ꓪꓴ‐ꓢ ꓠꓬ ꓣꓳꓽ ꓢꓯꓼ ꓪ

“ꓥꓪ ꓧꓪꓽ ꓖꓳ ꓓꓱˍ ꓐꓰ ꓥꓪ ꓠꓲ, ꓟ ꓢꓯꓼ ꓐ ꓡꓰˍ ꓟꓲ꓾ ꓪꓴ‐ꓢ ꓠꓬ ꓥꓪ ꓢꓯꓼ ꓪꓽ ꓥ ꓡꓳ꓿ ꓕꓲ ꓞꓲꓼ ꓕꓲ ꓑ ꓟ ꓥꓪ ꓡꓯꓼ ꓪ ꓠꓬ ꓬꓲˍ ꓡꓰ ꓥꓳ꓿ (ꓟꓴ ꓖꓪ 73ꓽ26)

            ꓢꓯ. ꓔꓬ, ꓟ ꓪꓴ‐ꓢ ꓐꓯ ꓘꓶꓽ ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴ‐ꓳ꓿ ꓣꓳꓽ ꓧꓪꓽ ꓖꓳ ꓓꓱ ꓠꓬ ꓢꓯꓼ ꓐ, ꓡꓰ ꓗꓴ. ꓡꓳ꓿ ꓣꓳ ꓖꓳ ꓓꓱ ꓠꓬ ꓕꓲꓽ ꓑ ꓤ ꓡꓰ ꓥꓳ꓿ ꓣꓳꓽ ꓮ ꓡꓰ ꓘꓶ. ꓛꓲ ꓢꓯꓼ ꓙꓳˍꓥ ꓟꓲ ꓕꓲꓽ ꓠꓬꓲ ꓙꓳˍ ꓠꓬ ꓡꓵꓺ ꓡꓰˍ ꓥꓳ꓿ ꓢꓯꓼ ꓐꓽ ꓡꓰ ꓥꓳ꓿

            ꓣꓳꓽ ꓠꓬ ꓦꓵꓻ ꓡˍ ꓕꓯ ꓡꓰ ꓮ ꓤ ꓤ ꓐꓰ ꓞꓲꓼ ꓪꓴꓽ ꓡ ꓢꓲ ꓟꓳꓽ ꓡꓰ ꓔꓬ, ꓡꓳ꓿ ꓮ ꓡꓰ ꓘꓶ. ꓐꓲ ꓢꓴ ꓥˍ ꓟꓲ ꓟꓽ ꓐꓲ ꓗꓷ ꓡꓰ ꓫꓵꓽ ꓬꓲ. ꓝꓲ. ꓛꓲ ꓡ ꓥꓳ꓿ ꓮ ꓡꓰ ꓘꓶ. ꓛꓲ ꓢꓯꓼ ꓙꓳˍ ꓫꓵꓽ ꓥˍ ꓟꓲ ꓢꓯꓼ ꓟꓽ ꓙꓳ ꓗꓷ ꓡꓰ ꓫꓵꓽ ꓬꓲ. ꓙꓵ ꓛꓲ ꓡ ꓥꓳ꓿ ꓣꓳꓽ ꓢꓯꓼ ꓙꓳˍ ꓟ ꓠꓬ ꓕꓲꓽ ꓑ ꓤ ꓡꓰ ꓥꓳ꓿ ꓣꓳꓽ ꓐꓲˍ ꓟ ꓟꓲ ꓕꓲꓽ ꓑ ꓤ ꓡꓰ ꓥꓳ꓿

            ꓖꓳ ꓡꓱ ꓠꓬꓲ ꓣꓳꓽ ꓢꓯꓼ ꓪ ꓠꓬ ꓪꓴ‐ꓢ ꓡꓰ ꓥꓳ ꓐꓯ ꓟ ꓪꓴ‐ꓢ ꓐꓯ ꓘꓶꓽ ꓠꓬ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓐꓱ ꓶ ꓥꓳ꓿ ꓮ ꓕꓯˍ ꓟꓲ ꓡꓵꓺ ꓡꓰ ꓟꓽ ꓗꓴ. ꓟ꓾ ꓮ ꓕꓯˍ ꓟꓲ ꓐꓰꓽ ꓡꓰ ꓟꓽ ꓗꓴ. ꓟ ꓪꓴ‐ꓢ ꓠꓬ ꓣꓳꓽ ꓢꓯꓼ ꓪ ꓡꓰ ꓥꓳ꓿

            ꓖꓳ ꓡꓱ ꓠꓬꓲ ꓚꓲ. ꓛꓬ ꓢꓷ. ꓠꓲ,꓾ ꓚꓲ. ꓛꓬ ꓢꓯꓼ ꓪ ꓔꓯ ꓡꓰꓽ ꓕ ꓦ ꓡꓱ꓿ ꓪꓴ‐ꓢ ꓔꓯ ꓦ ꓡꓱ ꓠꓯˍ ꓡꓳ꓿ ꓣꓳꓽ ꓔꓯ ꓙꓳˍ ꓟ ꓮ ꓙꓵꓽ ꓠꓬ ꓟꓽ ꓐꓲ ꓜꓲꓼ꓿ ꓮ ꓡꓰ ꓘꓶ. ꓛꓲ ꓢꓷ. ꓠꓲ, ꓓˍ ꓫꓵꓽ ꓥˍ ꓟꓲ ꓥꓳꓽ ꓡꓰ ꓗꓴ.ˍ ꓡꓳ꓿ ꓮ ꓡꓰ ꓘꓶ. ꓛꓲ ꓢꓯꓼ ꓙꓳˍ ꓫꓵꓽ ꓥˍ ꓟꓲ ꓓꓳꓽ ꓡꓰ ꓗꓴ. ꓡꓳ꓿ ꓮ ꓡꓰ ꓘꓶ. ꓛꓲ ꓫꓵꓼˍ ꓫꓵꓽ ꓥˍ ꓟꓲ ꓐꓰꓽ ꓡꓰ ꓗꓴ. ꓡꓳ꓿

            ꓣꓳꓽ ꓠ ꓒꓬꓽ ꓡ ꓕꓯ꓾ ꓣꓳꓽ ꓬꓰ ꓟꓽ ꓘꓴ ꓕꓯ꓾ ꓣꓳꓽ ꓬꓰ ꓟꓽ ꓗꓴ. ꓕꓯ ꓣꓳꓽ ꓢꓯꓼ ꓪ ꓠꓬ ꓮ ꓡꓰ ꓗꓪ ꓙꓰ ꓗꓷ ꓥꓳ ꓪ?꓿ ꓮ ꓙꓵꓽ ꓠꓬ ꓮꓽ ꓔꓳ ꓥꓳ꓿ ꓬꓲ. ꓖꓳꓽ ꓥꓳ꓿

            ꓖꓳ ꓡꓱ ꓠꓬꓲ꓾ ꓠꓬꓲ. ꓠꓬꓲ ꓗꓪ ꓐꓰ ꓪꓴ‐ꓢ ꓔꓯ ꓦ ꓡꓱ ꓢꓲ ꓙꓰ꓿ ꓠꓴ ꓠꓬ ꓫꓵꓻ ꓟꓽ ꓓ ꓫꓵꓽ ꓟ ꓥ꓿ ꓕꓲꓽ ꓠꓬꓲ ꓙꓳˍ ꓠꓬ ꓫꓵˍ ꓥꓳ꓿ ꓕꓱ ꓟ ꓔꓯ ꓓꓵꓽ ꓙ ꓔ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓡꓰ ꓣꓳꓽ ꓢꓯꓼ ꓪ ꓥꓳ꓿ ꓬꓲ. ꓡꓰ ꓣꓳꓽ ꓫ ꓑꓬꓺ ꓖꓴ ꓥꓳ꓿ ꓮ ꓙꓵꓽ ꓢꓴ ꓢꓯꓽ ꓕꓵꓼ ꓡꓯ꓿