ꓚꓳ ꓑꓸ ꓐꓴ ꓔꓯ ꓒꓴ ꓡꓯꓼ ꓙꓱ_ ꓟ ꓔꓯ ꓥꓳꓽ

Wednesday, November 18, 2020

ꓡꓴ-ꓘ ꓕꓳꓽ ꓶ 19: 11-28

ꓞꓳ ꓜꓴ ꓠꓬ ꓕꓱ ꓟꓬ ꓫꓵꓽ ꓠ ꓠꓹ ꓔꓬ_ ꓕꓯ꓾ ꓙꓱ-ꓣꓴ-ꓢ-ꓡꓱ ꓒ ꓕꓲꓸꓼ ꓗꓪ ꓛꓲ ꓬꓰ ꓠꓬꓲ꓾ ꓝꓮꓲ ꓠꓬ ꓪꓴ-ꓢ ꓗꓴꓷ ꓮ ꓟꓶ ꓞꓼ ꓐꓰ ꓓꓳ ꓡ_ ꓥꓳ꓾ ꓐꓰ ꓬꓲ ꓪ ꓓꓵ ꓙ_ ꓟ ꓪꓴꓸ ꓠꓬꓲ꓾ ꓬꓰ-ꓢꓴ ꓠꓬ ꓔꓯꓺ ꓥꓳ ꓬꓲ ꓔꓱꓺ ꓬꓲ ꓕꓲ ꓫꓵꓽ ꓕꓱ ꓡꓱ ꓐꓯ ꓟꓸ ꓖꓶ_ ꓡꓳ꓿ ꓒꓵꓽ_ ꓟ ꓢꓲꓽ ꓒ ꓕꓲ ꓣꓳ ꓠꓬ꓾ ꓬꓲ ꓚꓲ ꓛꓬ ꓐꓱ ꓶ ꓗꓴꓷꓼ ꓕꓲ ꓟ ꓟꓶ ꓡꓰ ꓢꓲ ꓬꓲꓼ ꓡ ꓠꓹ ꓟ꓾ ꓶꓽ_ ꓟ ꓟꓵꓽ ꓗꓪ ꓙꓰ_ ꓡꓳ꓿ ꓖꓳ ꓡꓱ ꓢꓲ ꓬꓲ ꓚꓳ ꓑ ꓞꓲꓻ ꓣꓳ ꓘꓴ ꓔꓯꓹ ꓡ ꓢꓲ꓾ ꓬꓲ ꓪ ꓔꓯ ꓒꓴ ꓞꓲꓻ ꓟꓲ-ꓠ ꓖꓶ ꓢꓲ ꓠꓬꓲ꓾ ꓬꓲ ꓪ ꓔꓯ꓾ ꓥꓪ ꓟꓽ ꓬꓲꓼ ꓡ ꓕ ꓑꓳ ꓶꓻ ꓡꓯꓼ ꓟꓴ꓾ ꓐꓯ ꓖꓶ_ ꓡꓳ꓿ ꓬꓲ ꓚꓲ ꓛꓬ ꓑ ꓫꓬ ꓐꓴ ꓠꓽ ꓬꓲ ꓔꓯ ꓠꓲꓹ ꓜꓳ ꓢꓲ꓾ ꓗ ꓠꓯ ꓢꓲ ꓗꓪ ꓝꓲ ꓓꓴ ꓕꓲ ꓧꓳꓽ ꓝꓲ ꓩꓴ ꓗꓷ ꓢꓲ ꓠꓬꓲ꓾ ꓥꓪ ꓠꓴꓽ ꓠꓬ ꓡ ꓞꓳ ꓕꓱ ꓕꓲ ꓣꓳ ꓔꓯ꓾ ꓥꓪ ꓠꓴꓽ ꓪ ꓔꓲ ꓣꓱꓽ ꓝꓲ ꓠꓲꓹ ꓟꓽ ꓫꓵ꓾ ꓐꓯ_ ꓡꓳ꓿ ꓬꓲ ꓗꓴꓷꓼ ꓟꓶ ꓡꓰ ꓢꓲ ꓬꓲꓼ ꓡ_ ꓕꓯ꓾ ꓶꓻ ꓡꓯ ꓟꓴ_ ꓟ ꓗꓪ ꓐꓰ ꓮ ꓟꓬ ꓛꓲ ꓒꓳꓹ ꓟꓶ_ ꓟ ꓢꓷ ꓡꓰ ꓠꓹ ꓟ꓾ ꓬꓲ ꓡꓰ ꓒꓴꓻ ꓡꓯꓼ ꓙꓱ ꓔ_ ꓟ ꓚꓳ ꓑ ꓐꓴ ꓔꓯ ꓘꓴ ꓔꓯꓹ ꓡ ꓝꓲ_ ꓡꓳ꓿ ꓬꓲ ꓪꓴꓸ ꓕꓲ ꓣꓳ ꓠꓬ ꓬꓲ ꓟꓲꓽ ꓙꓬ ꓗꓪ ꓡ ꓢꓲ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓠꓴ ꓒꓴꓻ ꓕꓲ ꓟꓲ-ꓠ ꓟ ꓠꓬ ꓝꓮꓲ ꓞꓲꓻ ꓟꓲ-ꓠ ꓒꓳꓹ ꓟꓶ ꓡꓰꓳ꓾ ꓐꓯ_ ꓡꓳ꓿ ꓬꓲ ꓡꓰ ꓬꓲ ꓔꓯ꓾ ꓙꓲ_ ꓥꓳ꓿ ꓙꓲ_ ꓟ ꓚꓳ ꓑ ꓠꓴ ꓠꓬ ꓮ ꓓꓲ ꓣꓳꓺ_ ꓟ ꓫꓵꓽ ꓪꓴ ꓗꓪ ꓦ ꓡꓱ ꓐꓳ_ ꓠꓬꓲ꓾ ꓠꓴ ꓔꓯ ꓡꓳ ꓒꓱ ꓞꓲꓻ ꓟ ꓙꓵꓽ ꓝꓲ_ ꓥꓳ꓾ ꓐꓯ_ ꓡꓳ꓿ ꓠꓬꓲꓽ ꓣꓳ ꓕꓲ ꓣꓳ ꓟ ꓡ ꓢꓲ꓾ ꓢꓲꓺ ꓒꓽꓳ꓾ ꓠꓴ ꓒꓴꓻ ꓕꓲ ꓟꓲ-ꓠ ꓟ ꓠꓬ ꓝꓮꓲ ꓥꓪꓽ ꓟꓲ-ꓠ ꓒꓳꓹ ꓟꓶ ꓡꓰꓳ꓾ ꓐꓯ_ ꓡꓳ꓿ ꓬꓲ ꓡꓰ ꓬꓲ ꓔꓯ꓾ ꓠꓴ ꓔꓯ_ ꓟꓲ ꓡꓳ ꓒꓱ ꓥꓪꓽ ꓟ ꓙꓵꓽ ꓝꓲ_ ꓥꓳ꓾ ꓐꓯ_ ꓡꓳ꓿ ꓝꓮꓲ ꓕꓲ ꓣꓳ ꓡ ꓢꓲ ꓬꓲ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓢꓲꓺ ꓒꓽꓳ꓾ ꓠꓬꓲ ꓠꓹ꓾ ꓠꓴ ꓒꓴꓻ ꓖꓳ ꓕꓲ ꓟꓲ-ꓠ ꓟ ꓠꓬ ꓕꓱ ꓗꓪ ꓓꓹ_ ꓢꓰꓽ ꓡꓳ꓿ ꓥꓪ ꓠꓽ ꓟꓶ ꓛ ꓡꓰ ꓕꓱꓹ ꓢꓲ ꓗꓶꓺ ꓔ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓠꓽ ꓞꓳ ꓦꓶꓻ ꓥ ꓠꓬꓲ꓾ ꓥꓪ ꓠꓴꓻ ꓔꓯ ꓙꓳꓺ_ ꓡꓳ꓿ ꓠꓴ ꓠꓽ ꓟꓽ ꓩꓴꓺ ꓔ ꓗꓪ_ ꓟꓲ ꓣꓴ ꓬꓰ_ ꓡꓳ꓿ ꓟꓽ ꓫꓵꓸ ꓔ ꓗꓪ_ ꓟꓲ ꓫꓺ ꓬꓰ_ ꓡꓳ꓾ ꓐꓯ_ ꓡꓳ꓿ ꓬꓲ ꓡꓰ ꓬꓲ ꓔꓯ꓾ ꓥꓶ_ ꓟ ꓚꓳ ꓑ ꓠꓴꓳ꓾ ꓠꓴ ꓚꓲ ꓛꓬ ꓟꓷ ꓠꓷꓹ ꓘꓶꓽ ꓗꓪ ꓐꓰ ꓥꓪ ꓠꓴ ꓔꓯ ꓐꓯ ꓟꓴ ꓞꓷꓹ_ ꓥꓳ꓿ ꓥꓪ ꓠꓽ ꓞꓳ ꓦꓶꓻ ꓥ ꓢꓲ꓾ ꓟꓽ ꓩꓴꓺ ꓔ ꓗꓪ_ ꓟꓲ ꓣꓴ ꓬꓰ ꓢꓲ ꓠꓬꓲ꓾ ꓟꓽ ꓫꓵꓸ ꓔ ꓗꓪ_ ꓟꓲ ꓫꓺ ꓬꓰ_ ꓟ ꓠꓴ ꓢꓷ_ ꓠꓬ꓾ ꓥꓪ ꓡ_ ꓕꓯ ꓒꓴ ꓬꓲ ꓗꓪꓺ ꓬꓲ ꓐꓶꓹ ꓕꓲ ꓛꓳ_ ꓐꓰ ꓟꓶ ꓠꓹ ꓟ꓾ ꓮ ꓫꓵꓽ ꓪꓴ ꓠꓬꓲ ꓥꓪ ꓒꓴꓻ ꓣꓴ ꓢꓲ ꓒꓴ ꓞꓳꓽ ꓦꓲ ꓗꓪ ꓟꓽ ꓩꓴ ꓔ_ ꓡꓳꓺꓽ꓾ ꓐꓯ_ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓖꓳ ꓗꓪ ꓦꓰꓼ ꓔꓬ ꓢꓴ ꓔꓯ꓾ ꓬꓲ ꓙꓳ_ ꓟ ꓒꓴ ꓕꓱ ꓕꓲ ꓟꓲ-ꓠ ꓟ ꓬꓲ ꓔꓯ ꓐꓰ ꓣꓴ ꓗꓷ ꓢꓲ꓾ ꓞꓲꓻ ꓟꓲ-ꓠ ꓙꓳ ꓢꓴ ꓖꓳ ꓕꓲ ꓣꓳ ꓔꓯ ꓖꓶ꓾ ꓐꓯ_ ꓡꓳ꓿ ꓬꓲ ꓪ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓬꓲ ꓔꓯ ꓞꓲꓻ ꓟꓲ-ꓠ ꓙꓳ_ ꓡꓳ꓾ ꓐꓯ_ ꓡꓳ꓿ ꓢꓲꓺ ꓒ ꓡꓰ꓾ ꓥꓪ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓙꓳꓻ ꓢꓴ ꓥ ꓕ ꓑꓳ ꓔꓯ ꓠꓬ ꓡꓴꓽ ꓖꓶ_ ꓥꓳ꓿ ꓟꓽ ꓙꓳ ꓢꓴ ꓔꓯ ꓠꓽ꓾ ꓬꓲ ꓙꓳ_ ꓟ_ ꓟꓲ ꓬꓲ ꓔꓯ ꓐꓰ ꓣꓴ ꓔꓯꓹ ꓙꓰ_ ꓥꓳ꓿ ꓥꓪ ꓔꓯ ꓬꓲ ꓪ ꓪ ꓔꓲ ꓣꓱꓽ ꓝꓲ ꓠꓲꓹ ꓟꓽ ꓫꓵ ꓟ꓾ ꓥꓪ ꓔꓯ ꓛꓴꓽ ꓙꓳ ꓢꓴ ꓕꓱ ꓕꓲ ꓧꓳꓽ ꓟ ꓔꓯ ꓖꓳꓻ ꓔꓯꓹ ꓡ ꓢꓲ꓾ ꓥꓪ ꓟꓲꓽ ꓙꓬ ꓗꓪ ꓢꓰꓼ ꓗꓷ ꓨ꓾ ꓐꓯ_ ꓡꓳ꓿ ꓬꓰ-ꓢꓴ ꓕꓱ ꓡꓱ ꓐꓯ ꓓꓳ ꓡꓰ ꓠꓬ꓾ ꓟꓲꓸ ꓙꓬ ꓙꓰ ꓢꓲ꓾ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ_ ꓡꓳ꓿