ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓔꓯ ꓫꓬꓹ ꓓ ꓡꓰ ꓟ

ꓢꓲ ꓒ ꓠꓯꓸꓼ ꓗꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬ ꓤ ꓐꓴꓳ꓾ ꓮ ꓙꓵꓽ ꓔꓯ ꓧꓪꓸ ꓧꓪꓸꓼ= ꓠꓬꓲꓸ ꓠꓬꓲ ꓵ ꓠꓹ ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ-ꓕꓲ 9ꓽ1-8 ꓥ ꓡꓳ= ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓡ ꓞꓳ ꓕꓲ ꓜꓴ ꓠꓬ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓕꓲ ꓣꓳ ꓔꓯ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓑꓱꓸ ꓔꓯꓹ ꓡ ꓟ ꓟꓸ ꓟꓲꓽ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓙꓵꓻ ꓠꓲꓹ ꓔꓯ ꓟꓳˍ ꓕꓯ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓖꓳ ꓕꓲ ꓣꓳ ꓔꓯ ꓕꓽ ꓙꓳꓺ ꓮ ꓐꓲꓳ ꓠꓲꓹ ꓪꓴꓽ ꓪꓴꓽ ꓡꓰꓽ ꓔꓬ ꓐꓯ ꓢꓲ꓾ ꓬꓲ ꓝꓴꓲꓸ ꓔꓯ ꓖꓽ ꓖꓶ ꓢꓲ ꓠꓬꓲ ꓬꓲ ꓔꓯ ꓠꓻ ꓫꓬꓹ ꓖꓶˍ ꓟ ꓟꓸ ꓟꓲꓽ ꓥ ꓡꓳ=

ꓖꓳ ꓟ ꓔꓯ ꓒ-ꓡꓲ-ꓢꓷ ꓐꓴ ꓟꓳˍ ꓕꓯ ꓡ ꓞꓳ ꓕꓲ ꓣꓳ ꓠꓬ ꓬꓲ ꓝꓴꓲꓸ ꓔꓯ ꓖꓽ ꓖꓶˍ ꓡꓳ꓾ ꓐꓰ ꓮ ꓫꓵꓽ ꓪꓴꓸ ꓠꓬꓲ ꓐꓯˍ ꓡ= ꓕꓱ ꓟ ꓠꓬ ꓐꓯ ꓟꓽ ꓚꓰꓼ ꓟ ꓥꓳ꓾ ꓐꓰ ꓐꓯ ꓢꓲ ꓢꓲ ꓒ ꓬꓰ-ꓢꓴ ꓔꓯ ꓫꓸ ꓝꓲꓸ ꓠꓲꓹ ꓫꓵˍ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓬꓲ ꓪ ꓠꓲꓹ ꓜꓳˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓡ-ꓞꓳ-ꓮ-ꓐꓲ ꓠꓬ ꓝꓴꓲꓸ ꓔꓯ ꓖꓽ ꓖꓶ ꓐ ꓡˍ ꓟ ꓔꓯ ꓠꓴ ꓪ ꓢꓷꓸ ꓠꓹ ꓟ ꓐꓱ ꓶ ꓐꓯ ꓢꓲ ꓬꓲ ꓠꓬ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓖꓳ ꓕꓲ ꓣꓳ ꓔꓯ ꓮ ꓟꓲꓸ ꓔꓴ꓾ ꓠꓴ ꓬꓲꓼ ꓖꓴ ꓑꓱꓸ ꓢꓲ ꓠꓴ ꓦꓲꓻ ꓗꓪ ꓬꓲꓼ ꓙꓰ꓾ ꓐꓰ ꓐꓯ ꓖꓶˍ ꓕꓯ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓖꓳ ꓕꓲ ꓣꓳ ꓠꓬ ꓞꓼ ꓐꓰ ꓔꓴ ꓡ ꓢꓲ ꓬꓲ ꓬꓲꓼ ꓔ ꓖꓴ ꓔꓯ ꓡꓲꓺ ꓗꓷ ꓢꓲ ꓑꓱꓸ ꓙꓰꓳ꓾ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓡꓳ=

ꓢꓲꓽ ꓫꓬ ꓕꓳ ꓶ ꓕꓱ ꓟ ꓔꓯ ꓡꓳꓸ ꓠꓬꓲˍ ꓕꓯ ꓬꓲ ꓪꓴꓸ ꓕꓲꓽ ꓠꓬ꓾ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓔꓯ ꓠꓱꓸ ꓐꓯ ꓢꓴ ꓡꓰ ꓑꓱꓸ ꓔꓯꓹ ꓖꓶ ꓡˍ ꓟ ꓔꓯ ꓣꓳ ꓡꓳꓸ ꓠꓬꓲ ꓡꓯ= ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓠꓬ ꓮ ꓫꓵꓽ ꓬꓰ ꓟꓽ ꓐ ꓡ= ꓬꓲ ꓚꓲꓸ ꓛꓬ ꓬꓲ ꓙꓵꓻˍ ꓥ ꓟꓲ꓾ ꓬꓰ-ꓢꓴ ꓔꓯ ꓙꓵˍ ꓡꓳ ꓐꓰ ꓬꓲ ꓐꓯ ꓥ ꓟꓲ ꓾ ꓬꓲ ꓠꓬ ꓬꓲ ꓖꓳ ꓓꓱꓽ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓙꓰ ꓟꓽ ꓐ ꓡ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓔꓯ ꓑꓱꓸ ꓔꓯꓹ ꓙꓰ ꓢꓴ꓾ ꓬꓲ ꓔꓯ ꓫꓱꓸ ꓤ ꓢꓴ ꓣꓱꓽ ꓞꓹ ꓡꓳ=ꓖꓳ ꓡꓱ ꓠꓬꓲ ꓬꓲ ꓡꓰ ꓬꓲ ꓪ ꓔꓯ ꓘꓴ ꓓꓰꓽ ꓢꓲ ꓠꓬꓲ ꓬꓰ-ꓢꓴ ꓔꓬ ꓗꓪ ꓡ ꓛꓲꓺ ꓡ ꓟ ꓥ ꓡꓳ=

ꓣꓳ ꓤꓶꓻ ꓗꓪ ꓥˍ ꓟꓲ ꓕꓲ ꓖ ꓕꓲ ꓧꓪꓹ ꓣꓳ ꓚꓲꓸ ꓛꓬ ꓪꓽ ꓘꓴˍ ꓟ ꓡꓰ꓾ ꓚꓲꓸ ꓛꓬ ꓢꓯꓼ ꓗꓪ ꓐꓰ ꓢꓯꓼ ꓕꓵꓼˍ ꓟ ꓡꓰꓽ ꓠꓬ ꓟꓽ ꓡꓳꓼ ꓟˍ ꓟꓲ ꓙꓳˍ ꓡꓳ= ꓣꓳ ꓗꓳ ꓡꓳ꓾ ꓣꓳ ꓮꓽ ꓐ ꓮ ꓟ ꓐꓴ꓾ ꓣꓳ ꓫꓵꓽ ꓣꓳ ꓧꓪ ꓐꓴ꓾ ꓮꓽ ꓟˍ ꓟꓲ ꓪꓽ ꓟꓽ ꓘꓴ ꓙ ꓕꓯ ꓣꓳ ꓕꓲ ꓣꓳˍ ꓡꓰꓽ ꓪꓽ ꓘꓴˍ ꓕꓯ ꓠꓬ ꓒꓬꓱꓼ ꓡ ꓟꓽ ꓓ ꓟ ꓮ ꓟꓬꓹ ꓙꓳˍ ꓡꓳ=

ꓥ ꓡꓳ= ꓕꓲ ꓠꓬꓲ ꓕꓲ ꓠꓬꓲ ꓣꓳ ꓪꓽ ꓘꓴˍ ꓟ ꓪꓴ-ꓢ ꓔꓯ ꓛꓲ ꓪꓳ ꓡꓯꓼ ꓪꓳ ꓔ ꓠꓬ ꓧꓪꓸ ꓡꓰˍ ꓟ ꓮ ꓟꓬꓹ ꓙꓳˍ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓠꓱꓸ ꓐꓯ ꓢꓴ ꓡꓰ ꓟꓽ ꓬꓰ ꓙ ꓖꓶ ꓕꓯ꓾ ꓢꓴ ꓡꓰ ꓪꓽ ꓟꓽ ꓘꓴ ꓙ ꓖꓶ ꓕꓯ ꓣꓳ ꓬꓰ ꓟꓽ ꓐ ꓡ ꓟˍ ꓟꓲ ꓮ ꓟꓬꓹ ꓙꓳˍ ꓟ ꓔꓯ ꓥ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=

ꓕꓲ ꓖ ꓕꓲ ꓧꓪꓹ ꓣꓳ ꓠꓬ ꓛꓲ ꓫꓵꓻ ꓡꓯꓼ ꓫꓵꓻ ꓔꓬ ꓟˍ ꓡꓰ ꓐꓰ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓟ꓾ ꓮ ꓡꓲ ꓓꓵꓽ ꓙˍ ꓟꓲ ꓓꓵꓽ ꓙ ꓟꓽ ꓗꓳꓸ ꓙꓰ ꓟ ꓦꓬꓼ ꓠꓬꓲˍ ꓟꓲ ꓙꓳˍ ꓡꓳ= ꓦꓬꓼ ꓠꓬꓲ ꓕꓱ ꓟ ꓗꓪ ꓠꓬ ꓠꓬꓲ ꓟꓳꓻ ꓓꓴ ꓡꓬꓸ ꓖꓶ ꓢꓴ꓾ ꓠꓲꓹ ꓟ ꓗꓴ ꓖꓶ ꓢꓴ꓾ ꓪꓽ ꓘꓴ ꓙ ꓢꓴ ꓣꓱꓽ ꓞꓹ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓠꓬ ꓬꓲ ꓔꓯ ꓬꓰ ꓙ ꓢꓴ꓾ ꓫꓱꓸ ꓤ ꓢꓴ ꓙꓳˍ ꓟ ꓑꓶꓸ ꓓꓴ ꓬꓲ ꓠꓬ ꓬꓲ ꓛꓲ ꓒꓯꓹ ꓡꓯꓽ ꓡꓯꓹ ꓓꓻ ꓡꓰˍ ꓟ꓾ ꓙ ꓖꓴ ꓫꓱꓽ ꓐ ꓡˍ ꓟ ꓟꓸ ꓟꓲꓽ ꓣꓳ ꓑ ꓙꓽˍ ꓟ ꓥ ꓡꓳ=

ꓠꓬꓲꓽ ꓙꓰꓽ ꓕꓲ ꓙꓰꓽ ꓓꓵꓽ ꓙ ꓓꓴ ꓠꓬ꓾ ꓢꓲ ꓒ ꓬꓰ-ꓢꓴ ꓬꓲ ꓪ ꓔꓯ ꓟꓳ ꓡꓰˍ ꓕꓯ ꓡꓰ ꓬꓲ ꓪ ꓙꓵꓻ ꓠꓲꓹ ꓔꓯ ꓧꓶꓸ ꓕꓯ ꓟꓳꓻˍ ꓡꓳ꓾ ꓐꓰ ꓐꓯ ꓡꓳ= ꓠꓴ ꓮꓽ ꓟ ꓥ ꓡ= ꓮ ꓡꓰ ꓗꓪ ꓔꓬ ꓡ= ꓮ ꓫꓵꓽ ꓪꓴꓸ ꓠꓬꓲ ꓕꓱ ꓗꓪ ꓡˍ ꓡ꓾ ꓐꓰ ꓬꓲ ꓟꓽ ꓠ ꓠꓬꓲ= ꓬꓲ ꓔꓯ ꓟꓳ ꓡꓰˍ ꓕꓯ ꓡꓰ ꓕꓱ ꓕꓲ ꓧꓳꓽ ꓠꓬ ꓙꓵꓻ ꓠꓲꓹ ꓙꓳˍ ꓡꓳ ꓐꓯ ꓟ ꓔꓯ ꓬꓲ ꓢꓷꓸˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ= ꓬꓲ ꓪ ꓠꓬ ꓥꓪ ꓠꓴꓽ ꓠꓬ ꓟꓽ ꓐ ꓡꓺꓳ꓾ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓕꓱ ꓕꓲ ꓣꓳ ꓔꓯ ꓥꓪ ꓠꓴꓽ ꓫꓬꓹ ꓓꓻ ꓡꓰ ꓟꓽ ꓘꓴꓳ꓾ ꓚꓬꓴꓸ ꓙ ꓢꓴ ꓕꓲ ꓣꓳ ꓣꓱꓽ ꓞꓹ ꓡꓳ ꓐꓯ ꓢꓲ ꓬꓲ ꓪ ꓠꓬ ꓙꓵꓻ ꓠꓲꓹ ꓡꓰ ꓬꓰ-ꓢꓴ ꓔꓬ ꓗꓪ ꓡˍ ꓟ ꓔꓯ ꓢꓲ ꓒ ꓬꓰ-ꓢꓴ ꓟꓳꓻˍ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓙꓵꓻ ꓠꓲꓹ ꓔꓯ ꓧꓶꓸ ꓕꓯ ꓟꓳˍ ꓟ ꓑꓶꓸ ꓓꓴ ꓫꓬꓹ ꓖꓶˍ ꓡꓳ=

ꓣꓳ ꓥˍ ꓟꓲ ꓪꓴ-ꓢ ꓔꓯ ꓘꓴ ꓓꓰꓽˍ ꓕꓯ ꓣꓳ ꓙꓵꓻ ꓠꓲꓹ ꓔꓯ ꓟꓳꓸ ꓖꓶ ꓔꓬ ꓡ= ꓣꓳ ꓙꓵꓻ ꓠꓲꓹ ꓕꓱ ꓟ ꓢꓲ ꓒ ꓬꓰ-ꓢꓴ ꓟꓳˍ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓠ ꓗꓹ ꓡꓳ= ꓣꓳ ꓙꓵꓻˍ ꓟ ꓡꓰ ꓣꓳ ꓟꓳꓸ ꓖꓶ ꓔꓬ ꓡ= ꓢꓲꓽ ꓫꓬ ꓕꓳ ꓶ ꓗꓪ ꓡ ꓞꓳ ꓕꓲ ꓧꓳꓽ ꓠꓬ ꓬꓲ ꓪ ꓙꓵꓻˍ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓔꓬ ꓗꓪ ꓡ ꓢꓲ ꓠꓬꓲ ꓫꓸ ꓙꓵ ꓜꓲꓽ ꓢꓲ ꓡˍ ꓟ ꓔꓯ ꓢꓲ ꓒ ꓬꓰ-ꓢꓴ ꓟꓳˍ ꓡꓳ= ꓣꓳ ꓥ ꓟꓲ ꓪꓴ-ꓢ ꓔꓯ ꓙꓵˍ ꓡꓳ ꓐꓰ ꓐꓯ ꓢꓲ ꓣꓳ ꓙꓵꓻ ꓠꓲꓹ ꓔꓯ ꓟꓽ ꓟꓳꓸ ꓖꓶ꓾ ꓠꓲꓹ ꓟ ꓘꓴꓽ ꓗꓪ ꓡꓰꓽ ꓗꓶ ꓔ ꓢꓲ ꓠꓬꓲ ꓙꓵꓻˍ ꓟ ꓡꓰ ꓐꓰ ꓟꓽ ꓛꓳ ꓫꓱꓽ ꓥꓳ ꓐꓯ ꓠꓬ ꓣꓳ ꓣꓱꓽ ꓛꓰꓽ ꓟꓽ ꓟꓶ ꓐꓯ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓖꓶ ꓡ ꓔꓬ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓙꓵꓻ ꓠꓲꓹ ꓔꓯ ꓟꓳꓻ ꓢꓲ ꓠꓬꓲ ꓬꓲ ꓪ ꓙꓵꓻ ꓠꓲꓹ ꓔꓯ ꓡꓳꓸ ꓢꓲ ꓠꓬꓲ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓔꓯ ꓠꓻ ꓫꓬꓹ ꓖꓶˍ ꓡꓳ=

ꓝꓮꓲ ꓢ ꓙꓰꓽ ꓕꓲ ꓙꓰꓽ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓙꓵꓻ ꓠꓲꓹ ꓔꓯ ꓡꓳꓸ ꓗꓷ ꓗ ꓠꓯꓸ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓔꓯ ꓠꓴ ꓝꓴꓲꓸ ꓮ ꓙꓵꓽ ꓠꓬ ꓖꓽ ꓖꓶ ꓗꓷꓳ꓾ ꓐꓰ ꓐꓯ ꓖꓶˍ ꓡꓳ= ꓞꓳ ꓤ ꓠꓻˍ ꓟ ꓐꓰ ꓝꓴꓲꓸ ꓖꓽ ꓖꓶˍ ꓟ ꓠꓬ ꓮ ꓫꓵꓽ ꓗꓴꓸ ꓙꓲꓽ ꓙꓳˍ ꓡ꓾ ꓐꓰ ꓣꓳ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓟꓬꓽ ꓠꓬꓲ ꓣꓳ ꓠꓻˍ ꓟ ꓠꓬ ꓣꓳ ꓝꓴꓲꓸ ꓗꓪ ꓐꓰ ꓥ ꓡꓳ= ꓝꓴꓲꓸ ꓙꓳˍ ꓟ ꓑꓶꓸ ꓓꓴ ꓠꓻˍ ꓟ ꓟꓬꓽˍ ꓡꓳ= ꓮ ꓡꓲ ꓥ ꓡ= ꓔꓯ ꓥꓳꓽ ꓐꓯ ꓠꓬ ꓪꓴ-ꓢ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓔꓯ ꓙꓲˍ ꓟ ꓡꓰ ꓚꓰꓼ ꓔ ꓡꓳ= ꓙꓲˍ ꓟ ꓜꓽ ꓫꓵꓽ꓾ ꓙꓲˍ ꓟ ꓜꓽ ꓓꓴ꓾ ꓣꓳ ꓧꓪꓽ ꓖꓳ ꓓꓱꓽ ꓗꓪ ꓬꓲ ꓡꓰ ꓶꓼ ꓙꓳ ꓫꓱꓹ ꓙꓳˍ ꓟ ꓮ ꓟꓬꓹ ꓖꓶ ꓔ ꓡꓳ= ꓖꓳ ꓡꓱ ꓥ ꓟꓲ ꓣꓳ ꓠꓬ ꓣꓳ ꓜꓽ ꓟꓽ ꓓ ꓟ ꓜꓽˍ ꓕꓯ꓾ ꓜꓽ ꓟꓽ ꓒꓰꓸ ꓜꓽ ꓟꓽ ꓕꓽ ꓟ ꓜꓽˍ ꓕꓯ ꓠꓻ ꓠꓷꓼ ꓡꓰˍ ꓟ ꓙꓳˍ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓟꓬꓽ ꓠꓬꓲ ꓠꓬ ꓝꓴꓲꓸ ꓗꓪ ꓐꓰ ꓠꓲꓹ ꓟ ꓠꓯꓸꓼ ꓗꓪ ꓦꓯꓸ ꓠꓲꓹ ꓙꓵꓽˍ ꓟ꓾ ꓦꓶꓻ ꓠꓲꓹ ꓙꓳˍ ꓟ꓾ ꓠꓲꓹ ꓟ ꓠꓯꓸꓼ ꓗꓪ ꓮ ꓕꓯ ꓥ ꓟꓲ ꓠꓲꓹ ꓢꓲꓼˍ ꓟ ꓡꓰꓽ ꓐꓲ ꓓꓹ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓥ ꓟꓲ ꓢꓯꓼ ꓐꓽ ꓡꓰˍ ꓟ꓾ ꓟꓽ ꓠꓽ ꓠꓽ ꓠꓻˍ ꓟ꓾ ꓠꓲꓹ ꓟ ꓠꓯꓸꓼ ꓗꓪ ꓠꓵꓻ ꓠꓲꓹ ꓟꓽ ꓙꓳ ꓕꓯ ꓖꓳ ꓓꓱꓽ ꓔꓬꓹ ꓟꓽ ꓢ ꓗꓷ ꓡꓰˍ ꓟ ꓙꓳˍ ꓡꓳ=

ꓖꓳ ꓡꓱ ꓠꓬꓲ ꓟꓬꓽ ꓠꓬꓲ ꓠꓻ ꓒꓬꓽˍ ꓟ ꓠꓬ ꓝꓴꓲꓸ ꓪꓴꓸ ꓠꓬꓲ ꓥꓳ= ꓕꓱ ꓟ ꓔꓯ ꓢꓲ ꓒ ꓬꓰ-ꓢꓴ ꓢꓷꓸˍ ꓟ ꓑꓶꓸ ꓓꓴ ꓬꓲ ꓠꓬ ꓠꓴ ꓝꓴꓲꓸ ꓔꓯ ꓖꓽ ꓖꓶ ꓗꓷꓳ꓾ ꓐꓰ ꓧꓶꓸ ꓕꓯ ꓐꓯ ꓖꓶˍ ꓡꓳ= ꓖꓳ ꓗ ꓠꓯꓸ ꓬꓲ ꓠꓬ ꓠꓻ ꓫꓬꓹ ꓖꓶˍ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓥ ꓟꓲ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓕꓯ ꓣꓳ ꓧꓪꓽ ꓖꓳ ꓓꓱꓽ ꓔꓯ ꓚꓵ ꓚꓵ ꓠꓲꓹ ꓠꓵ ꓔꓬ ꓡ= ꓢꓲ ꓒ ꓬꓰ-ꓢꓴ ꓠꓲꓹ ꓠꓵˍ ꓟ ꓡꓰ ꓐꓰ ꓚꓲꓸ ꓛꓬ ꓚꓳ ꓚꓲꓸ ꓛꓬ ꓠꓲꓹ ꓠꓵ ꓔꓬ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓓꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓴꓲꓸ ꓔꓯ ꓖꓽ ꓖꓶ ꓗꓷꓳ ꓐꓰ ꓐꓯ ꓕꓯ ꓒ-ꓡꓲ-ꓢꓷ ꓐꓴ ꓠꓬ ꓓꓵꓽ ꓙ ꓟꓶˍ ꓡꓳ= “ꓪꓴ-ꓢ ꓕꓲ ꓣꓳˍ ꓡꓰꓽ ꓝꓴꓲꓸ ꓖꓽ ꓖꓶ ꓐ ꓡˍ ꓡꓳ” ꓐꓰ ꓓꓵꓽ ꓙˍ ꓡꓳ= ꓬꓲ ꓓꓵꓽ ꓙˍ ꓟ ꓠꓬ ꓜꓳꓽˍ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓥ ꓡꓳ ꓐꓯ ꓟ ꓔꓯ ꓬꓲ ꓪ ꓟꓽ ꓙꓵꓻ= ꓮ ꓫꓵꓽ ꓑꓶꓸ ꓓꓴ ꓥ ꓡ= ꓣꓳ ꓠꓬ ꓣꓳ ꓔꓯ ꓛꓬꓻ ꓡ ꓢꓴ ꓔꓯ ꓠꓬ ꓝꓴꓲꓸ ꓖꓽ ꓖꓶ ꓐ ꓡˍ ꓡꓳ=  ꓖꓳ ꓡꓱ ꓥˍ ꓟꓲ ꓣꓳ ꓔꓯ ꓛꓬ ꓡˍ ꓟ ꓟꓽ ꓥ ꓥ꓾ ꓠꓱꓸ ꓐꓯ ꓕꓲ ꓣꓳ ꓔꓯ ꓛꓬꓻ ꓗꓷ ꓟ ꓔꓯ ꓣꓳ ꓖꓽ ꓖꓶ ꓟꓽ ꓐ ꓡ= ꓖꓳ ꓡꓱ ꓖꓽ ꓖꓶ ꓠꓹ ꓟ ꓣꓳ ꓔꓯ ꓙꓵꓽ ꓪ ꓟꓽ ꓙꓳ= ꓣꓳ ꓔꓯ ꓛꓬꓻ ꓗꓷ ꓢꓴ ꓔꓯ ꓣꓳ ꓖꓽ ꓖꓶ ꓐ ꓡˍ ꓥ ꓟꓲ꓾ ꓣꓳ ꓐꓰ ꓗꓴꓸ ꓙꓲꓽ ꓟꓽ ꓙꓳ ꓟ ꓝꓴꓲꓸ ꓔꓯ ꓠꓬ ꓣꓳ ꓖꓽ ꓖꓶ ꓟꓽ ꓐ ꓡ=

ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓥ ꓟ ꓑꓶꓸ ꓓꓴ ꓮꓽ ꓟ ꓝꓴꓲꓸ ꓔꓯˍ ꓟꓲ ꓖꓽ ꓖꓶ ꓐ ꓡˍ ꓡꓳ= ꓕꓱ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓟꓳꓸ ꓖꓶˍ ꓡꓳ= ꓬꓲ ꓠꓬ ꓪꓴ-ꓢ ꓥ ꓡꓳ ꓐꓯ ꓟ ꓔꓯ ꓟꓳꓸ ꓖꓶˍ ꓡꓳ= ꓖꓳ ꓡꓱ ꓥ ꓟꓲ ꓒ-ꓡꓲ-ꓢꓷ ꓐꓴ ꓠꓬ ꓬꓲ ꓔꓯ ꓝꓴꓲꓸ ꓓꓰ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓥꓪ ꓠꓬ ꓮ ꓫꓵꓽ ꓔꓯˍ ꓟꓲ ꓬꓰ ꓐ ꓡˍ ꓟ꓾ ꓝꓴꓲꓸ ꓔꓯˍ ꓟꓲ ꓖꓽ ꓖꓶ ꓐ ꓡˍ ꓟ ꓠꓴ ꓪ ꓢꓷꓸ ꓠꓹ ꓟ ꓐꓱ ꓶ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓔꓯ “ꓔꓴ꓾ ꓠꓴ ꓬꓲꓼ ꓖꓴ ꓔꓯꓹ ꓔ ꓢꓲ ꓠꓬꓲ ꓦꓲ ꓗꓪ ꓬꓲꓼ ꓙꓰ” ꓐꓰ ꓐꓯ ꓖꓶˍ ꓡꓳ= ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓖꓳ ꓕꓲ ꓣꓳ ꓠꓬ ꓞꓼ ꓐꓰ ꓔꓴ ꓡ ꓢꓲ ꓬꓲ ꓦꓲ ꓗꓪ ꓬꓲꓼ ꓙꓰ ꓗꓷꓳ=

ꓢꓲꓽ ꓫꓬ ꓕꓳ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓝꓮꓲ ꓕꓲ ꓫꓵꓽ ꓐꓯ ꓟꓸ ꓖꓶ ꓡ ꓔꓬ ꓟ ꓠꓬ ꓣꓳ ꓔꓯ ꓙꓳˍ ꓟ ꓝꓴꓲꓸ ꓮ ꓙꓵꓽ ꓔꓯ ꓢꓲ ꓒ ꓬꓰ-ꓢꓴ ꓖꓽ ꓖꓶ ꓐ ꓡˍ ꓡꓳ= ꓬꓲ ꓔꓬ ꓗꓪ ꓙꓰ꓾ ꓐꓰ ꓐꓯ ꓖꓶ ꓡ ꓔꓬ ꓡꓳ= ꓬꓲ ꓠꓬ ꓣꓳ ꓔꓯ “ꓔꓴ꓾ ꓠꓴ ꓬꓲꓼ ꓔ ꓖꓴ ꓗꓪ ꓐꓰ ꓔꓴ ꓢꓲ ꓠꓬꓲ ꓚꓲꓸ ꓛꓬ ꓬꓰ ꓙꓲꓽ ꓙꓳˍ ꓟ ꓬꓰ” ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓣꓳ ꓠꓬ ꓝꓴꓲꓸ ꓠꓯꓸꓼ ꓗꓪ ꓔꓬ ꓕꓯ ꓛꓲ ꓫꓵꓻ ꓡꓯꓼ ꓫꓵꓻ ꓢꓴ ꓖꓳ ꓕꓲ ꓣꓳ ꓡꓰ ꓐꓰ ꓬꓲꓼ ꓔ ꓖꓴ ꓗꓪ ꓮ ꓕꓯ ꓟꓲ ꓓꓳꓽ ꓔꓬ ꓡꓳ= ꓬꓰ ꓙꓲꓽ ꓙꓳˍ ꓟ ꓬꓰ ꓟꓽ ꓐ ꓡ꓾ ꓬꓰ ꓙꓲꓽ ꓙꓳˍ ꓟ ꓔꓯ ꓬꓰ ꓟꓽ ꓑꓶꓸ꓾ ꓙꓳꓺ ꓛꓱꓽ ꓔꓬ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲ ꓒ ꓬꓰ-ꓢꓴ ꓠꓬ “ꓔꓴ ꓙꓰ ꓢꓲ ꓠꓬꓲ ꓠꓴ ꓬꓰ ꓠ ꓔ ꓟ ꓟꓬꓱꓽ ꓔꓯ ꓬꓰ” ꓐꓰ ꓣꓳ ꓔꓯ ꓐꓯ ꓖꓶ ꓔꓬ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓝꓴꓲꓸ ꓮ ꓙꓵꓽ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓬꓲ ꓫꓵꓽ ꓗꓪ ꓐꓰ ꓣꓳ ꓝꓴꓲꓸ ꓔꓯ ꓞꓲꓽ ꓫꓬ ꓡꓰ ꓝꓲ ꓗꓷꓳ= ꓠꓬꓲꓸ ꓠꓬꓲ ꓠꓴ ꓐꓰ ꓥꓪ ꓮ ꓙꓵꓽ ꓠꓬ ꓝꓴꓲꓸ ꓞꓲꓽ ꓫꓬ ꓟꓶ ꓡꓰ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓠꓯꓸꓼ ꓗꓪ ꓣꓳ ꓗꓹ ꓛꓲꓽ ꓛꓲꓽ ꓡꓰꓽ ꓛꓳ ꓙꓰ ꓐ ꓡˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓝꓴꓲꓸ ꓔꓯ ꓖꓽ ꓖꓶ ꓐ ꓡˍ ꓟ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓥ ꓟ “ꓔꓴ ꓚꓲꓸ ꓚꓬ ꓬꓲꓼ ꓖꓴ ꓑꓱꓸ ꓢꓲ ꓙ ꓖꓴ ꓫꓱꓽ ꓙꓰ” ꓐꓯ ꓟ ꓡꓰ ꓐꓰ ꓣꓳ ꓠꓬ ꓣꓳ ꓝꓴꓲꓸ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓡꓰꓹ ꓛꓳ ꓙꓰˍ ꓥꓳ ꓐꓯ ꓠꓬ ꓶꓼ ꓙꓳ ꓫꓱꓹ ꓙꓳˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=