ꓬꓲ ꓪ ꓮ ꓙꓵꓽ ꓠꓬ ꓕꓲ ꓠꓲꓹ ꓟˍ ꓡꓰꓽ ꓒꓬꓱꓼ ꓡ ꓢꓲ ꓬꓲ ꓪ ꓣꓳ ꓠꓯꓸꓼ ꓗꓪ ꓔꓬ ꓝꓲ

“ꓬꓲ ꓪ ꓮ ꓙꓵꓽ ꓠꓬ ꓕꓲ ꓠꓲꓹ ꓟˍ ꓡꓰꓽ ꓒꓬꓱꓼ ꓡ ꓢꓲ꓾ ꓬꓲ ꓪ ꓣꓳ ꓠꓯꓸꓼ ꓗꓪ ꓔꓬ ꓝꓲ”

ꓠꓬꓲꓸ ꓠꓬꓲ ꓗꓪ ꓣꓳ ꓑ ꓙ ꓪˍ ꓟ ꓬꓳ-ꓦ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓪꓽ ꓘꓴ ꓘꓶꓽ ꓔꓯ ꓣꓳ ꓑ ꓙ ꓪ ꓡꓰꓳ= ꓪꓽ ꓘꓴ ꓘꓶꓽ ꓕꓱ ꓟ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓠꓬ ꓡ ꓠꓹ ꓟ ꓤꓶꓻ ꓔꓯ ꓓꓵꓽ ꓙ ꓗꓷ ꓔ ꓡꓳ꓾ ꓐꓰ ꓐꓯ ꓓꓹ ꓡꓳ= ꓝꓮꓲ ꓛꓲꓺ ꓡˍ ꓟ ꓤꓶꓻ ꓗꓪ ꓬꓲ ꓝꓲ ꓓꓴ ꓒꓬꓱꓼ ꓡˍ ꓟ ꓣꓳ ꓐꓴ ꓔꓯ ꓕꓲ ꓠꓲꓹ ꓕꓲ ꓪ꓾ ꓕꓲ ꓠꓲꓹ ꓟˍ ꓡꓰꓽ ꓒꓬꓱꓼ ꓡꓰ ꓝꓲ ꓠꓲꓹ ꓫꓵˍ ꓟ ꓔꓯ ꓬꓲ ꓪꓽ ꓘꓴ ꓘꓶꓽ ꓗꓪ ꓐꓰ ꓫꓬꓽ ꓫꓬꓽ ꓡꓰꓽ ꓟꓳ ꓪ ꓓꓹ ꓡꓳ= ꓖꓳ ꓡꓱ ꓥˍ ꓟꓲ ꓘꓴ-ꓜꓲꓼ-ꓞꓳ ꓚꓺ ꓟꓲꓽ ꓕꓲ ꓟ ꓡꓱꓸꓼ ꓔꓯ ꓡꓳꓸ ꓠꓬꓲ ꓗꓷ ꓕꓯ ꓠꓬ ꓘꓴ-ꓜꓲ-ꓞꓳ ꓪꓴꓸ ꓔꓴˍ ꓟ ꓗꓪ ꓐꓰ ꓠꓬꓲꓸ ꓠꓬꓲ ꓗꓪ ꓛꓲꓺ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓥ ꓟ ꓣꓳ ꓙꓲ-ꓢꓴ ꓢꓲꓺ ꓤ ꓐꓴ ꓠꓬ ꓓꓵꓽ ꓙ ꓚꓱꓹ ꓟꓽ ꓫꓱꓸ ꓡꓯ ꓘꓳ꓾ ꓟꓽ ꓪ ꓡꓯ ꓘꓳ ꓟ ꓑꓶꓸ ꓓꓴ ꓬꓲ ꓒꓳꓹ ꓮ ꓟꓬꓹ ꓓꓳ ꓡ ꓢꓲ ꓬꓲ ꓗꓪꓺ ꓗꓪꓺ ꓡꓰ ꓟ ꓥ ꓡꓳ=ꓕꓱ ꓡꓱ ꓬꓲ ꓗꓪꓺ ꓗꓪꓺˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓠꓲꓹ ꓡꓶꓽ ꓐꓰ ꓧꓷꓸ ꓡꓰ ꓔꓬ ꓟ ꓥ ꓡꓳ= ꓬꓲ ꓠꓲꓹ ꓡꓶꓽ ꓐꓰ ꓶꓽ ꓡꓰ ꓔꓬ ꓟ ꓥ ꓡꓳ= ꓙꓲ-ꓢꓴ ꓬꓲ ꓚꓬꓴꓸ ꓙˍ ꓟ ꓓꓳꓽ ꓔꓯ ꓐꓯ ꓑꓶˍ ꓟ꓾ ꓐꓯ ꓒꓬꓱꓻ ꓙꓰˍ ꓟ ꓗꓪˍ ꓟꓲ ꓕꓱ ꓡꓱ ꓬꓲ ꓗꓪꓺ ꓗꓪꓺ ꓡꓰ ꓟ ꓠꓬ ꓚꓬꓴꓸ ꓙˍ ꓟ ꓟꓬꓱꓽ ꓔꓯ ꓐꓬ ꓡꓰ ꓝꓲˍ ꓟ ꓥ ꓡꓳ=

ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓪꓽ ꓘꓴ ꓘꓶꓽ ꓔꓯ ꓣꓳ ꓑ ꓙˍ ꓕꓯ ꓮ ꓟꓬꓹ ꓒꓳꓹ ꓒꓬꓱꓼ ꓡ ꓟ꓾ ꓬꓲ ꓗꓪꓺ ꓗꓪꓺ ꓡꓰ ꓟ ꓔꓯ ꓠꓽ ꓗꓷ ꓝꓲ ꓛꓲꓺ ꓡꓺꓳ꓾ ꓐꓰ ꓣꓳ ꓓꓵꓽ ꓙ ꓞꓷꓹ ꓠ ꓔ ꓡꓳ= ꓓꓵꓽ ꓙ ꓞꓷꓹ ꓔ ꓟˍ ꓡꓰ ꓐꓰ ꓒꓬꓱꓼ ꓡ ꓠ ꓢꓯꓼ ꓕꓵꓼ ꓠ ꓔ ꓥ= ꓕꓱ ꓡꓱ ꓢꓯꓼ ꓕꓵꓼˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓠꓲꓹ ꓡꓶꓽ ꓔꓯ ꓐꓲ ꓡꓰ ꓝꓲˍ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬꓲꓽ ꓗꓴꓸ ꓚꓸꓼ ꓗꓪ ꓬꓲ ꓗꓪꓺ ꓗꓪꓺ ꓡꓰ ꓝꓲˍ ꓟ ꓦꓶꓻ ꓠꓲꓹ꓾ ꓟꓬ ꓔꓳꓹ ꓟ꓾ ꓚꓲꓸ ꓛꓬ ꓐꓱ ꓶˍ ꓡꓰꓽ ꓓꓵꓽ ꓙˍ ꓟ꓾ ꓠꓲꓹ ꓘꓪꓽ ꓟꓽ ꓫꓵ ꓟ ꓐꓰ ꓝꓴꓲꓸ ꓓꓰꓺˍ ꓟ꓾ ꓕꓱ ꓟꓬ ꓟ ꓔꓯ ꓠꓽ ꓗꓷ ꓠ ꓗꓹ ꓡꓳ= ꓝꓮꓲ ꓠꓬ ꓕꓲ ꓠꓲꓹ ꓕꓲ ꓪ ꓬꓰ ꓢꓲ ꓠꓬꓲꓸ ꓠꓬꓲ ꓟꓲꓺ ꓠꓯꓺ ꓗꓪ ꓣꓱꓽ ꓞꓹ ꓔꓬ ꓟ ꓢꓲꓺ ꓡꓲꓺ ꓟ ꓐꓰ ꓪꓽ ꓡꓯ ꓘꓳꓹ ꓟ꓾ ꓝꓴꓲꓸ ꓖ ꓖꓶ ꓡꓯ ꓘꓳꓹ ꓟ꓾ ꓫꓱꓸ ꓤ ꓠꓲꓹ꓾ ꓟꓬꓽ ꓠꓬꓲ ꓠꓬ ꓣꓳꓺ ꓓꓰꓺ ꓡꓰˍ ꓟ ꓢꓯꓼ ꓐꓽˍ ꓟ ꓬꓲꓼ ꓤ ꓠꓬꓲ ꓤ ꓐꓴ ꓥ ꓟ ꓫꓸ ꓢꓴ ꓟꓷꓼ ꓢꓴ ꓐꓴ ꓔꓯ( ꓣꓳ ꓡꓰ ꓛꓲꓺ ꓟꓽ ꓙꓳ ꓢꓴ꓾ ꓣꓳ ꓕꓯꓽ ꓢꓲ ꓫꓸ ꓢꓴ ꓐꓴ) ꓔꓯ ꓬꓰ ꓙ ꓢꓲ ꓠꓬꓲ ꓬꓰ-ꓢꓴ ꓙꓲ-ꓢꓴ ꓬꓲ ꓟꓴꓽ ꓗꓪ ꓗꓴꓷꓼ ꓔꓯ ꓢꓷꓸ ꓙ ꓟꓳ ꓙˍ ꓥꓳ ꓐꓯ ꓠꓬ ꓣꓳ ꓮ ꓙꓵꓽ ꓕꓲ ꓠꓲꓹ ꓟˍ ꓡꓰꓽ ꓒꓬꓱꓼ ꓡˍ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓬꓲ ꓠꓲꓹ ꓡꓶꓽ ꓥˍ ꓟꓲ ꓐꓲ ꓡˍ ꓟ ꓥ ꓡꓳ=