ꓒ-ꓡꓲ-ꓢꓷ ꓐꓴ ꓔꓯ ꓕꓼ_ ꓟ

ꓬꓰ-ꓢꓴ ꓠꓬ ꓫꓸ ꓔꓬ ꓢꓴ꓾ ꓢꓴ ꓡꓰ ꓠꓬꓲ ꓟꓽ ꓟꓳ ꓢꓴ꓾ ꓝꓴꓲ ꓙꓳ ꓢꓴ ꓔꓯ ꓮ ꓘꓶꓸ ꓠꓲꓹ ꓠꓵ_ ꓟ ꓥꓳ= ꓖꓳ ꓟ ꓑꓶ ꓓꓴ ꓬꓲ ꓪ ꓐꓰ ꓕꓲ ꓪꓼ ꓮ ꓕꓯ ꓥ ꓟꓲ ꓔꓬ ꓢꓲ ꓬꓲ ꓪ ꓔꓯ ꓔꓱꓹ ꓜꓳ ꓠꓹ ꓟ ꓟꓸ ꓖꓶ ꓐꓬꓱ ꓖꓶ_ ꓟ ꓥꓳ= ꓫꓱꓸ ꓤ ꓠꓲꓹ ꓐꓰ ꓠꓵ ꓠꓲꓹ ꓪꓴꓽ ꓢꓴ ꓬꓰ-ꓢꓴ ꓠꓬ ꓒ-ꓡꓲ-ꓢꓷ ꓐꓴ ꓔꓯ ꓟꓳꓻ ꓟ ꓙꓵꓹ ꓕꓯ ꓡꓰ ꓬꓲ ꓪ ꓔꓯ ꓕꓼ ꓟ ꓐꓯ ꓔꓳꓹ ꓔ ꓟ ꓕꓱ ꓡꓱ ꓐꓯ_ ꓟ ꓥꓳ= ꓕꓱ ꓟ ꓠꓬ ꓬꓲ ꓪ ꓔꓯ ꓠꓲꓹ ꓜꓳ ꓟ ꓑꓶ ꓓꓴ ꓟꓽ ꓥ꓾ ꓬꓲ ꓪ ꓔꓯ ꓠꓲꓹ ꓠꓵ_ ꓟ ꓑꓶ ꓓꓴ ꓥ ꓡꓳ=

ꓠꓬꓲꓸ ꓠꓬꓲ ꓟ ꓢꓲ ꓫꓬ ꓕꓳ ꓶ ꓝꓲꓸ ꓥ ꓟ ꓡꓴ-ꓘ 11ꓽ42-46 ꓗꓪ ꓬꓰ-ꓢꓴ ꓡꓰ ꓒ-ꓡꓲ-ꓢꓷ ꓐꓴ ꓔꓯ ꓕꓼ_ ꓟ ꓚꓱꓹ ꓟꓳ ꓪ ꓡꓳ= ꓒ-ꓡꓲ-ꓢꓷ ꓐꓴꓳ꓾ ꓠꓴ ꓪ ꓠꓽ ꓫꓸ ꓙꓵ_ ꓥꓳ= ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓽ ꓑꓴꓸ ꓧꓳ_ ꓐꓰ ꓠꓸ ꓐꓳꓽ ꓪꓳꓽ_ ꓐꓰ ꓪꓳ ꓫꓵꓽ ꓪꓳꓽ ꓙꓰꓽ ꓞꓲ ꓐꓱ ꓕꓲ ꓐꓱ ꓪꓴ-ꓢ ꓔꓯ ꓔꓲ ꓖꓶ_ ꓡꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓔꓯ ꓔꓱꓹ ꓜꓳ_ ꓟ_ ꓐꓰ ꓠꓵ ꓠꓲꓹ ꓔꓯ ꓠꓴ ꓪ ꓡꓳꓸ ꓘꓳ ꓗꓷꓳ꓾ ꓐꓰ ꓬꓰ-ꓢꓴ ꓡꓰ ꓐꓯ ꓖꓶ_ ꓟ ꓥꓳ=

ꓮ ꓙꓵ ꓔꓯ ꓢꓷꓸ ꓡꓳꓹ ꓬꓰ ꓢꓴ ꓬꓰ-ꓢꓴ ꓠꓬ ꓬꓲ ꓪ ꓠꓲꓹ ꓟ ꓘꓴꓽ ꓗꓪ ꓓꓵꓽ ꓙ_ ꓟ꓾ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ_ ꓟ ꓮ ꓙꓵ ꓔꓯ ꓢꓷꓸ ꓔ ꓟ ꓥꓳ= ꓕꓯꓽ ꓢꓲ ꓗꓪ ꓡꓳꓸ ꓐꓲ ꓓꓴ ꓭꓸ ꓘꓴꓽ ꓦ ꓒꓴ ꓟꓰ ꓔ ꓢꓲ꓾ ꓠꓯꓸꓼ ꓗꓪ ꓠꓽ ꓫꓵꓻ ꓪꓳꓽ ꓔꓳ_ ꓐꓰ ꓟꓽ ꓫꓬ ꓟꓽ ꓐꓲ ꓞꓹ ꓟ ꓡꓱꓽ ꓜꓴ_ ꓡꓰ ꓐꓰ ꓗꓹ ꓡꓳ꓾ ꓐꓰ ꓐꓯ ꓖꓶ_ ꓟ ꓥꓳ= ꓕꓱ ꓟꓬ ꓫꓱꓸ ꓤ ꓠꓲꓹ ꓪꓴꓽ ꓢꓴ ꓬꓰ-ꓢꓴ ꓠꓬ ꓮ ꓫꓵ ꓑꓶ ꓓꓴ ꓕꓱ ꓡꓱ ꓐꓯ_ ꓡ? ꓕꓱ ꓟ ꓠꓬ ꓬꓲ ꓪ ꓠꓽ ꓕꓯꓽ ꓢꓲ ꓗꓪ ꓞꓳ ꓤ ꓟꓲ ꓕꓯ ꓗꓪ ꓠꓬ ꓮ ꓘꓶꓸ ꓙꓲ_ꓟ ꓮ ꓘꓶꓸ ꓔꓱ_ ꓟ ꓡꓰ ꓐꓰ ꓗꓹ ꓢꓲ꓾ ꓘꓳ ꓫꓱꓸ ꓫꓱꓸ ꓗꓪ ꓠꓬ ꓟꓽ ꓔꓱ_ ꓟ ꓑꓶ ꓓꓴ ꓥ ꓡꓳ=

ꓣꓳ ꓥ ꓟꓲ ꓣꓳ ꓚꓲ ꓛꓬ ꓔꓱꓹ ꓕ ꓠꓹ ꓟ ꓠꓬ ꓣꓳ ꓓꓵꓽ ꓙ_ ꓟ꓾ ꓣꓳ ꓫꓸ ꓕꓱ_ ꓟ꓾ ꓬꓰ ꓗꓷ ꓟ ꓟꓬꓱꓽ ꓕꓱ ꓡꓱ ꓮ ꓙꓵꓽ ꓔꓯ ꓥꓪ ꓮ ꓫꓵ ꓑꓶ ꓓꓴ ꓕꓱ ꓟ ꓬꓰ_ ꓡ? ꓐꓰ ꓧꓶꓸ ꓕꓯ ꓣꓳ ꓚꓲ ꓛꓬ ꓓꓵꓽ ꓙ ꓢꓲ ꓠꓽ ꓠꓬꓲ ꓠꓹ ꓟ ꓥꓳ= ꓪꓴ-ꓢ ꓔꓯ ꓠꓲꓹ ꓠꓵ_ ꓟ ꓐꓰ ꓣꓳ ꓐꓰ ꓠꓶꓽ ꓞꓹ ꓢꓴ ꓔꓯ ꓠꓲꓹ ꓠꓵ_ ꓟ ꓕꓱ ꓠꓬꓲꓽ ꓚꓱꓹ ꓐꓰ ꓟꓽ ꓥ ꓠꓬ ꓣꓳ ꓝꓮꓲ ꓓꓵꓽ ꓙ ꓔꓱꓹ ꓕ ꓠꓹ ꓟ ꓥ ꓡꓳ= ꓪꓴ-ꓢ ꓠꓬ ꓣꓳ ꓠꓲꓹ ꓟ ꓘꓴꓽ ꓗꓪ ꓡꓰ ꓠꓬꓲꓸ ꓠ ꓔ ꓟ ꓥꓳ= ꓠꓲꓹ ꓟ ꓘꓴꓽ ꓗꓪ ꓡꓰ ꓛꓳ_ ꓟ ꓪꓴ-ꓢ ꓔꓯ ꓙꓵꓻ ꓢꓴ ꓠꓬ ꓕꓯꓽ ꓢꓲ ꓗꓪ ꓓꓰ ꓢ ꓠꓲꓹ ꓟ ꓘꓴꓽ  ꓔꓱ ꓠꓹ ꓟ ꓢꓲ ꓫꓬ ꓠꓹ ꓟ ꓙ ꓖꓶ ꓠ ꓔ ꓡꓳ= ꓣꓳ ꓬꓰ_ ꓟ ꓥ ꓔ ꓑꓳꓸ ꓔꓯ ꓙꓲ_ ꓟ ꓐꓰ ꓠꓵ ꓠꓲꓹ ꓐꓰ ꓬꓰ ꓠꓹ ꓟ ꓣꓳꓸ ꓚꓵ_ ꓟ ꓥꓳ= ꓟꓽ ꓥ ꓠꓬ ꓬꓰ-ꓢꓴ ꓡꓰ ꓒ-ꓡꓲ-ꓢꓷ ꓐꓴ ꓔꓯ ꓐꓯ ꓖꓶ_ ꓟ ꓡꓰ ꓐꓰ ꓫꓸ ꓙꓵ_ ꓡꓳ ꓐꓰ ꓐꓯ ꓡ ꓟ ꓥꓳ=