ꓟꓶꓽ ꓘꓳꓼ ꓠꓬ ꓠꓴ ꓐꓶꓸ ꓓꓴ ꓕꓽ ꓐꓬ ꓡꓰ ꓝꓲ=

ꓠꓴ ꓮꓸ ꓫꓵꓽ ꓔꓳꓹ ꓜꓳꓽ ꓔꓬ ꓡ?

ꓠꓬꓲꓸ ꓠꓬꓲ  ꓣꓳꓽ ꓢꓯꓸ ꓔꓬˍꓟ  ꓟꓲ-ꓠꓯ ꓗꓪ ꓟꓶꓽ-ꓘꓳꓼ ꓐꓰꓼ ꓟꓲ-ꓠꓯ ꓒꓳꓹ ꓡꓶꓸ ꓓꓴ ꓔꓯꓼ ꓔꓳꓹ ꓜꓳꓽ ꓔꓬ ꓡꓳ=

ꓟꓲ-ꓠꓯ ꓞꓸꓹ ꓢꓯꓼ ꓟꓬꓽ ꓡꓹˍꓟ-ꓸ ꓟꓲꓽ-ꓦꓲ ꓢꓯꓼ ꓟꓽ ꓢꓲ ꓫꓬꓹˍꓟ-ꓸ  ꓬꓵ-ꓙꓬ ꓟꓽ ꓢꓲꓽ ꓫꓬꓹˍꓟ  ꓬꓲꓸ ꓙꓵ ꓟꓽ ꓥ ꓦ ꓜꓳꓽ ꓜꓯꓼ ꓡꓹˍꓟ ꓐꓰ ꓟꓶꓽ ꓘꓳꓼ ꓒꓳꓸ ꓡꓶꓸ ꓔꓸ ꓟ ꓠꓬ-ꓸ ꓟꓲ ꓠꓯꓞꓳ-ꓤ ꓠꓯꓸ ꓦꓯꓸ ꓙꓵꓽ_ꓟ ꓪꓴꓸ ꓠꓬꓲ ꓒꓬꓱꓼ ꓡꓸ ꓟ ꓥ ꓡꓳ ꓐꓰ ꓣꓳꓽ ꓐꓴ ꓢꓷꓸ ꓠ ꓗ ꓡꓳ=

ꓣꓳꓽ ꓐꓴ ꓬꓰꓸˍꓟ ꓟꓬꓱꓽ ꓠꓬ ꓟꓲ-ꓠꓯ ꓕꓱꓽ ꓟ ꓔꓯ ꓚꓬꓴ ꓠꓹˍꓟ ꓟꓽ ꓗꓶ ꓡꓰ ꓪꓽ ꓜꓲ  ꓐꓬ ꓡꓰ ꓝꓲ ꓔꓬ ꓡꓳ-ꓸ

ꓖꓳ  ꓟ ꓔꓯ ꓡꓳꓸ ꓠꓬꓲ ꓢꓲꓼ ꓠꓬꓲꓸ ꓠꓬꓲ ꓟ ꓣꓳ ꓤꓶ ꓦꓬꓼ ꓠꓬꓲ ꓗꓪ ꓢꓷꓹ ꓠꓲꓸ ꓙꓳ ꓒꓽ ꓐꓴ ꓡꓰꓽ ꓟꓳꓸ ꓖꓶꓽ ꓔꓸ ꓟ ꓔꓯ ꓣꓳꓽ ꓟꓲ-ꓠꓯ ꓞꓳ ꓫꓵꓽ ꓞꓳ ꓙꓵꓽ ꓘꓴ ꓜꓲꓼ ꓞꓳ ꓮꓽ ꓙꓵꓽ ꓕꓲꓽ ꓠꓲꓸ ꓕꓲꓽ ꓪꓼ ꓪꓽ ꓡꓯꓼ ꓘꓳ ꓢꓲꓸꓹ ꓢꓯꓼ ꓕꓵꓼ ꓠ ꓗ ꓡꓳ-ꓸ

ꓮ ꓡꓰ ꓕꓲꓽ ꓫꓵꓽ ꓔꓯ ꓬꓰ ꓠ ꓗꓸ ꓡꓽ?

ꓟꓲ-ꓦꓲ  ꓬꓲ-ꓙꓬ ꓐꓰꓼ ꓟꓲ-ꓠꓯ ꓧꓪ ꓕꓱ ꓟ ꓔꓯꓼ ꓢꓲ ꓫꓬ ꓡꓰ ꓠꓹ ꓟ ꓠꓬ ꓬꓲꓸ ꓙꓵꓹ ꓮ ꓟꓬ ꓣꓱ ꓬꓯꓼ ꓔꓬ ꓡꓳ-ꓸ ꓡ ꓞꓳ ꓢꓷꓸ ꓠꓲ ꓪꓴꓽ ꓟꓴ ꓡꓹ ꓟ ꓡꓰ ꓐꓰ ꓟꓲ-ꓠꓯ ꓗꓴꓷꓼ ꓐꓱ ꓶ ꓟꓽ ꓙꓵꓸꓹˍꓟ ꓑꓶꓸ ꓛꓵꓽ ꓮ ꓟꓬ ꓓꓳ ꓡ ꓡꓳ-ꓸ ꓕꓱ ꓟ ꓐꓶꓸ ꓓꓴ ꓟꓲ-ꓠꓯ ꓧꓪ ꓐꓬ ꓡꓰ ꓝꓲˍꓡꓳ=

ꓢꓲ ꓫꓬꓹˍꓟ  ꓬꓲ-ꓙꓬ

ꓢꓲꓽ ꓫꓬ ꓟ ꓬꓲ-ꓙꓬ ꓣꓱꓽ ꓪ ꓠꓹˍꓟ  ꓟꓬꓱꓽ ꓓꓽ ꓕꓲꓽ ꓟꓬꓱꓽ ꓗꓷ ꓡꓰ ꓡꓹˍ ꓡꓳ= ꓢꓲꓽ ꓫꓬꓹ ꓟ ꓬꓲ ꓙꓬ ꓐꓷꓸ ꓓꓴ ꓕꓲꓽ ꓟꓵꓽ ꓐꓰ ꓕꓲꓽ ꓟꓵꓽ ꓕꓲꓽ ꓜꓴ ꓐꓰ ꓕꓲꓽ ꓜꓴ ꓢꓰꓼ ꓡꓯꓽ ꓘꓳ ꓓꓴ ꓥꓹˍꓟꓲ ꓙꓳ ꓡꓸ ꓥꓳ= ꓮ ꓡꓰꓳꓽ ꓐꓯ ꓠꓬ  ꓞꓳ ꓤ  ꓣꓱꓽ ꓫꓵꓽ ꓐꓰꓼ ꓙꓼ ꓫꓵꓽ ꓙꓼ ꓙꓵꓽ ꓐꓷꓸ ꓓꓴ ꓟꓲ ꓠꓯ ꓗꓪ ꓟ ꓢꓯꓹ ꓫꓵꓽ ꓢꓯꓼ ꓙꓵꓽ ꓐꓱ ꓶꓽ ꓬꓲ ꓙꓬ ꓟꓽ ꓫꓬ ꓗꓶ ꓡꓰ ꓖꓴ ꓪ= ꓟꓲ ꓠꓯ ꓧꓪꓽ ꓥꓹˍꓟꓲ ꓢꓲꓹ ꓜꓲ ꓡꓳ ꓜꓲ ꓟꓽ ꓙꓳ ꓗꓶꓸꓹ  ꓡꓰ ꓟ ꓪꓴꓹ ꓠꓬꓲ ꓟꓲ ꓠꓯ ꓧꓪ ꓥꓹˍꓟꓲ ꓐꓬ ꓡꓰ ꓖꓴ=

ꓖꓳ ꓡꓰ ꓟꓲ ꓠꓯ ꓗꓪ ꓟ ꓢꓯꓼ ꓫꓵꓽ ꓢꓯꓼ ꓙꓵꓽ ꓐꓰ ꓬꓳ ꓫꓵꓽ ꓬꓳ ꓙꓵꓽ ꓐꓴ ꓐꓬ ꓡꓰ ꓟ ꓕꓲꓽ ꓡꓰꓼ ꓟꓶꓽ ꓘꓳꓼ ꓥꓹˍ ꓟꓲ ꓒꓳꓹ ꓡꓶꓹ ꓡ ꓢꓲꓹ-ꓸ ꓞ ꓢꓯꓼ ꓟꓬꓽ ꓡ ꓔꓯꓽ  ꓟꓲ ꓠꓯ ꓡꓽ ꓞꓳ ꓐꓴ ꓐꓱ ꓶꓽ ꓢꓯꓹ ꓔꓬ ꓫꓸ ꓓꓴ ꓔꓳꓸ ꓜꓳꓽ ꓡ ꓥꓳ=

ꓚꓰꓼ ꓔꓸ ꓟ  ꓟꓲ ꓠꓯ ꓕꓱ ꓟ ꓔꓯꓸ ꓐꓬ ꓡꓰ ꓝꓲ ꓢꓴ ꓠꓬ ꓡꓽ ꓞꓳ ꓥ ꓡꓳ= ꓝꓮꓲꓸ ꓫꓯꓸ ꓔꓱꓼ ꓠꓸ ꓟ ꓥꓸˍ ꓟꓲ  ꓣꓳꓽ ꓐꓴ ꓥ ꓡꓳ=

ꓖꓳ ꓟ ꓪꓴꓸ ꓠꓬꓲ ꓣꓳꓽ ꓤꓽ ꓣꓳ ꓠꓱꓽ ꓐꓴ ꓕꓲꓽ ꓜꓶ ꓗꓪ ꓗꓹ ꓛꓲꓽ ꓔꓬ_ ꓢ ꓠꓹ ꓟ ꓠꓬꓲꓸ ꓠꓬꓲ ꓟ ꓣꓳꓽ ꓐꓴ ꓠꓯꓹˍꓗꓪ ꓶ ꓡꓯꓼ ꓙꓳ ꓔꓬ ꓡꓳ=
 

.
Reference : https://www.conserve-energy-future.com/top-25-environmental…