ꓒꓲ-ꓕꓱ ꓙꓲ-ꓢꓴ ꓔꓯ ꓣꓷꓠ_ ꓟ

ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓐꓰ ꓒꓲ-ꓡꓲ-ꓒꓲ ꓟꓵꓽ ꓗꓪ ꓙꓰ_ ꓡꓳ= ꓬꓲ ꓪ ꓙꓸꓹ ꓫꓱꓽ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓡ-ꓞꓳ-ꓮ-ꓐꓲ ꓮ ꓟꓽ ꓥ ꓟ ꓢꓴ ꓮ ꓡꓲ ꓐꓯ_ ꓡ? ꓐꓰ ꓠ ꓠꓬꓲ_ ꓡꓳ= ꓬꓲ ꓪ ꓡꓰ ꓠꓴ ꓠꓬ ꓖꓳ ꓓꓱ ꓔꓲꓹ ꓖꓶ ꓢꓴ ꓬꓳ-ꓦ ꓥꓳ- ꓐꓰ ꓐꓯ ꓢꓴ ꓕꓲ ꓐꓱ ꓙꓳ_ ꓡꓳ= ꓬꓲ-ꓡꓲ-ꓬ ꓥꓳ- ꓥ ꓠꓬ ꓬꓰ-ꓡꓲ-ꓟꓲ ꓥꓳ-ꓸ ꓥ ꓠꓬ ꓟꓷ ꓠꓷꓹ ꓝꓸ ꓢꓴ ꓐꓴ ꓗꓪ ꓟ ꓕꓲ ꓣꓳ ꓥꓳ-ꓸ ꓐꓯ ꓢꓴ_ ꓟꓲ ꓕꓲ ꓐꓱ ꓙꓳ_ ꓡꓳ-ꓸ ꓐꓯ ꓖꓶ_ ꓡꓳ=

ꓬꓰ-ꓢꓴ ꓡꓰ ꓝꓮꓲ ꓠ ꓠꓬꓲ_ ꓟ ꓠꓬ ꓖꓳ ꓡꓱ ꓥ ꓠꓬ ꓥꓪ ꓮꓽ ꓟ ꓥ ꓟ ꓠꓴ ꓪ ꓠꓬ ꓮ ꓡꓲ ꓐꓯ_ ꓡ? ꓐꓰ ꓠ ꓠꓬꓲ_ ꓡꓳ= ꓖꓳ ꓕꓯ ꓢꓲ-ꓟꓴ ꓒꓲ-ꓕꓱ ꓡꓰ ꓠꓴ ꓠꓽ ꓙꓲ-ꓢꓴ ꓖꓳ ꓕꓲ ꓣꓳ ꓟ ꓥꓳ= ꓢꓯꓸ ꓔꓬ ꓟ ꓪꓴ-ꓢ ꓬꓲ ꓮ ꓐꓲ ꓥꓳ-ꓸ ꓐꓰ ꓒꓳꓹ ꓖꓶ_ ꓡꓳ= ꓒꓲ-ꓕꓱ ꓐꓯ ꓟ ꓠꓬ ꓡꓳ ꓓꓰ ꓥ ꓡꓳ= ꓬꓳ-ꓠ ꓬꓲ ꓤ ꓯ-ꓓꓱ-ꓣꓴ ꓬꓲ ꓠꓬꓲ ꓤ ꓢꓲ-ꓟꓴ ꓔꓯ ꓬꓰ-ꓢꓴ ꓡꓰ ꓖꓶ ꓔ ꓟ ꓟꓬꓱꓸꓸ ꓥ ꓡꓳ= ꓡꓳ ꓓꓰ ꓕꓯꓽ ꓢꓲ ꓜꓶ ꓔ ꓟ ꓔꓶ ꓔ ꓟ ꓪꓴ-ꓢ ꓗꓴꓷꓼ ꓜꓳ ꓜꓴ ꓔꓯ ꓡꓯꓼ ꓙꓱ_ ꓟ ꓥꓳ= ꓫꓵꓸꓹ ꓓꓴꓽ ꓬꓲ ꓪꓽ ꓠꓬꓲ_ ꓟ ꓡꓰ ꓥꓪ ꓘꓴ ꓜꓲꓼ ꓞꓳ ꓔꓯ ꓧꓪꓸ ꓡꓰ ꓟꓽ ꓘꓴ ꓐꓰ ꓐꓯ ꓔ ꓡꓳ= ꓒꓲ-ꓕꓱ ꓔꓬ ꓠꓬ ꓘꓴ ꓜꓲꓼ ꓞꓳ ꓔꓬ ꓡꓳ-ꓸ ꓘꓴ ꓜꓲꓼ ꓞꓳ ꓔꓬ ꓠꓬ ꓬꓰ-ꓢꓴ ꓔꓬ ꓡꓳ-ꓸ ꓬꓰ-ꓢꓴ ꓔꓬ ꓠꓬ ꓕꓲ ꓞꓲꓼ ꓕꓲ ꓑ ꓚꓬꓴ ꓟꓶ_ ꓟ ꓢꓯꓼ ꓟꓬ ꓙꓳ_ ꓡꓳ ꓐꓰ St. Ambrose ꓡꓰ ꓐꓯ ꓘꓶꓽ ꓙꓳ_ ꓡꓳ=

ꓠꓬꓲꓸ ꓠꓬꓲ ꓬꓰ-ꓢꓴ ꓡꓰ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓥ ꓟꓲ ꓕꓱ ꓡꓱ ꓠ ꓠꓬꓲ ꓡ ꓥꓳ= ꓥꓪ ꓮ ꓟꓽ ꓥ ꓟ ꓢꓴ ꓮ ꓡꓲ ꓐꓯ_ ꓡ? ꓥꓪ ꓮꓽ ꓟ ꓥ ꓟ ꓠꓴ ꓪ ꓮ ꓡꓲ ꓐꓯ_ ꓡ ꓐꓰ ꓠ ꓠꓬꓲ ꓡ ꓥꓳ= ꓕꓱ ꓡꓱ ꓠ ꓠꓬꓲ ꓡ ꓕꓯ ꓣꓳ ꓮ ꓡꓲ ꓐꓰ ꓒꓳꓹ ꓖꓶ ꓠꓯ ꓡ? ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓬꓰ-ꓢꓴ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓬꓲ ꓮ ꓐꓲ ꓥꓳ ꓐꓰ ꓫꓱꓸ ꓖꓶ ꓠꓯ ꓡ? ꓣꓳ ꓓꓵꓽ ꓙ ꓠ ꓔ ꓟ ꓥꓳ=