ꓪꓴ‐ꓢ ꓡꓲꓽ ꓒꓰꓼ

ꓪꓴ‐ꓢ ꓡꓲꓽ ꓒꓰꓼ

ꓣꓦꓮ ꓔꓯ ꓠꓻ ꓠ, ꓢꓯꓼ ꓖꓶꓽ ꓔꓬ, ꓟ ꓬꓲꓼ ꓤ ꓠꓬꓲ ꓤ ꓐꓴ‐ꓳ꓾ ꓠꓬꓲ. ꓠꓬꓲ. ꓠꓯꓼ ꓠꓯꓼ ꓕꓲꓽ ꓙꓵꓹ ꓗꓪ ꓣꓳ ꓦ ꓢꓯꓼ ꓪ ꓣꓴ ꓓꓴ ꓠꓬ ꓟ‐ꓕꓲ ꓕꓳꓽ ꓶ 4ꓽ17‐20 ꓗꓪ ꓛꓲ ꓥꓳ꓿ ꓟ. ꓟꓲ ꓠꓯ.ꓼ ꓗꓪ ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓠꓬ ꓙꓵꓽ ꓗ ˍ ꓐꓰ ꓟꓷꓽ ꓠꓷ, ꓝ ꓘꓶꓽ ꓔꓯ ꓐꓬ ꓡꓰ ꓝꓲˍ ꓐꓰ ꓡ ꓡꓳ ꓕꓽ ꓓꓵꓽ ꓙ꓿ ꓐꓬ ꓡꓰ ꓝꓲˍ ꓐꓰ ꓡ ꓟ ꓟꓽ ꓥ꓾ ꓐꓲ ꓡꓰ ꓝꓲˍ ꓐꓰ ꓡ ꓟ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓬꓲ. ꓝꓲ ꓓꓴ ꓐꓴ ꓔꓯ ꓐꓯ ꓖꓶꓽ ꓡꓳ꓿

ꓬꓴ‐ꓓ ꓡ ꓞꓳ ꓐꓴ ꓕꓲꓽ ꓐꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓬꓲ. ꓠꓬ ꓣꓳꓽ ꓙꓵꓽ ꓗ ꓮ ꓙꓵꓽ ꓔꓯ ꓐꓬ ꓡꓰ ꓝꓲꓳ꓾ ꓣꓳꓽ ꓡꓲꓽ ꓣꓳ ꓒꓰꓼ ꓔꓯ ꓒꓵꓽ ꓗ ꓟꓽ ꓚꓰ ꓫꓵꓽ ꓮ ꓟꓬꓹ ꓬꓰ ꓗꓷꓳ ꓐꓰ ꓓꓵꓽ ꓙ ꓔꓬ, ꓖꓴ ꓡꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓥꓪ ꓠꓬ ꓙꓵꓽ ꓗ ꓐꓰ ꓟꓷ ꓠꓷ ꓝ ꓢꓴ ꓐꓯ ꓘꓶꓽ ꓔꓯ ꓐꓬ ꓡꓰ ꓝꓲ ꓠ, ꓟ ꓟꓽ ꓥ ꓐꓰ ꓬꓲ. ꓟꓷ ꓠꓷ ꓘꓶꓽ ꓗꓪ ꓐꓰ ꓐꓯ ꓔ ꓟ ꓥꓳ꓿

ꓡꓲꓽ ꓒꓰꓼ ꓐꓰ ꓙꓵꓽ ꓗ ꓮ ꓙꓵꓽ ꓠꓬ ꓮ ꓡꓰ ꓟ ꓔꓯ ꓕꓰꓺ ꓫꓰ. ꓠꓯ.ꓼ ꓗꓪ ꓗꓶ ꓔ ꓢꓲ ꓠꓬ ꓔꓶꓺ ꓔ ꓫꓵꓽ ꓥ ꓡ? ꓐꓰ ꓠꓻ ꓠꓬꓲ ꓓꓴ ꓙꓳˍ ꓡꓳ꓿ ꓡꓲꓽ ꓒꓰꓼ ꓐꓰ ꓗꓺ ꓚꓵꓺ ꓮ ꓙꓵꓽ ꓠꓬ ꓞꓳ ꓤ ꓐꓱ ꓶ꓾ ꓞꓳ ꓤ ꓙꓲꓻ ꓖꓴ ꓙꓳ ꓓꓴ ꓐꓱ ꓶ ꓥꓳ꓿ ꓕꓱ ꓟ ꓔꓯ ꓢꓲ ꓒ ꓬꓰ‐ꓢꓴ ꓢꓷ. ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓤ ꓐꓱ ꓶ ꓣꓱꓽ ꓟꓽ ꓬꓯꓼ ꓟ꓾ ꓞꓳ ꓤ ꓐꓱ ꓶ ꓙꓲ ꓖꓴ ꓟꓽ ꓙꓳ ꓟ ꓔꓯ ꓬꓲ. ꓡꓰ ꓒꓬ, ꓦ ꓗꓷ ꓡꓳ꓿

ꓔꓯꓺ ꓥꓳꓽ ꓐꓯ ꓠꓬ ꓢꓲ ꓒ ꓦꓬꓼ ꓠꓬꓲ ꓗꓪ ꓠꓻ ꓫꓬ, ꓟꓽ ꓓ꓾ ꓝꓴꓲ. ꓙꓳ ꓢꓴ ꓐꓰ ꓕꓲꓽ ꓪ ꓔꓬ, ꓟꓽ ꓓ꓾ ꓕꓱ ꓡꓱ ꓫꓵꓽ ꓙꓵꓽ ꓗ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓒꓬ, ꓗꓷ ꓢꓲ꓾ ꓟꓴ ꓗꓪ ꓗꓪ ꓟ ꓐ, ꓐ ꓠꓲ, ꓡꓶ ꓮ ꓡꓰ ꓙꓳˍ ꓟ ꓬꓲ. ꓟꓳ. ꓖꓶꓽˍ ꓡꓳ꓿

ꓞꓳ ꓤ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓮ ꓙꓵꓽ ꓔꓯ ꓬꓲ. ꓫꓵꓼ ꓬꓲ. ꓫꓬ, ꓔꓶꓺ ꓗꓷ ꓡꓳ꓿

ꓞꓳ ꓤ ꓠꓬ ꓡꓲꓽ ꓒꓰꓼ ꓐꓰ ꓙꓵꓽ ꓗ ꓐꓱ ꓶ ꓫꓬ, ꓔ ꓫꓵꓽ ꓟꓽ ꓥ꓾ ꓡꓲꓽ ꓒꓰꓼ ꓐꓰ ꓙꓵꓽ ꓗ ꓠꓬ ꓞꓳ ꓤ ꓐꓱ ꓶ ꓫꓬ, ꓔ ꓫꓵꓽ ꓥꓳ꓿ ꓝꓮꓲ꓾ ꓢꓲ ꓒ ꓬꓰ‐ꓢꓴ ꓠꓬ ꓣꓳꓽ ꓮ ꓡꓰ ꓫꓵꓽ ꓟꓬꓱꓽ  ꓔꓯ  ꓮ ꓡꓰ ꓐꓰ ꓬꓰˍ ꓠꓬ꓾ ꓮ ꓡꓰ ꓐꓰ ꓪꓽ ꓘꓴ ꓠꓬ꓾ ꓮ ꓡꓰ ꓐꓰ ꓞꓳ ꓫꓱ,ˍ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓛꓲ ꓬꓰ ꓡꓳ ꓐꓯ ꓟ ꓔꓯ ꓣꓳꓽ ꓔꓯ ꓙ ꓖꓴ ꓟ. ꓔꓲ. ꓖꓶꓽ ꓗꓷ ꓟ ꓥꓳ꓿

ꓙꓵꓽ ꓗ ꓐꓰ ꓡꓲꓽ ꓒꓰꓼ ꓙꓳ ꓟ ꓑꓶ. ꓓꓴ ꓣꓳ ꓢꓯꓼ ꓕꓵꓼˍ ꓟ ꓟꓽ ꓥ ꓥ ꓐꓰ ꓣꓳꓽ ꓠꓲ, ꓟ ꓠꓯꓼ ꓗꓪ ꓐꓰ ꓓꓳꓺ ꓡˍ ꓟ ꓠꓵ ꓠꓲ, ꓗꓪ ꓐꓰ ꓢꓯꓼ ꓕꓵꓼ ꓠ, ꓟ ꓢꓲ ꓒ ꓣꓳꓽ ꓔꓯ ꓟ. ꓔꓲ. ꓖꓶꓽ ꓟ ꓥꓳ꓿ ꓣꓱꓽ ꓬꓯꓼ ꓟ ꓡꓲꓽ ꓒꓰꓼ ꓔꓯ ꓠꓬ ꓡꓯ ꓫꓴ ꓫꓺ ꓔ ꓢꓲ꓾ ꓣꓱꓽ ꓟ ꓬꓯꓼ ꓟ ꓡꓲꓽ ꓒꓰꓼ ꓔꓯ ꓡꓳ ꓩꓴ ꓗꓷ ꓠ, ꓟ ꓢꓲ ꓒ ꓣꓳꓽ ꓔꓯ ꓟ. ꓖꓶꓽ ꓡ ꓟ ꓥꓳ꓿

ꓪꓴ‐ꓢ ꓙꓵꓽ ꓗ ꓠꓽ ꓐꓲ ꓜꓲꓼˍ ꓡꓳ꓿ ꓞꓳ ꓤꓽ ꓙꓵꓽ ꓗ ꓠꓽ ꓟꓽ ꓐꓲ ꓜꓲꓼ꓿ ꓖꓳ ꓡꓱ ꓠꓬꓲ ꓣꓳꓽ ꓡꓲꓽ ꓒꓰꓼ ꓮ ꓙꓵꓽ ꓔꓯ ꓪꓴ‐ꓢ ꓠꓲ, ꓧꓳ, ꓟ ꓒꓬꓱꓼ ꓡ ꓠ, ꓟˍ ꓟꓲ ꓮ ꓘꓶ. ꓬꓮꓳ. ꓚꓲˍ ꓟ ꓥꓳ꓿

ꓮ ꓙꓵꓽ ꓢꓴ ꓪꓴ‐ꓢ ꓠꓲ, ꓡꓶ ꓔꓯ ꓛꓳ ꓐ ꓡ ꓝꓲ꓿