ꓠꓲꓽ ꓜꓴ ꓜꓶꓽ ꓞꓹ ꓢꓴ ꓔꓯ ꓫꓬ ꓡꓰ ꓟ

ꓠꓬꓲꓸ ꓠꓬꓲ ꓵ ꓠꓹ ꓟ ꓢꓲ ꓫꓬ ꓕꓳ ꓶ ꓝꓲꓸ ꓠꓬ ꓟ-ꓕꓲ 8ꓽ28-34 ꓥ ꓡꓳ꓾ ꓟꓸ ꓟꓲ ꓖꓳ ꓗꓪ ꓠꓬ ꓢꓲ-ꓒ ꓬꓰ-ꓢꓴ ꓠꓬ ꓠꓲꓽ ꓜꓶꓽ ꓞꓹ ꓢꓴ ꓔꓯ ꓠꓲꓽ ꓖꓼ ꓓꓳꓺ ꓖꓶ_ ꓟ ꓟꓸ ꓟꓲꓽ ꓥ ꓡꓳ= ꓠꓲꓽ ꓐꓴ ꓠꓬ ꓢꓲ-ꓒ ꓬꓰ-ꓢꓴ ꓔꓯ ꓡꓳꓸ ꓟꓳ ꓕꓯ ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓠꓴ ꓮ ꓫꓵ ꓑꓶ ꓓꓴ ꓥꓪ ꓠꓴ ꓔꓯ ꓫꓵꓽ ꓧꓳꓸ ꓙꓲ ꓙꓳ_ ꓡ? ꓥꓪ ꓠꓴ ꓔꓯ ꓐꓬ ꓠꓹ ꓟ ꓡ_ ꓡ? ꓠꓴ ꓥꓪ ꓠꓴ ꓔꓯ ꓖꓼ ꓓꓳ ꓐꓯ ꓠꓬ ꓮ ꓪꓰꓼ ꓜꓴ ꓠꓯꓼ ꓗꓪ ꓓꓵꓽ ꓝꓲ ꓐꓰ ꓓꓰꓽ_ ꓟ ꓢꓲ ꓫꓬ ꓕꓳ ꓶ ꓥ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓠꓴ ꓠꓲꓹ ꓡꓶꓽ ꓙꓳ_ ꓟ ꓡꓰ ꓐꓰ ꓒꓬꓱꓼ ꓡ ꓝꓲ “ꓙꓰ ꓨꓽ” ꓐꓰ ꓐꓯ ꓕꓯ ꓠꓲꓽ ꓖꓳ ꓟ ꓠꓬ ꓮ ꓪꓰꓼ ꓘꓴꓽ ꓗꓪ ꓓꓵꓽ ꓙꓰ ꓢꓲ꓾ ꓮ ꓪꓰꓼ ꓜꓴ ꓟ ꓠꓬ ꓬꓲꓻ ꓙꓬ ꓘꓴꓽ ꓗꓪ ꓔꓲꓹ ꓫꓵꓻ ꓙꓰ_ ꓟ ꓟꓸ ꓟꓲꓽ ꓥ ꓡꓳ= ꓖꓳ ꓟ ꓔꓯ ꓟꓳ ꓕꓯ ꓖꓳ ꓗꓪ ꓔꓬ ꓟ ꓞꓳ ꓤ ꓐꓴ ꓘꓹ ꓢꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓕꓱ ꓗꓪ ꓟꓽ ꓔꓬ ꓠꓹ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓔꓯ ꓖꓼ ꓓꓳ ꓗꓷ_ ꓟ ꓢꓲ ꓫꓬ ꓕꓳ ꓶ ꓥ ꓡꓳ= ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓔꓬ ꓟ ꓠꓬ ꓖꓳ ꓗꓪ ꓔꓬ ꓢꓴ ꓕꓲ ꓧꓳꓽ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓬꓰ_ ꓟ꓾ ꓢꓲ ꓒ ꓬꓰ-ꓢꓴ ꓠꓲꓽ ꓔꓯ ꓧꓪꓸ ꓘꓴ_ ꓟ꓾ ꓪꓴ-ꓢ ꓓꓵꓽ ꓙ ꓟꓶ ꓓꓴ ꓬꓰ ꓖꓶ_ ꓟ ꓔꓯ ꓟꓽ ꓟꓳ ꓢꓲ ꓠꓬꓲ ꓬꓲ ꓪ ꓔꓯ ꓙꓳ_ ꓟ ꓮ ꓪꓰꓼ ꓫꓵꓻ ꓖꓴ ꓟ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓠꓲꓹ ꓧꓳꓹ ꓟ ꓢꓲ ꓒ ꓬꓰ-ꓢꓴ ꓔꓯ ꓖꓼ ꓓꓳ_ ꓟ ꓢꓲ ꓫꓬ ꓕꓳ ꓶ ꓥ ꓡꓳ=

ꓢꓲ ꓒ ꓬꓰ-ꓢꓴ ꓔꓯ ꓖꓼ ꓓꓳ ꓗꓷ_ ꓟ ꓔꓯ ꓣꓳ ꓐꓱ ꓶ ꓓꓵꓽ ꓙ ꓟꓶ ꓓꓴ ꓥ ꓡꓳ= ꓮ ꓫꓵ ꓑꓶ ꓓꓴ ꓐꓯ ꓠꓬ ꓬꓲ ꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓳ_ ꓥ ꓟꓲ ꓢꓲ ꓒ ꓬꓰ-ꓢꓴ ꓥ ꓟ ꓢꓷꓸ ꓥ ꓟꓲ ꓘꓳꓹ ꓣꓴ ꓟꓽ ꓐ ꓡ꓾ ꓢꓲ ꓒ ꓬꓰ-ꓢꓴ ꓬꓲ ꓪ ꓔꓬ ꓗꓪ ꓙꓰ ꓠꓬ ꓕꓱ ꓡꓱ ꓫꓵ ꓮ ꓟꓬꓹ ꓔꓳꓹ ꓜꓳ ꓥꓳ= ꓢꓲ ꓒ ꓬꓰ-ꓢꓴ ꓬꓲ ꓪ ꓐꓰ ꓔꓬ ꓠꓬ ꓕꓱ ꓡꓱ ꓫꓵ ꓶꓻ ꓤ ꓖꓴ ꓡꓰ ꓫꓵ ꓮ ꓟꓬꓹ ꓙꓳ ꓥꓳ ꓐꓰ ꓓꓵꓽ ꓙ_ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓥ ꓟꓲ ꓕꓲ ꓖ ꓕꓲ ꓧꓪꓹ ꓣꓳ ꓶꓻ ꓤ ꓒꓰꓼ ꓬꓰ ꓕꓯ ꓟꓽ ꓥ ꓠꓬ ꓧꓪ ꓜ ꓧꓪ ꓓꓳ ꓔꓬ ꓟ ꓒꓴ ꓫꓵꓺ ꓟꓬꓱꓽ ꓬꓰ ꓟ ꓮ ꓙꓵ ꓟꓬꓱꓽ ꓬꓰ ꓟ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓢꓲ ꓠꓹ ꓟ ꓗꓪ ꓐꓰ ꓣꓳ ꓟꓬꓱꓽ ꓔꓯ ꓢꓲ ꓠꓹ ꓟ ꓕꓱ ꓠꓬꓲꓽ ꓚꓱꓹ ꓓꓳꓺ ꓡ ꓕꓯ ꓕꓲ ꓧꓪꓹ ꓧꓪꓹ ꓕꓲ ꓐꓱ ꓠꓬ ꓟꓬꓱꓽ ꓔꓯ ꓢꓲ ꓗꓷ ꓫꓵ ꓦꓬꓼ ꓠꓬꓲ ꓙꓳ ꓗꓴꓸ_ ꓡꓳ= ꓢꓲ ꓒ ꓬꓰ-ꓢꓴ ꓔꓬ ꓕꓯ ꓕꓲ ꓚꓱꓹ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓠꓬꓲꓸ ꓠꓬꓲ ꓟꓸ ꓟꓲ ꓘꓴ ꓗꓪ ꓡꓰ ꓐꓰ ꓮ ꓪꓰꓼ ꓜꓴ ꓔꓯ ꓬꓲꓻ ꓙꓬ ꓘꓴꓽ ꓗꓪ ꓔꓲꓹ ꓫꓵꓻ ꓝꓲ_ ꓟ ꓡꓰ ꓐꓰ ꓦꓬꓼ ꓙꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓛꓳ ꓙꓳ ꓔꓬ ꓟ ꓟꓬꓱꓽ ꓔꓯ ꓐꓬ ꓡꓰ ꓝꓲ ꓗꓴꓸ_ ꓡꓳ ꓐꓰ ꓓꓵꓽ ꓙ ꓥꓳꓽ ꓡꓰ ꓗꓴꓸ_ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓠꓬ ꓖꓼ ꓓꓳ ꓔꓬ ꓢꓴ ꓥ ꓡ? ꓘꓳꓹ ꓣꓴ ꓔꓬ ꓢꓴ ꓥ ꓡ? ꓓꓵꓽ ꓙ ꓠꓬꓲ ꓠ ꓗꓹ ꓡꓳ=

ꓢꓲ ꓫꓬ ꓕꓳ ꓶ ꓗꓪ ꓡꓳꓸ ꓠꓬꓲ ꓕꓯ ꓥ ꓟꓲ ꓒꓲ-ꓕꓱ ꓠꓬ ꓕꓲ ꓦꓬꓼ ꓡꓱꓼ ꓥꓪꓸ ꓓꓳꓼ ꓥ ꓟꓲ ꓕꓲ ꓟ ꓡꓲ ꓓꓳꓼ ꓟꓽ ꓟꓶ꓾ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓬꓲ ꓡꓲ ꓕꓯ ꓢꓲ ꓗꓪ ꓙꓰ ꓢꓲ ꓠꓬꓲ ꓥꓪꓸ ꓓꓳꓼ ꓠꓹ ꓟ ꓬꓲꓸ ꓔꓶꓸ ꓐꓯ ꓖꓶ ꓕꓯ ꓬꓲꓸ ꓠꓬ ꓥꓪꓸ ꓮ ꓟꓬꓹ ꓓꓳꓼ ꓟꓶ ꓡꓰꓳ꓾ ꓖꓳ ꓕꓯ ꓒꓲ-ꓕꓱ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓥꓪ ꓔꓬ ꓗꓪ ꓐꓰ ꓙꓰ꓾ ꓥꓪ ꓠꓬ ꓝꓴꓲ ꓙꓳ ꓢꓴ ꓥ ꓡꓳ꓾ ꓐꓰ ꓐꓯ ꓢꓲ ꓢꓲ ꓒ ꓬꓰ-ꓢꓴ ꓔꓯ ꓖꓼ ꓓꓳ ꓟ ꓥ ꓟꓲ ꓣꓳ ꓑ ꓙ ꓠꓬꓲ_ ꓡꓳ= ꓕꓲ ꓚꓱꓹ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓥꓪ ꓔꓬ ꓗꓪ ꓔꓬ ꓟꓽ ꓒꓵ ꓠꓴ ꓠꓬ ꓙꓲ_ ꓡꓳ꓾ ꓥꓪ ꓠꓬ ꓝꓴꓲ ꓙꓳ ꓢꓴ ꓥ ꓡꓳ ꓐꓯ ꓢꓲ ꓒꓲ-ꓕꓱ ꓠꓬ ꓬꓲꓸ ꓔꓯ ꓖꓼ ꓓꓳ ꓗꓷ_ ꓟ ꓥ ꓡꓳ= ꓖꓳ ꓟ ꓡꓰ ꓐꓰ ꓣꓳ ꓠꓬ ꓟꓽ ꓒꓵ꓾ ꓣꓳ ꓠꓬ ꓝꓴꓲ ꓙꓳ ꓢꓴ ꓥ ꓡꓳ꓾ ꓣꓳ ꓠꓬ ꓝꓴꓲ ꓮ ꓟꓬꓹ ꓬꓰ ꓢꓴ ꓥꓳ ꓐꓯ ꓢꓲ ꓪꓴ-ꓢ ꓔꓯ ꓣꓳ ꓘꓳꓹ ꓣꓴ ꓟꓽ ꓐ ꓡ ꓟ꓾ ꓘꓳꓹ ꓣꓴ ꓟꓽ ꓒꓵ ꓟ ꓡꓰ ꓐꓰ ꓣꓳ ꓔꓬ ꓪ ꓟ ꓦꓬꓼ ꓠꓬꓲ ꓟꓲ ꓙꓳ_ ꓡꓳ= ꓕꓱ ꓟ ꓔꓯ ꓣꓳ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓝꓴꓲ ꓔꓯ ꓠꓲꓹ ꓜꓳ ꓥ ꓟꓲ꓾ ꓝꓴꓲ ꓔꓯ ꓟꓽ ꓧꓳꓹ ꓥ ꓟꓲ꓾ ꓞꓳ ꓤ ꓔꓯ ꓠꓬ ꓠꓲꓹ ꓠꓵ_ ꓡꓳ= ꓝꓴꓲ ꓙꓳ ꓢꓴ ꓞꓳ ꓤ ꓔꓯ ꓠꓲꓹ ꓠꓵ_ ꓡꓳ= ꓬꓲ ꓠꓬ ꓝꓴꓲ ꓔꓯ ꓠꓬ ꓠꓲꓹ ꓜꓳ_ ꓡꓳ= ꓝꓴꓲ ꓔꓯ ꓠꓬ ꓟꓽ ꓠꓲꓹ ꓠꓵ꓾ ꓖꓳ ꓡꓱ ꓥ ꓟꓲ ꓝꓴꓲ ꓙꓳ ꓢꓴ ꓔꓯ ꓠꓬ ꓠꓲꓹ ꓠꓵ_ ꓡꓳ=

ꓬꓲ ꓤ ꓠꓬꓲ ꓤ ꓐꓴꓳ꓾ ꓣꓳ ꓮ ꓙꓵ ꓢꓴ ꓠꓬ ꓝꓴꓲ ꓙꓳ ꓢꓴ ꓡꓰ ꓥ ꓡꓳ꓾ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓬꓲ ꓠꓵ ꓠꓲꓹ ꓗꓪ ꓐꓰ ꓙꓲ ꓫꓬ ꓟ ꓒꓬꓱꓼ ꓡ ꓡꓳ= ꓠꓬꓲꓸ ꓠꓬꓲ ꓠꓴ ꓐꓰ ꓥꓪ ꓓꓵꓽ ꓙ ꓠꓹ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓠꓬꓲꓸ ꓠꓬ ꓢꓲ ꓫꓬ ꓕꓳ ꓶ ꓟ ꓗꓪ ꓟ ꓡꓰ ꓐꓰ ꓖꓼ ꓓꓳ ꓢꓴ ꓬꓰ ꓔꓬ ꓡ? ꓢꓲ ꓒ ꓬꓰ-ꓢꓴ ꓣꓳ ꓤꓶꓻ ꓗꓪ ꓟꓽ ꓓꓵꓽ ꓡ ꓝꓲ ꓝꓲ ꓐꓰ ꓖꓼ ꓓꓳ ꓢꓴ ꓥ ꓡ? ꓟꓽ ꓥ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓢꓴ ꓥ ꓡ? ꓐꓯ_ ꓟ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟꓳꓸ ꓖꓶ ꓡ ꓔꓬ ꓡꓳ꓾ ꓖꓳ ꓡꓱ ꓠꓬꓲ ꓮ ꓙꓵ ꓢꓴ ꓠꓬꓲꓸ ꓠꓬꓲ ꓕꓱ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓾