ꓢꓲ ꓡꓲꓸ ꓗꓹ ꓛꓲꓽ ꓔꓬˍꓢ ꓟ ꓟꓶꓽ ꓘꓳꓼ ꓦꓬꓼ ꓠꓬꓲ ꓒꓬꓱꓼ ꓡꓰ ꓝꓲ˗ꓸ

ꓟꓵꓽ ꓗꓳꓹ ꓓꓵ ꓓꓵ ꓞꓸꓸ ꓢꓯꓼ ꓟꓬꓽ ꓡꓼ ꓟ˗ꓸ(Global Warming)

Global Warming ꓐꓯꓼ ꓟ ꓟꓵꓽ ꓗꓳꓹ ꓓꓵ ꓓꓵ ꓞꓸꓸ ꓢꓯꓼ ꓟꓬꓽ ꓡꓼ ꓟ ꓚꓱꓼ ꓔꓯꓸ ꓠꓬꓲꓹ ꓠꓬꓲ ꓢꓷꓸ ꓙ ꓟꓳ ꓙ ꓠꓲꓸ ꓫꓵꓼ ꓥꓳ˗ꓸ
ꓟꓵꓽ ꓗꓳꓹ ꓓꓵ ꓓꓵ ꓞꓸꓸ ꓢꓯꓼ ꓟꓬꓽ ꓡꓼ ꓟ ꓚꓱꓼ ꓗꓪ ꓠꓬ ꓬꓲꓸ ꓝꓲꓹ 3 ꓝꓲꓹ ꓒꓯꓽ ꓢꓲ ꓐꓯ ꓠꓲꓹ ꓫꓵˍ ꓡꓳ꓿
1ꓸ Global Warming ꓑꓶꓸ ꓓꓴ ꓔꓳꓼ ꓜꓳꓽ ꓡꓹ ꓟ ꓫꓸ ꓙꓵꓸꓸ ꓓꓴ˗ꓸ
2ꓸ Global Warming ꓒꓬꓱꓼ ꓔꓬ ꓟ ꓔꓯꓸ ꓮ ꓡꓰ ꓙꓽ ꓖꓶꓽ ꓫꓬꓼ ꓑꓱ ꓠꓯꓼ ꓟ˗ꓸ
3ꓸ Global Warming ꓑꓶꓸ ꓓꓴ ꓟꓲꓽ ꓙꓯꓽ ꓗꓪ ꓮ ꓡꓰ ꓔꓳꓼ ꓜꓳꓽ ꓡ ꓠꓯꓼ ꓟ ꓐꓰ ꓣꓳꓽ ꓫꓬꓹ ꓑꓱ ꓐꓭ ꓠꓬ ꓮ ꓡꓰ ꓐꓰ ꓙꓲ ꓖꓴ ꓙꓳˍꓟ˗ꓸ

1ꓸ Global Warming ꓑꓶꓸ ꓓꓴ ꓔꓳꓼ ꓜꓳꓽ ꓡꓹ ꓟ ꓫꓸ ꓙꓵꓸꓸ ꓓꓴ˗ꓸ
Global Warming ꓐꓯꓼ ꓟ ꓠꓬ ꓟꓲꓽ ꓦꓲ ꓢꓯꓼ ꓘꓴꓽ ꓗꓪ ꓟꓽ ꓙꓲˍ ꓟ Carbon Dioxide (CO2) ꓟꓲꓽ ꓦꓲ ꓢꓯꓼ ꓟꓬꓽ ꓡꓰˍꓟ ꓪꓴꓸ ꓠꓬꓲ ꓢꓯꓸ ꓫꓵꓽ ꓢꓯꓸ ꓙꓵ ꓐꓰ ꓢꓲꓼ ꓜꓲ ꓡꓳ ꓜꓲ ꓐꓴ ꓠꓯꓼ ꓗꓪ ꓔꓳꓹ ꓜꓳꓽ ꓡꓹ ꓟ ꓘꓶ ꓡꓶꓽ ꓓꓴ˗ꓸ ꓟꓲ ꓦꓲ ꓔꓱꓼ ꓥꓹ ꓟ Ozone ꓘꓴꓽ ꓗꓪ ꓟꓬꓽ ꓡꓰ ꓢꓲꓼ ꓟꓶꓽ ꓞꓸꓸ ꓢꓯꓼ ꓔꓯ ꓝꓰꓸꓸ ꓟꓽ ꓐ ꓡꓰ ꓢꓲꓼ ꓞ ꓢꓯꓼ ꓟꓬꓽ ꓡꓹ ꓟ ꓔꓯꓸ ꓐꓯˍ ꓟ ꓥ ꓡꓳ꓿
ꓖꓳ ꓡꓱ ꓥ,ˍ ꓠꓬ ꓮꓸ ꓫꓵꓸꓸ ꓪꓴꓸ Global Warming ꓐꓯꓸˍ ꓟ ꓒꓬꓱꓼ ꓡꓸ ꓡꓽ? ꓮꓽ ꓟ ꓑꓶꓸ ꓓꓴ ꓒꓬꓱꓽ ꓡꓸ ꓡꓽ?˗ꓸ
ꓚꓵꓸꓸ ꓚꓵꓸꓸ ꓠꓬ ꓟꓲ ꓠꓯ ꓡꓽ ꓞꓳ ꓐꓴ ꓠꓯꓸ ꓧꓯꓹ ꓙꓵꓽˍ ꓟ ꓪꓴꓸ ꓥ ꓡꓳ꓿ ꓢꓲꓼ ꓜꓲ ꓔꓯꓸ ꓬꓲꓸ ꓜꓶꓽ ꓟꓽ ꓙꓳ ꓘꓶ ꓔꓸ ꓟ ꓐꓰ ꓙꓼ ꓫꓵꓸꓸ ꓙꓼ ꓙꓵ ꓮꓽ ꓟꓬꓸ ꓣꓱꓽ ꓡꓼ ꓟ ꓪꓴꓸ ꓠꓬꓲ ꓥ ꓡꓳ꓿ Global Warming ꓑꓶꓸ ꓓꓴ ꓔꓳꓼ ꓜꓳꓽ ꓡꓹ ꓟ ꓫꓸ ꓙꓵꓸꓸ ꓓꓴ˗ꓸ ꓗꓪ ꓓꓽ ꓪꓴꓸ ꓠꓬ ꓙꓬ ꓟꓵꓽ ꓗꓪ ꓙꓳˍ ꓟ ꓪꓽ ꓥ ꓕ ꓑꓳꓸ ꓠꓬ ꓞ ꓢꓲꓼ ꓬꓲ˗ꓙꓬ ꓝꓮꓲ ꓒꓳꓼ ꓡꓰꓳ꓿ ꓖꓳ ꓟ ꓪꓴꓸ ꓠꓬꓲ ꓬꓲ˗ꓡꓵꓽ ꓐꓱ ꓠꓬ ꓟꓶꓸ ꓡ ꓢꓲꓼ ꓗꓴꓷꓼ ꓥ ꓕ ꓑꓳꓸ ꓗꓪ ꓬꓲ˗ꓙꓬ ꓙꓵꓽ ꓟꓶꓸ ꓡ ꓡꓳ˗ꓸ

2ꓸ Global Warming ꓒꓬꓱꓼ ꓔꓬ ꓟ ꓔꓯꓸ ꓮ ꓡꓲ ꓐꓰ ꓙꓽ ꓖꓶꓽ ꓫꓬꓼ ꓑꓱ ꓠꓯꓼ ꓟ˗ꓸ
ꓠꓬꓲꓹ ꓠꓬꓲ ꓣꓳ ꓗꓳ ꓡꓳ ꓗꓪ ꓙꓳˍꓟ ꓢꓲꓼ ꓜꓲ ꓡꓳ ꓜꓲ ꓔꓯꓸ ꓤ ꓟꓳ ꓢꓲꓸ ꓣꓱꓽ ꓠꓸꓸ ꓗꓹ ꓡꓳ˗ꓸ ꓖꓳ ꓟ ꓡꓰꓽ ꓐꓰ ꓣꓳꓽ ꓐ ꓡꓹˍꓟ ꓕꓲꓽ ꓒꓳꓸ ꓗꓪ ꓐꓰ ꓢꓲꓼ ꓜꓲ ꓡꓳ ꓜꓲ ꓔꓯꓸ ꓝꓮꓲ ꓔꓶ ꓛꓲˍꓥꓳ˗ꓸ ꓣꓳꓽ ꓣꓱꓽ ꓔꓬˍꓟ ꓣꓱꓽ ꓫꓵꓽ ꓥ ꓕ ꓑꓳꓸ ꓗꓪ ꓥꓼ ꓟꓲ ꓟꓶꓽ ꓘꓳꓼ ꓦꓬꓼ ꓠꓬꓲ ꓐꓰ ꓬꓲ˗ꓙꓬ ꓔꓯꓸ ꓢꓲꓽ ꓫꓬ ꓡꓰ ꓠꓼ ꓟ ꓤ ꓟꓳ ꓢꓲꓹ ꓣꓱꓽ ꓠꓸꓸ ꓗꓹ ꓡꓳ˗ꓸ

ꓠꓲꓹ ꓠꓵˍꓟ ꓬꓲ ꓤꓼ ꓠꓬꓲ ꓤꓼ ꓐꓴꓳ ꓣꓳꓽ ꓢꓯꓸ ꓔꓬˍꓟ ꓤꓶ ꓦꓬꓼ ꓠꓬꓲ ꓗꓪ ꓣꓳꓽ ꓡꓰꓽ ꓙꓽ ꓖꓶꓽ ꓔꓸ ꓟ ꓟꓽ ꓙꓳ ꓐꓭ ꓠꓬ ꓛꓲ ꓡꓼˍꓟ ꓤꓶ ꓦꓬꓼ ꓠꓬꓲ ꓣꓳ ꓤ ꓣꓳ ꓠꓱ ꓐꓴ ꓠꓬ ꓮꓸ ꓘꓶꓸ ꓫꓹˍ ꓟ ꓦꓬꓼ ꓠꓬꓲ ꓔꓯꓸ ꓬꓲꓸ ꓪꓽ ꓔꓳꓹ ꓜꓳꓽ ꓡꓰ ꓥꓳ˗ꓸ ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓣꓳꓽ ꓐꓴ ꓤꓶ ꓦꓬꓼ ꓠꓬꓲ ꓗꓪ ꓐꓰ ꓙꓽ ꓖꓶꓽ ꓠꓼ ꓟ ꓠꓬ ꓠꓴ ꓥꓪ ꓡꓯꓼ ꓒꓯꓸ ꓗꓪ ꓙꓵꓽ ꓪꓽ ꓐꓰ ꓬꓲ ꓙꓵꓽ ꓙꓳˍ ꓡꓳ꓿
ꓢꓲ ꓡꓲꓹ ꓗꓸ ꓛꓲˍ ꓟ ꓟꓶꓽ ꓘꓳꓼ ꓠꓬꓲ ꓐꓰ ꓔꓬˍ ꓢ ꓟ ꓤꓶ ꓔꓯꓸ ꓣꓳꓽ ꓐꓴ ꓙꓽ ꓖꓶꓽ ꓓꓴ ꓬꓰ ꓡꓯ˗ꓸ ꓕꓱ ꓟ ꓠꓬ ꓟ ꓚꓰꓼ ꓢꓴ ꓢꓲ˗ꓒ ꓥꓼˍ ꓟꓲ ꓠꓲꓹ ꓡꓱˍ ꓟ ꓟꓬꓱꓽ ꓥ ꓐꓭ ꓥꓳ꓿

Source: Internet