹ ꓟ ꓡꓰ ꓐꓰ ꓣꓳ ꓥˍ ꓟꓲ ꓠꓶꓽ ꓛꓳꓽ ꓕꓲꓽ ꓛꓳ ꓐꓴ ꓔꓯ ꓝ ꓢꓲ  ꓡꓯꓽ-ꓒꓯꓹ ꓛꓱꓺ ꓖꓶꓽ ꓠꓹ ꓟ ꓕꓽ ꓟꓲ ꓡꓲ ꓝꓲ=

Photo credits to Vatican News

https://bit.ly/2YQNdm3