ꓖꓳ ꓓꓱꓽ ꓗꓪ ꓟꓶˍ ꓟ ꓠꓻ ꓔꓯ ꓠꓻ ꓜꓲꓽ ꓝꓲ ꓠꓲꓹ ꓟꓽ ꓫꓵ ꓟ ꓪꓴꓸ ꓠꓬꓲ ꓢꓻ ꓢꓻ ꓡꓰꓽ ꓐꓰ ꓢꓯꓼ ꓟꓬ ꓞꓷꓹ ꓡꓰ ꓢꓲ ꓫꓵꓻ ꓝꓲˍ ꓟ ꓚꓱꓹ ꓔꓯ ꓟꓽ ꓫꓱꓽ ꓠꓹ ꓟ ꓠꓯꓼ ꓞꓲꓼ ꓟꓸ ꓒꓽ ꓐꓴ ꓔꓯ ꓔꓲꓺ ꓒꓽ ꓪ ꓔꓲ Francis ꓡꓰ ꓗꓽ ꓔ ꓡꓳ=

ꓖꓳ ꓓꓱꓽ ꓗꓪ ꓟꓶˍ ꓟ ꓠꓻ ꓔꓯ ꓠꓻ ꓜꓲꓽ  ꓝꓲ ꓠꓲꓹ ꓟꓽ ꓫꓵ ꓟ ꓪꓴꓸ ꓠꓬꓲ ꓢꓻ ꓢꓻ ꓡꓰꓽ ꓐꓰ ꓢꓯꓼ ꓟꓬ ꓞꓷꓹ ꓡꓰ ꓢꓲ ꓫꓵꓻ ꓝꓲˍ ꓟ ꓚꓱꓹ ꓔꓯ ꓟꓽ ꓫꓱꓽ ꓠꓹ ꓟ ꓠꓯꓼ ꓞꓲꓼ ꓟꓸ ꓒꓽ ꓐꓴ ꓔꓯ ꓔꓲꓺ ꓒꓽ ꓪ ꓔꓲ Francis ꓡꓰ ꓗꓽ ꓔ ꓡꓳ=

9 ꓦ ꓟ 20 ꓠꓬꓲ꓾ 2019ꓘꓳꓼ

ꓲ-ꓔ-ꓡꓲ ꓗꓴꓷꓼ  ꓠꓻ ꓘꓶꓽ ꓢꓲꓸ ꓠꓻ ꓫꓬꓹ ꓖꓶꓽˍ ꓟ ꓠꓯꓼ ꓞꓲꓼ ꓟꓸ ꓒꓽ ꓐꓴ꓾ ꓢꓶꓽ-ꓞꓲ ꓔꓯꓸ ꓟꓳꓸꓼ ꓠꓯꓼ ꓞꓲꓼ ꓟꓸ ꓒꓽ ꓐꓴ ꓜꓴꓻ ꓗꓪ ꓟ ꓬꓲꓸ ꓞꓲꓺ 350 ꓣꓳ ꓐꓰ ꓔꓲꓺ ꓒꓽ ꓪ ꓔꓲ Francis ꓜꓲꓼ ꓡꓳꓽˍ ꓕꓯ ꓾ ꓠꓯꓼ ꓞꓲꓼ ꓟꓸ ꓒꓽ ꓕꓲꓽ ꓣꓳ ꓗꓪ ꓐꓰ ꓞꓳ ꓠꓻ ꓐꓴ ꓐꓰ ꓜꓲꓼ ꓡꓯꓽ ꓘꓳˍ ꓟ ꓗꓪ꓾ ꓞꓳ ꓤ ꓐꓴ ꓠꓬ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓔꓯ ꓒꓵꓽˍ ꓟ ꓞꓳ ꓤ ꓕꓲꓼ ꓣꓳ ꓐꓰ ꓚꓰꓼ ꓔ ꓟ ꓟꓶ ꓢꓴ ꓥ ꓡꓳ=ꓬꓲꓸ ꓪ ꓐꓴ ꓔꓯ ꓞꓳ ꓠꓻ ꓕꓲꓽ ꓣꓳ ꓡꓰꓽ ꓟꓽ ꓟꓳ ꓠꓹ ꓟ꓾ ꓮꓽ ꓙꓵꓽ ꓔꓯ ꓒꓵꓽˍ ꓟ ꓞꓳ ꓤ ꓡꓰ ꓐꓰ ꓡꓳꓸ ꓟꓳ ꓠꓹ ꓟ ꓐꓰ ꓖꓳ ꓓꓱꓽ ꓗꓪ ꓟꓶˍ ꓟ ꓠꓻ ꓔꓯ ꓠꓻ ꓜꓲꓽ ꓪ ꓡꓰ ꓝꓲ ꓠꓲꓹ ꓟꓽ ꓫꓵ ꓟ ꓪꓴꓸ ꓠꓬꓲ ꓢꓻ ꓢꓻ ꓡꓰꓽ ꓐꓰ ꓢꓯꓼ ꓟꓬ ꓞꓷꓹ ꓡꓰ ꓢꓲ ꓫꓵꓻ ꓝꓲ ꓠ ꓣꓱꓽˍ ꓟ ꓮ ꓡꓲ ꓕꓲꓽ ꓚꓱꓹ ꓔꓯˍ ꓟꓲ ꓟꓽ ꓣꓱꓽ ꓠꓹ ꓟ ꓠꓯꓼ ꓞꓲꓼ ꓟꓸ ꓒꓽ ꓐꓴ ꓔꓯ ꓔꓲꓺ ꓒꓽ ꓪ ꓔꓲ ꓡꓰ ꓗꓽ ꓔ ꓗꓷꓳ=

ꓠˍ ꓟ ꓔꓯ ꓠꓬ ꓠꓯꓼ ꓞꓲꓼ ꓫꓬꓹ ꓟ ꓚꓱꓹ ꓕꓲꓽ ꓟ ꓡꓰꓽ ꓟ ꓥ꓾ ꓞꓳ ꓠꓻ ꓬꓲꓸ ꓠꓲꓹ ꓟ ꓗꓪ ꓙꓽ ꓣꓳ ꓔꓬꓹ ꓟ꓾ ꓬꓲꓸ ꓘꓳꓺ ꓗꓳꓸ  ꓡꓹ ꓟ ꓤꓶꓻ ꓔꓯˍ ꓟꓲ ꓡꓳꓸ ꓠꓹ ꓟ꓾ ꓞꓳ ꓠꓻ ꓐꓴ ꓔꓯ ꓞꓳ ꓠꓻ ꓡꓰꓽ ꓟꓽ ꓟꓳ ꓠꓹ ꓟ꓾ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓔꓯ ꓒꓵꓽˍ ꓟ ꓞꓳ ꓤ ꓕꓲꓽ ꓣꓳ ꓡꓰ ꓐꓰ ꓟꓳ ꓠꓹ ꓟ꓾ ꓠꓲꓹ ꓟ ꓗꓪ ꓐꓰ ꓡꓹ ꓟ ꓙ ꓗꓳ ꓠꓲꓹ ꓗꓪ ꓐꓰ ꓠꓻ ꓫꓬꓹ ꓖꓶꓽ ꓠꓹ ꓟ꓾ ꓢꓯꓼ ꓖꓶꓽ ꓢꓴ ꓾ ꓙꓲˍ ꓟ ꓛꓳꓽ ꓒꓯꓹ ꓕꓲꓽ ꓣꓳ ꓡꓰ ꓐꓰ ꓫꓱꓸ ꓤ ꓠꓲꓹ ꓟꓸ ꓖꓶꓽ ꓠꓹ ꓟˍ ꓟꓲ ꓐꓯ ꓟꓸ ꓖꓶꓽ ꓢꓲ꓾

ꓞꓳ ꓠꓻ ꓔꓯ ꓬꓲꓸ ꓚꓲꓸ ꓛꓬꓼ ꓬꓲ ꓫꓵꓻ ꓝꓲˍ ꓟ ꓟꓽ ꓥ ꓥ꓾ ꓞꓳ ꓠꓻ ꓠꓬ ꓫꓵꓻ ꓠꓲꓹ ꓡꓶꓽ ꓙꓳˍ ꓟ ꓡꓰ ꓐꓰ ꓢꓻ ꓢꓻ ꓡꓰꓽ ꓐꓰ ꓢꓯꓼ ꓟꓬ ꓞꓷꓹ ꓡꓰ ꓢꓲ ꓫꓵꓻ ꓝꓲˍ ꓟ ꓚꓱꓹ ꓮꓽ ꓙꓵꓽ ꓠꓬ ꓚꓲꓸ ꓛꓬꓼ ꓔꓯ ꓚꓲꓸ ꓛꓬꓼ ꓢꓰꓼˍ ꓟ ꓫꓵꓽ ꓪꓴꓽ ꓔꓯ ꓢꓯꓼ ꓖꓶꓽˍ ꓟ ꓡꓰ ꓐꓰ꓾ ꓠꓱꓸ ꓐꓯꓼ ꓢꓯꓼ ꓟꓬꓻ ꓔꓯ ꓢꓰꓼˍ ꓟ ꓐꓯꓻ ꓟꓴ ꓞꓷꓹ ꓟ ꓡꓰ ꓐꓰ ꓗˍ ꓟ ꓪꓴꓸ ꓠꓬꓲ ꓾ ꓠꓯꓼ ꓞꓲꓼ ꓟꓸ ꓒꓽ ꓐꓴ ꓠꓬ꓾ ꓖꓳ ꓡꓱ ꓡꓳ ꓫꓵꓽ ꓔꓯ ꓬꓻ ꓟꓴ ꓠꓹ ꓟ ꓢꓷꓸ ꓙ ꓟꓳ ꓙ ꓖꓶꓽ ꓗꓷ ꓢꓲ꓾ ꓜꓽ ꓓꓴ꓾ ꓠꓯꓼ ꓞꓲꓼ ꓖꓶꓽˍ ꓟ ꓗꓪ ꓐꓰ ꓠꓽ ꓗꓷ ꓢꓲ ꓞꓳ ꓠꓻ ꓔꓯ ꓫꓵꓻ ꓝꓲˍ ꓟ ꓚꓱꓹ ꓔꓯ ꓢꓯꓼ ꓟꓽ ꓖꓶꓽ ꓟ꓾ ꓗꓽ ꓕˍ ꓟ꓾ ꓕꓱ  ꓡꓱ ꓤꓹ ꓠꓬꓲˍ ꓟ ꓗꓪ ꓟꓽ ꓓꓵꓽ ꓡꓰ ꓠꓹ ꓟ ꓢꓷꓸ ꓙ ꓟꓳ ꓙ ꓖꓶꓽ ꓗꓷꓳ=

ꓮ ꓡꓰ ꓕꓲꓽ ꓣꓳ ꓠꓬ ꓞꓳ ꓤ ꓢꓯꓼ ꓟꓬꓻ ꓔꓯ ꓮ ꓡꓰ ꓚꓱꓹ ꓗꓪ ꓐꓰˍ ꓟꓲ ꓐꓯꓻ ꓟꓴ ꓞꓷꓹ ꓟꓽ ꓐ ꓡ꓾ ꓠꓯꓼ ꓞꓲꓼ ꓟꓸ ꓒꓽ ꓐꓴ ꓬꓰ ꓠꓯˍ ꓟ ꓠꓬ ꓞꓳ ꓤ ꓢꓯꓼ ꓟꓬꓻ ꓔꓯ ꓬꓲꓸ ꓙꓲꓻ ꓒꓵꓽ ꓠ ꓗˍ ꓟ ꓔꓯˍ ꓟ ꓐꓯ ꓟꓸ ꓖꓶꓽ ꓗꓷꓳ=

Credit to Vatican News

https://bit.ly/2lV7HN1                         ...