ꓫ ꓙꓵ ꓟꓷꓼ ꓙꓵ ꓟ ꓔꓯ ꓘꓳ, ꓙ ꓙꓰ ꓠ, ꓟ

ꓫ ꓙꓵ ꓟꓷꓼ ꓙꓵ ꓟ ꓔꓯ ꓘꓳ, ꓙ ꓙꓰ ꓠ, ꓟ

ꓣꓳꓽ ꓤꓶ ꓟꓲꓽ ꓕꓯ ꓢꓲ ꓗꓪ ꓫ. ꓙꓵ ꓓꓴ ꓔꓯ ꓫꓬꓽ ꓫꓬꓽ ꓡꓰ ꓣꓳ ꓟꓳ ꓕꓯ ꓣꓳꓽ ꓠꓬ ꓮ ꓡꓰ ꓥˍ ꓟꓲ ꓗ, ꓛꓲꓽ ꓟꓽ ꓐ ꓡ꓿ ꓔꓯꓺ ꓥꓳꓽ ꓐꓯ ꓠꓬ ꓢ. ꓠꓯ ꓠꓬ ꓣꓳꓽ ꓠꓻ ꓡ ꓥꓳ ꓐꓯ ꓟ ꓢꓷ. ꓕꓯ꓾ ꓢ ꓖꓶ ꓠꓬ ꓣꓳꓽ ꓠꓻ ꓓꓴ ꓓꓴ ꓡꓰ ꓥꓳ ꓐꓯ ꓟ ꓢꓷ. ꓕꓯ ꓣꓳꓽ ꓠꓬꓲ. ꓠꓬꓲ ꓮ ꓡꓰ ꓗ ꓛꓲ ꓐ ꓡ ꓢꓰ꓿ ꓟꓬꓽ ꓠꓬꓲ ꓐꓶ ꓠꓬ ꓠ. ꓦꓬꓽ ꓕꓯ ꓣꓳꓽ ꓫꓵˍ ꓥꓳ ꓐꓰ ꓢꓷ. ꓕꓯ ꓛꓲ ꓠꓲ ꓣꓳꓽ ꓮ ꓡꓰ ꓐꓰ ꓗ, ꓛꓲ ꓐ ꓡ ꓢꓰ?

  ꓕꓱ ꓡꓱ ꓐꓰ ꓢꓷ. ꓕꓯ ꓣꓳꓽ ꓮ ꓡꓰ ꓐꓰ ꓬꓰ ꓠꓯ ꓡ?

            ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ‐ꓕꓲ 20ꓽ 17‐28 ꓗꓪ ꓣꓳꓽ ꓑ ꓙˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓬꓲ. ꓔꓯ ꓮ ꓘꓶ. ꓟꓽ ꓟꓶ ꓫꓵ ꓟ ꓦꓬꓼ ꓠꓬꓲ ꓗꓪ ꓢꓴ ꓡꓰ ꓬꓲ. ꓔꓯ ꓜꓲꓽ ꓜꓲꓽ ꓑꓰ, ꓑꓰ, ꓬꓰ ꓢꓲ꓾ ꓢꓰꓼ ꓗꓷ ꓥꓳ ꓐꓰ ꓬꓲ. ꓛꓳ ꓒꓯ ꓐꓴ ꓔꓯ ꓐꓯ ꓟ. ꓖꓶꓽ ꓡꓳ꓿ ꓟꓲꓺ ꓠꓯꓺ ꓞꓳ ꓤ ꓕꓲꓽ ꓣꓳ ꓠꓻ ꓗꓪ ꓐꓰ ꓮ ꓤ ꓤ ꓫꓵˍ ꓫꓵꓽ ꓟꓽ ꓥ꓾ ꓢꓴ ꓡꓰ ꓓꓶꓽ ꓠꓬꓲ ꓔꓲ. ꓠꓬꓲ ꓬꓰ ꓢꓲ꓾ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓕꓯ ꓢꓰꓼ ꓗꓷ ꓟ ꓥꓳ꓿ ꓕꓱ ꓟ ꓮ ꓙꓵꓽ ꓔꓯ ꓢꓲ ꓒ ꓬꓰ‐ꓢꓴ ꓟꓽ ꓛꓲ ꓟꓽ ꓡꓯ ꓡꓰ ꓢꓷ. ꓔ ꓡꓳ꓿

            ꓖꓳ ꓡꓱ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓱꓽ ꓠꓱ ꓓꓴ ꓟꓽ ꓙꓳ ꓙꓳ ꓢꓲ ꓡꓰ ꓡꓰ ꓐꓰ ꓬꓲ. ꓛꓳ ꓒꓯ ꓐꓴ ꓔꓯ ꓠꓵ ꓠꓲ, ꓙꓳ ꓠ, ꓟ ꓟ. ꓖꓶꓽ ꓑꓱ ꓖꓶꓽ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓑꓶ. ꓓꓴ ꓬꓰ ꓐ ꓡ ꓡ?

            ꓕꓲꓽ ꓫꓵꓽ ꓡꓰ ꓙꓳˍ ꓡꓳ꓿ ꓕꓱ ꓟ ꓠꓬ ꓠꓵ ꓠꓲ, ꓗꓪ ꓐꓰ ꓥꓳ꓿ ꓬꓲ. ꓠꓬ ꓟꓲꓺ ꓠꓯ ꓞꓳ ꓤ ꓔꓯ ꓠꓲ, ꓠꓵ ꓟ ꓑꓶ. ꓓꓴ ꓠꓵ ꓠꓲ, ꓖꓳ ꓟ ꓠꓬ ꓬꓲ. ꓔꓳ, ꓙꓳ ꓠ ꓔ ꓟ ꓢꓷ. ꓙꓵ ꓟꓷꓼ ꓙꓵ ꓔꓯ ꓘꓳ ꓙ ꓙꓰ ꓐ ꓡ ꓡꓳ꓿ ꓠꓻ ꓓꓴ ꓑ ꓮ ꓙꓵꓽ ꓔꓯ ꓠꓵ, ꓠꓲ ꓗꓪ ꓐꓰ ꓜꓲꓽ ꓐ ꓡ ꓡꓳ꓿ ꓢꓴ ꓡꓰ ꓬꓲ. ꓔꓯ ꓡꓯ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓟꓽ ꓙꓲ ꓠꓯ ꓠꓯ ꓐꓰ ꓢꓰꓼ ꓗꓷ ꓥˍ ꓟꓲ ꓬꓲ. ꓫꓵˍ ꓟ ꓗꓪ ꓐꓰ ꓞꓳ ꓤ ꓮ ꓙꓵꓽ ꓔꓯ ꓚꓬꓴ. ꓟꓶ ꓡꓳ ꓐꓯ ꓟ ꓬꓲ. ꓢꓷ. ꓡꓳ꓿ ꓬꓲ. ꓫꓵˍ ꓟ ꓗꓪ ꓐꓰ ꓞꓳ ꓤ ꓮ ꓙꓵꓽ ꓠꓬ ꓐ, ꓐ, ꓐꓰ ꓗꓷ ꓶꓻ ꓡꓰ ꓟ ꓗꓪ ꓐꓰ ꓝꓮꓲ. ꓕꓲꓽ ꓧꓪ ꓠꓶꓽ ꓡꓯ ꓘꓳ ꓡꓰ ꓡꓳ ꓐꓯ ꓟ ꓬꓲ. ꓢꓷ. ꓡꓳ꓿ ꓕꓱ ꓟ ꓑꓶ. ꓓꓴ ꓬꓲ. ꓟꓲꓽ ꓕꓯ ꓢꓲ ꓗꓪ ꓫ. ꓙꓵ ꓓꓴ ꓔꓯ꓾ ꓟꓽ ꓡꓵꓺ ꓡꓵꓺ ꓔꓳ, ꓙꓳ ꓑꓶ. ꓟ ꓥꓳ꓿

            ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓮ ꓟꓶ ꓣꓳꓽ ꓠꓬ ꓫ ꓙꓵ ꓟꓷꓼ ꓙꓵ ꓓꓴ ꓔꓳ ꓙꓳ ꓔꓬ, ꓫꓵꓽˍ ꓟꓲ ꓙꓳ ꓥꓳ꓾ ꓮ ꓘꓶ. ꓫ ꓙꓵ ꓗꓪ ꓛꓲ ꓟꓽ ꓛꓲ ꓙꓰ ꓫꓵꓽ ꓟꓲ ꓙꓳˍ ꓥꓳ꓿ ꓮ ꓡꓰ ꓫꓵꓽ ꓠꓲ, ꓫ. ꓓꓴ ꓔꓯ ꓥˍ ꓟꓲ ꓣꓳꓽ ꓑꓶ. ꓑꓶ. ꓡꓰ ꓐꓰ ꓔꓳ, ꓙꓳ ꓙꓰ ꓠ, ꓟ ꓠꓬ ꓠꓵ, ꓠꓲ ꓡꓰ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓵ, ꓠꓲ ꓗꓪ ꓐꓰ ꓮ ꓙꓵꓽ ꓔꓯ ꓟꓽ ꓙꓳꓺ ꓙꓳꓺ ꓙ ꓙꓰ ꓘꓴ ꓟ ꓡꓰ ꓐꓰ ꓣꓳꓽ ꓥˍ ꓟꓲ ꓕꓱ ꓟ ꓔꓯ ꓔꓯꓺ ꓢꓳ ꓠ, ꓗ ꓡꓳ꓿

            ꓮ ꓡꓰ ꓫꓵꓽ ꓠꓵ, ꓠꓲ ꓗꓪ ꓐꓰ ꓥ ꓡ? ꓠꓵ, ꓠꓲ, ꓟꓽ ꓣꓱꓽ ꓧꓶ. ꓕꓯ ꓣꓳꓽ ꓔꓯ ꓪꓴ‐ꓢ ꓠꓲ, ꓠꓵ ꓡꓳ ꓐꓯ ꓟ ꓙꓵ ꓠ ꓗˍ ꓡꓳ꓿ ꓪꓴ‐ꓢ ꓠꓬ ꓬꓲ. ꓤ ꓔꓲ. ꓖꓶꓽ ꓗꓷ ꓗꓪ ꓛꓲ ꓣꓳꓽ ꓔꓯ ꓠꓲ, ꓠꓵˍ ꓡꓳ꓿ ꓕꓱ ꓟ ꓔꓯ ꓣꓳꓽ ꓙꓵˍ ꓕꓯ ꓢꓲ ꓒ ꓠꓬ ꓣꓳꓽˍ ꓐꓰ ꓗꓴ. ꓙꓲꓽ  ꓙꓳ ꓡ  ꓢꓲ꓾ ꓣꓳꓽ ꓔꓯ ꓠꓱ. ꓐꓯ ꓢꓴ ꓔꓯ ꓠꓲ, ꓠꓵ ꓐ ꓡ ꓠ, ꓟ ꓢꓯꓼ ꓪ ꓖꓶꓽ ꓡ ꓡꓳ꓿ ꓣꓳꓽ ꓠꓬ ꓣꓳꓽ ꓔꓯ ꓟꓽ ꓙꓳ ꓟ ꓢꓴ ꓔꓯ ꓖꓶꓽ ꓟꓽ ꓠꓻ꓾ ꓣꓳꓽ ꓔꓯ ꓙꓳ ꓟ ꓡꓰ ꓖꓶꓽ ꓠ.ˍ ꓡꓳ꓿ ꓠꓵ ꓠꓲ, ꓣꓳꓽ ꓔꓯ ꓙꓳ ꓕꓯ ꓢꓲ. ꓡꓰ ꓢꓴ ꓔꓯ ꓖꓶꓽ ꓙꓲˍ ꓡꓳ꓿

            ꓠꓴ ꓦꓲꓻ ꓘꓴ ꓗꓪ ꓠꓻ ꓓꓴ ꓑ ꓓꓴ ꓫ. ꓙꓵˍ ꓟ ꓓꓳꓺ ꓡˍ  ꓕꓯ ꓥꓪ ꓔꓯ ꓪꓴ‐ꓢ ꓡꓳ. ꓔꓬ, ꓡꓳ ꓐꓯ ꓟ ꓙꓵ ꓔ꓿ ꓟꓬꓱꓽ ꓬꓰ ꓡꓳ, ꓬꓰ ꓟ ꓗꓪ ꓟꓽ ꓓꓵꓽ ꓙ ꓔ ꓟ ꓓꓳꓺ ꓡ ꓕꓯ꓾ ꓥꓪ ꓠꓬ ꓜꓳꓽ ꓜꓳꓽ ꓬꓰ ꓔꓬ ꓡꓳ ꓮ ꓙꓵꓽ ꓠꓬ ꓪꓴ‐ꓢ ꓠꓲ, ꓡꓶ ꓥꓳ ꓐꓯ ꓢꓲ ꓛꓳ ꓫꓱ꓿ ꓢ ꓥˍ ꓟꓲ ꓫ. ꓥˍ ꓟꓲ ꓪꓴ‐ꓢ ꓔꓯ ꓔꓬ, ꓡꓳ꓾ꓠꓵ ꓠꓲꓹ ꓗꓪ ꓐꓰ ꓬꓰˍ ꓟ ꓮ ꓙꓵꓽ ꓠꓬ ꓬꓲ. ꓖꓳꓽ ꓟꓽ ꓗꓷ ꓡꓰ ꓐꓰ ꓢꓷ. ꓔ ꓕꓯ ꓣꓳꓽ ꓠꓬ ꓗ, ꓛꓲ ꓡ ꓥꓳ꓿

            ꓢ. ꓠꓯ ꓕꓯ ꓫꓵꓻ ꓥꓳ ꓢꓷ. ꓔ ꓢꓴ ꓥ ꓟ ꓢꓲ ꓒ ꓬꓰ‐ꓢꓴ ꓠꓬ ꓠꓵ ꓠꓲꓹ ꓗꓪ ꓐꓰ ꓙꓰ ꓐ ꓡ ꓟ ꓚꓱ, ꓔꓯ ꓣꓳꓽ ꓔꓯ ꓟ. ꓔꓲ. ꓖꓶꓽ ꓗꓷꓳ꓿ ꓖꓳ ꓡꓱ ꓠꓬꓲ ꓮ ꓙꓵꓽ ꓗꓪ ꓠꓵ ꓠꓲꓹ ꓣꓱꓽ ꓢꓲ ꓟꓬꓱꓽ ꓬꓰ ꓢꓳ꓿ ꓕꓱ ꓡꓱ ꓬꓰ ꓢꓴ ꓠꓬ ꓶ ꓙꓳ ꓫꓱ, ꓙꓳ ꓥꓳ꓿

ꓫ ꓟꓳ