ꓠꓲꓹ ꓟ ꓦꓶ ꓡꓯ ꓘꓳ ꓟꓽ ꓓ ꓟ

ꓠꓬꓲꓸ ꓠꓬꓲ ꓟ ꓢꓲ-ꓫꓬ ꓕꓳ ꓶ ꓝꓲꓼ

ꓶ ꓓꓳ ꓫꓱ. ꓓꓳ ꓟ_ꓕꓲ 5ꓽ20-26

ꓠꓴ ꓪ ꓔꓯ ꓥꓪ ꓐꓯ ꓖꓶ_ ꓠꓬꓲ-ꓸ ꓠꓴ ꓪ ꓠꓬ ꓙꓵꓽ ꓗ ꓟꓸ ꓒ ꓐꓴ_ ꓐꓰ ꓒ-ꓡꓲ-ꓢꓷ ꓐꓴ ꓙꓲ ꓫꓬ_ ꓟ ꓕꓯꓽ ꓢꓲ ꓟꓽ ꓙꓲ ꓫꓬ ꓕꓯ ꓠꓽ ꓮ ꓡꓲ ꓥ_ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓟꓽ ꓓ= ꓮꓽ ꓠꓱ ꓟ ꓡ ꓞꓳ ꓔꓯ-ꓸ ꓞꓳ ꓤ ꓢꓰꓼ ꓟꓽ ꓓ-ꓸ ꓐꓯ_ ꓟ_ ꓐꓰ-ꓸ ꓞꓳ ꓤ ꓢꓰꓼ ꓢꓴ ꓮꓽ ꓟ ꓥ_ ꓟꓲ ꓐꓯ ꓟꓴ ꓗꓪ ꓐꓰ ꓟꓽ ꓡꓲꓹ ꓗꓷ-ꓸ ꓐꓯ_ ꓟ ꓠꓴ ꓪ ꓑ ꓙꓽ ꓠꓬꓲꓳ= ꓖꓳ ꓡꓱ ꓥ_ ꓟꓲ ꓠꓴ ꓪ ꓔꓯ ꓥꓪ ꓐꓯ ꓖꓶ_ ꓠꓬꓲ-ꓸ ꓮꓽ ꓟ ꓥ_ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓕꓲ ꓣꓳ ꓔꓯ ꓠꓲꓹ ꓟ ꓦꓶ ꓢꓴ ꓠꓬ ꓕꓲ ꓣꓳ ꓔꓯ ꓟꓳꓸꓹ ꓟꓽ ꓟꓵ ꓢꓲ-ꓸ ꓠꓴ ꓠꓬ ꓢꓯꓸ ꓔꓬ_ ꓟꓲ ꓣꓱꓽ ꓬꓯꓼ ꓖꓴ ꓟꓽ ꓙꓳ-ꓸ ꓐꓯ ꓢꓴ_ ꓟꓲ ꓐꓯ ꓟꓴ ꓜꓲꓼ ꓓꓴ ꓓꓽ ꓟ ꓗꓪ ꓐꓰ ꓡꓲꓹ ꓗꓷ ꓟꓽ ꓓ= ꓮꓽ ꓟ ꓥ_ ꓟꓲ ꓬꓲ ꓬꓲꓼ ꓬꓲ ꓠꓬꓲ ꓕꓲ ꓣꓳ ꓔꓯ ꓑꓱꓹ ꓢꓲ-ꓸ ꓞꓳ ꓟꓶꓸꓹ ꓠꓴ-ꓸ ꓐꓯ ꓢꓴ_ ꓟꓲ ꓛꓬꓼ ꓟꓵꓽ ꓮ ꓔꓳꓸ ꓗꓪ ꓐꓰ ꓡꓲꓹ ꓗꓷ ꓟꓽ ꓓ= ꓖꓳ ꓡꓱ ꓠꓬꓲ ꓔꓲ ꓖꓴ ꓗꓪ ꓠꓴ ꓔꓲ ꓓꓴ ꓔꓲ_ ꓐꓰ ꓬꓰ ꓔꓬ ꓕꓯ-ꓸ ꓠꓴ ꓬꓲꓼ ꓠꓴ ꓠꓬꓲ ꓕꓲ ꓣꓳ ꓠꓴ ꓔꓯ ꓠꓲꓹ ꓟ ꓫꓸ ꓖꓴ ꓙꓳ_ ꓟ ꓔꓯ ꓓꓵꓽ ꓙ ꓛꓲ ꓡ ꓠꓬ-ꓸ ꓠꓴ ꓔꓲ ꓓꓴ ꓠꓬ ꓔꓲ ꓖꓴ ꓛꓲ ꓔꓲ ꓗꓪ ꓗꓶ ꓔ ꓬꓰ ꓢꓲ ꓬꓲ ꓔꓯ ꓧꓶꓸ ꓕꓯ ꓙꓰ ꓢꓲ ꓠꓬꓲ ꓬꓲ_ ꓐꓰ ꓧꓳꓹ ꓡꓯꓽ ꓘꓳ ꓬꓰ= ꓖꓳ ꓗ ꓠꓯꓸ ꓢꓲ_ ꓡꓰꓽ ꓔꓲ ꓓꓴ ꓔꓲ ꓛꓵ_ ꓡꓳ= ꓠꓴ ꓠꓬ ꓠꓴ ꓔꓯ ꓗꓳꓹ ꓡꓯꓽ ꓘꓳ ꓢꓴ_ ꓐꓰ ꓙ ꓖꓴ ꓗꓪ ꓫꓱꓽ ꓔꓬ ꓢꓰ ꓕꓯ_ ꓡꓰ-ꓸ ꓮꓸ ꓟꓲꓸ ꓬꓲ_ ꓐꓰ ꓧꓳꓹ ꓡꓯ ꓘꓳ= ꓟꓽ ꓥ ꓠꓬ ꓬꓲ ꓡꓰ ꓠꓴ ꓔꓯ ꓐꓯ ꓟꓴ ꓘꓶꓽ ꓢꓲꓽ ꓒ ꓔꓯ ꓡꓯꓼ ꓙꓱ ꓗꓷ ꓢ-ꓸ ꓐꓯ ꓟꓴ ꓘꓶꓽ ꓢꓲꓽ ꓒ ꓡꓰ ꓬꓲ ꓟꓯꓼ ꓐꓴ ꓔꓯ ꓡꓯꓼ ꓙꓱ ꓗꓷ ꓠꓬ ꓠꓴ ꓔꓯ ꓐꓱꓸꓹ ꓓꓴꓽ ꓗꓪ ꓐꓱꓸꓹ ꓗꓷ_ ꓥꓳ= ꓥꓪ ꓡꓰ ꓠꓴ ꓪ ꓔꓯ ꓔꓱꓹ ꓔꓱꓹ_ ꓐꓯ ꓖꓶ_ ꓠꓬꓲ-ꓸ ꓐꓶꓸꓹ ꓟꓽ ꓖꓴ ꓟ ꓙꓲꓽ ꓒꓬꓸ ꓕꓲꓽ ꓒꓬꓸ ꓤꓽ_ ꓡꓰꓽ ꓛ_ ꓟꓲ ꓖꓳ ꓗꓪ ꓐꓰ ꓠꓴ ꓓꓳ ꓡ ꓪ ꓟꓽ ꓓ=

2 ꓘꓳ- ꓡꓱ- ꓕꓴ 3ꓽ15-4ꓽ1ꓹ3-6

ꓖꓳ ꓡꓱ ꓠꓬꓲ ꓮ ꓟꓶ ꓗꓪ ꓛꓲ-ꓸ ꓟꓳ- ꓫꓲ ꓡꓰ ꓐꓳ ꓔ ꓟ ꓙꓵꓽ ꓗ ꓕꓳ ꓶ ꓮ ꓕꓯ ꓵ_ ꓠꓬ ꓖꓳ ꓕꓯ ꓬꓲ ꓪ ꓠꓲꓹ ꓟ ꓗꓪ ꓑꓲꓸ ꓛ ꓓꓹ ꓢꓰꓽ ꓡꓳ= ꓖꓳ ꓡꓱ ꓥ_ ꓟꓲ ꓬꓲ ꓪ ꓠꓬ ꓢꓲ ꓒ ꓔꓯ ꓟꓳꓸ ꓮ ꓕꓯꓽ ꓒꓳꓹ ꓬꓲꓼ ꓡ_ ꓠꓬ ꓖꓳ ꓕꓯ ꓑꓲꓸ ꓛ ꓖꓳ ꓟ ꓥꓸ ꓦ ꓗꓷ_ ꓡꓳ= ꓢꓲ ꓒ ꓠꓬ ꓦ ꓥ ꓡꓳ= ꓢꓲ ꓒ ꓬꓲ ꓦ ꓮ ꓡꓲ ꓗꓪ ꓔꓬ ꓠꓬ ꓖꓳ ꓗꓪ ꓩꓴ ꓗꓷ ꓟꓶ_ ꓟ ꓙꓳ_ ꓡꓳ= ꓖꓳ ꓡꓱ ꓠꓬꓲ ꓣꓳ ꓐꓴ ꓠꓽ ꓒꓬꓱꓽ ꓠꓬ ꓟꓽ ꓑꓲꓸ ꓑꓲꓸ-ꓸ ꓒꓬꓱꓽ ꓠꓬꓲ ꓓꓴ ꓗꓪ ꓟꓳ_ ꓟ_ ꓡꓰ ꓐꓰ ꓢꓲ ꓒ ꓐꓬꓱꓼ ꓡꓱꓼ ꓟ ꓔꓯ ꓡꓳꓸ ꓔꓬ ꓠꓬꓲ-ꓸ ꓣꓳ ꓠꓬ ꓬꓲ ꓒꓬꓱꓽ ꓶꓸꓹ ꓡꓰ ꓢꓲ-ꓸ ꓐꓬꓱꓼ ꓡꓱꓼ ꓟ ꓕꓯꓽ ꓢꓲ ꓐꓬꓱꓼ ꓡꓱꓼ ꓡꓱꓼ ꓑꓶꓸ ꓡꓰ_ ꓟ ꓕꓱ ꓟ ꓠꓬ ꓢꓲ ꓒꓽ ꓬꓲ ꓦ ꓗꓪ ꓐꓰ ꓥ ꓡꓳ= ꓥꓪ ꓠꓴ ꓠꓬ ꓪꓴ-ꓢ ꓫꓱꓸ ꓤ_ ꓟ ꓗꓪ ꓐꓰ ꓣꓱꓽ ꓙ ꓟꓬꓱꓽ ꓕꓱ ꓟ ꓟꓶ_ ꓠꓬꓲ ꓠꓲꓹ ꓟ ꓟꓽ ꓙꓬ ꓡꓰ= ꓶꓼ ꓓꓳꓽ ꓫꓱꓹ ꓓꓳ ꓕꓱ ꓟ ꓑꓲꓸ ꓞꓹ ꓠꓬ-ꓸ ꓟꓶꓽ ꓬꓰ ꓔꓬ ꓢꓴ ꓔꓯ ꓟꓳꓸ ꓑꓲꓸ ꓞꓹ ꓟ ꓥꓳ= ꓪꓴ-ꓢ ꓬꓲ ꓒꓬꓱꓽ ꓥ ꓟ ꓙꓲ-ꓢꓴ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓶꓼ ꓓꓳꓽ ꓫꓱꓹ ꓓꓳ ꓠꓬꓲ ꓟꓳ ꓓꓴ ꓬꓲ ꓪ ꓔꓯ ꓟꓽ ꓣꓳꓸꓸ ꓖꓶ ꓝꓲ ꓠꓹ ꓟ-ꓸ ꓟꓲ ꓠꓯ ꓕꓱ ꓟ ꓬꓲ ꓢꓲꓸꓸ ꓡꓰ-ꓸ ꓟꓽ ꓙꓵꓸꓹ ꓢꓴ ꓙꓽ ꓠꓲꓹ ꓟꓬ ꓢꓶꓽ ꓔꓯ ꓔꓶ ꓡꓰ ꓝꓲ_ ꓡꓳ= ꓮ ꓡꓲꓳ ꓐꓯ ꓠꓬ ꓥꓪ ꓠꓴꓽ ꓠꓽ ꓚꓲ ꓛꓬ ꓔꓯ ꓟꓳꓸ ꓟꓽ ꓚ ꓟꓸ= ꓬꓰ-ꓢꓴ ꓙꓲ-ꓢꓴ ꓠꓬ ꓢꓲ ꓒꓽ ꓥ ꓟ_ ꓐꓰ-ꓸ ꓥꓪ ꓠꓴ ꓠꓬ ꓬꓰ- ꓢꓴ ꓐꓱ ꓶ ꓠꓴ ꓪ ꓚꓳ ꓑꓸ ꓬꓰ_ ꓟ ꓚ ꓟꓸ ꓖꓶ_ ꓡꓳ= ꓮ ꓡꓲꓳ ꓐꓯ ꓠꓬ ꓠꓬꓲ ꓟꓳ ꓓꓴ ꓠꓬ ꓠꓯ ꓞꓲꓹ ꓟ ꓗꓪ ꓐꓰ ꓣꓳꓸꓸ ꓓꓳ ꓡ ꓝꓲ-ꓸ ꓐꓯ ꓢꓴ ꓪꓴ-ꓢ ꓬꓲ ꓖꓳ ꓕꓲ ꓣꓳ ꓡꓰ-ꓸ ꓬꓲ ꓐꓬꓱꓼ ꓡꓱꓼ ꓟ ꓔꓯ ꓢꓷꓸ_ ꓟ ꓢꓷꓸ ꓠꓲꓹ ꓠꓬ ꓬꓰ-ꓢꓴ ꓙꓲ-ꓢꓴ ꓒꓬꓱꓽ ꓟꓬ ꓗꓪ ꓡꓬꓸ ꓖꓶ ꓢꓲ ꓠꓬꓲ ꓣꓳ ꓠꓲꓹ ꓟ ꓗꓪ ꓣꓳꓸꓸ ꓖꓶ ꓡ- ꓡꓳ=