ꓶꓼ ꓘꓶꓽ ꓫꓱꓹ ꓘꓶꓽ

ꓠꓬꓲꓸ ꓠꓬꓲ ꓟ ꓢꓲ-ꓫꓬ ꓕꓳ ꓶ ꓝꓲꓼ

ꓶ ꓓꓳ ꓫꓱ. ꓓꓳ ꓟ-ꓕꓲ ꓕꓳꓽ ꓶ 5: 1-12

ꓬꓲ ꓠꓬ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓔꓯ ꓟꓳꓻ ꓢꓲ꓾ ꓪꓼ ꓚꓲ ꓗꓪ ꓓꓯ ꓙꓰ ꓢꓲ ꓠꓬꓲꓸ ꓠꓸ ꓗꓷ ꓠꓬ꓾ ꓬꓲ ꓛꓳ ꓒꓯ ꓐꓴ ꓬꓲ ꓔꓯ ꓡ_ ꓡꓳ꓿ ꓬꓲ ꓠꓬ ꓘꓶꓽ ꓒꓴ ꓢꓲ ꓬꓲ ꓪ ꓔꓯ ꓕꓱ ꓡꓱ ꓟꓸ ꓖꓶ_ ꓡꓳ꓾ ꓞꓳ ꓦ ꓫꓸ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓴꓷꓼ ꓠꓽ ꓬꓲ ꓪ ꓔꓯ ꓟ ꓥ ꓡꓳ꓿ ꓠꓲꓹ ꓥꓴꓻ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓲꓹ ꓗꓴ ꓟꓬ ꓗꓴ ꓟꓶ_ ꓥꓳ꓿ ꓠꓲꓹ ꓟ ꓠꓴꓽ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓟꓲ ꓠꓯ ꓟꓶ ꓡꓰ_ ꓥꓳ꓿ ꓙꓲ ꓫꓬ_ ꓟ ꓔꓯ ꓟꓷꓼ ꓢꓲꓼ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓒ ꓐꓳꓸꓼ ꓐꓰ ꓟꓶ_ ꓥꓳ꓿ ꓢꓴ ꓔꓯ ꓫꓱꓸ ꓤ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓫꓱ ꓤ_ ꓟ ꓟꓶ_ ꓥꓳ꓿ ꓠꓲꓹ ꓟ ꓢꓲꓽ ꓫꓬ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓪꓴ-ꓢ ꓔꓯ ꓟꓳꓻ ꓪ_ ꓥꓳ꓿ ꓢꓴ ꓔꓯ ꓕꓽ ꓡꓯ ꓘꓳ ꓝꓲ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓔꓯ ꓠꓽ ꓪꓴ-ꓢ ꓤ ꓠꓱ꓾ ꓐꓰ ꓘꓴꓻ_ ꓥꓳ꓿ ꓙꓲ ꓫꓬ_ ꓟ ꓪꓴꓸ ꓠꓬꓲ ꓗꓸ ꓧꓪ_ ꓟ ꓟꓶ ꓢꓴ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓴꓷ ꓠꓽ ꓬꓲ ꓪ ꓔꓯ ꓟ ꓥ ꓡꓳ꓿ ꓥꓪ ꓪꓴꓸ ꓠꓬꓲ ꓢꓴ ꓡꓰ ꓠꓴ ꓪ ꓔꓯ ꓫꓸ ꓚꓲ꓾ ꓠꓴ ꓪ ꓔꓯ ꓗꓸ ꓧꓪ꓾ ꓝꓮꓲ ꓠꓴ ꓪ ꓔꓯ ꓥꓶ_ ꓟ ꓬꓲ ꓫꓵ ꓬꓲ ꓙꓰ ꓮꓽ ꓔꓳ ꓔꓳ ꓫ ꓕꓱ ꓡ_ ꓕꓯ꓾ ꓠꓴ ꓪ ꓠꓽ ꓶꓼ ꓙꓳ ꓫꓱ ꓙꓳ_ ꓡꓳ꓿ ꓠꓴ ꓪ ꓠꓬ ꓗ ꓛꓲ ꓢꓲ ꓠꓲꓹ ꓒꓴ ꓔꓬ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓪ ꓠꓴ ꓪ ꓡꓯꓼ ꓫꓴ ꓠꓽ ꓬꓲ ꓓꓽ ꓟ ꓥ ꓡꓳ꓿ ꓠꓴ ꓪ ꓧꓶꓸ ꓕꓯ ꓗꓪ ꓟ ꓟꓷ ꓠꓷ ꓝꓸ ꓢꓴ ꓔꓯ_ ꓟꓲ ꓬꓲ ꓪ ꓕꓱ ꓡꓱ ꓗꓸ ꓧꓪ_ ꓡꓳ꓿

2 ꓘꓳ-ꓡꓱ-ꓕꓴ ꓕꓳꓽ ꓶ 1: 1-7

ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ꓾ ꓙꓲ-ꓢꓴ ꓬꓰ-ꓢꓴ ꓬꓲ ꓝꓲ ꓓꓴ ꓒꓳ-ꓡꓳ ꓥꓪ_ ꓐꓰ ꓣꓳꓽ ꓠꓬꓲ ꓤ ꓕꓲ-ꓟꓳ-ꓕꓲ-ꓪꓴꓽ ꓡꓰ꓾ ꓘꓳ-ꓡꓱ-ꓕꓴ ꓗꓪ ꓔꓬ_ ꓟ ꓪꓴ-ꓢ ꓘꓴ ꓜꓲꓼ ꓞꓳ_ ꓐꓰ꓾ ꓮ-ꓘꓷ-ꓬꓼ ꓕꓲ ꓟꓵꓽ ꓡꓱꓸꓼ ꓗꓪ ꓔꓬ_ ꓟ ꓢꓲꓽ ꓫꓬ ꓢꓴ ꓮ ꓙꓵ ꓔꓯ ꓕꓳ ꓶ ꓡꓯꓼ ꓫꓴ ꓐꓳ ꓖꓶ ꓩꓴ ꓡ_ ꓡꓳ꓿ 2 ꓣꓳ ꓐꓹ ꓐ ꓪꓴ-ꓢ_ ꓐꓰ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓔꓯ ꓐꓰ ꓣꓱ ꓛꓰ_ ꓐꓰ ꓢꓲꓺ ꓡꓲ ꓟ ꓠꓴ ꓪ ꓟꓶ ꓝꓲ꓿ 3 ꓣꓳ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓐꓹ ꓐ_ ꓐꓰ ꓬꓲ ꓪꓴ-ꓢ ꓠꓬ ꓶꓼ ꓙꓳ ꓫꓱꓹ ꓙꓳ_ ꓡꓳ꓿ ꓬꓲ ꓠꓬ ꓫꓱꓸ ꓤ ꓠꓲꓹ ꓙꓳ_ ꓟ ꓐꓹ ꓐ_ ꓐꓰ꓾ ꓠꓲꓹ ꓗꓴ ꓖꓶ_ ꓟ ꓥ ꓕ ꓑꓳ ꓖꓶ ꓢꓴ ꓪꓴ-ꓢ ꓥ ꓡꓳ꓿ 4 ꓪꓴ-ꓢ ꓡꓰ ꓣꓳꓽ ꓚꓲ ꓛꓬ ꓔꓯ ꓠꓲꓹ ꓗꓴ ꓖꓶ_ ꓟ ꓠꓲꓹ ꓗꓴ ꓖꓶ ꓓꓴ ꓗꓪ ꓐꓰ꓾ ꓮ ꓡꓲ ꓫꓵꓽ ꓫ ꓙꓵ_ ꓟ ꓙꓳꓻ ꓢꓴ ꓔꓯ_ ꓟꓲ ꓣꓳ ꓡꓰ ꓠꓲꓹ ꓗꓴ ꓖꓶ ꓐ ꓡ ꓠꓹ ꓟ꓾ ꓣꓳ ꓫꓸ ꓙꓵ_ ꓟ ꓮ ꓙꓵ ꓗꓪ ꓬꓲ ꓣꓳꓽ ꓔꓯ ꓠꓲꓹ ꓗꓴ ꓖꓶ_ ꓡꓳ꓿ 5 ꓙꓲ-ꓢꓴ ꓫꓸ ꓙꓵ_ ꓟ ꓔꓯ ꓣꓳ ꓪꓻ ꓜꓲ ꓑꓯꓹ ꓟꓶ_ ꓟ_ ꓡꓰ ꓐꓰ꓾ ꓙꓲ-ꓢꓴ ꓗꓪ ꓐꓰ ꓣꓳ ꓠꓲꓹ ꓗꓴ ꓖꓶ ꓓꓴ_ ꓟꓲ ꓪꓻ ꓜꓲ ꓑꓯꓹ ꓟꓶ_ ꓡꓳ꓿ 6 ꓥꓪ ꓠꓴꓽ ꓫ ꓙꓵ_ ꓥ_ ꓟꓲ꓾ ꓠꓴ ꓪ ꓔꓯ ꓠꓲꓹ ꓟ ꓗꓴ ꓖꓶ ꓠꓹ ꓟ_ ꓐꓰ ꓢꓯꓼ ꓟꓬ ꓝ ꓟꓶ ꓝꓲ ꓠꓹ ꓟ ꓥ ꓡꓳ꓿ ꓥꓪ ꓠꓴꓽ ꓠꓲꓹ ꓗꓴ ꓖꓶ ꓓꓴ ꓟꓶ_ ꓟꓲ꓾ ꓠꓴ ꓪ ꓔꓯ ꓠꓲꓹ ꓗꓴꓺ ꓖꓶ ꓓꓴ ꓟꓶ ꓝꓲ ꓠꓹ ꓟ ꓥ ꓡꓳ꓿ ꓠꓲꓹ ꓗꓴ ꓖꓶ ꓓꓴ ꓕꓱ ꓟ ꓠꓬ꓾ ꓥꓪ ꓠꓴꓽ_ ꓐꓰ ꓕꓲ ꓡꓰꓹꓼ ꓫ ꓙꓵ_ ꓟ ꓔꓯ ꓠꓴ ꓪ ꓜꓲꓽ ꓘꓴ ꓠꓹ ꓟ ꓥ ꓡꓳ꓿ 7 ꓥꓪ ꓠꓴꓽ ꓠꓬ ꓠꓴ ꓪ ꓐꓱ ꓶ ꓥꓳ ꓡꓳꓸ ꓔ_ ꓟ ꓠꓬ ꓕꓶꓻ ꓡꓰ_ ꓟ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓫ ꓙꓵ_ ꓟ ꓠꓴ ꓪ ꓑꓯꓹ ꓟꓶ_ ꓟ_ ꓡꓰ ꓐꓰ꓾ ꓠꓲꓹ ꓟ ꓗꓴ ꓖꓶ ꓓꓴ_ ꓟꓲ ꓑꓯꓹ ꓟꓶ_ ꓥꓳ꓾ ꓐꓰ ꓢꓷ_ ꓡꓳ꓿