ꓘꓷ-ꓠ ꓤ ꓟꓶ ꓤ ꓬꓲ ꓙꓵꓻ ꓠꓲꓹ

ꓪꓴ-ꓢ ꓠꓬ ꓙꓲ ꓡꓳꓹ ꓬꓰ ꓢꓴ ꓥ ꓡꓳ= ꓣꓳ ꓙꓵꓻ ꓠꓲꓹ ꓐꓰ ꓶꓽ ꓓꓰ_ ꓟ ꓥ ꓕ ꓑꓳꓸ ꓔꓯ ꓖꓶ ꓐ ꓡ ꓢꓴ ꓥ ꓡꓳ= ꓕꓲ ꓧꓪꓹ ꓧꓪ ꓠꓬ ꓣꓳ ꓶꓽ ꓓꓰ ꓪꓽ ꓘꓴ ꓥ ꓟꓲ ꓣꓳ ꓠꓲꓹ ꓫꓵ_ ꓟ ꓔꓯ ꓞ ꓞ ꓟꓽ ꓪ꓾ ꓬꓲ ꓙꓵꓹ ꓕꓲ ꓟ ꓡꓳꓼ ꓬꓰ ꓕꓯ ꓢꓲ ꓪ ꓡ_ ꓟ ꓥꓳ= ꓫꓱꓸ ꓤ ꓠꓵ ꓠꓲꓹ ꓖꓶ_ ꓟ ꓪꓴ-ꓢ ꓠꓬ ꓣꓳ ꓔꓯ ꓮ ꓘꓶꓸ ꓠꓲꓹ ꓠꓵ_ ꓟ ꓥꓳ= ꓣꓳ ꓶꓽ ꓓꓰ_ ꓟ ꓔꓯ ꓟꓽ ꓖꓶ ꓟꓽ ꓬꓰ꓾ ꓤ ꓠꓱ ꓟꓹ ꓟ ꓬꓲꓸ ꓤ ꓠꓱ ꓔꓯ ꓟꓲ ꓡꓰ ꓥ ꓟꓲ ꓪꓴ-ꓢ ꓠꓬ ꓣꓳ ꓔꓯ ꓟꓽ ꓟꓲ ꓕꓱ ꓟꓬ ꓗꓪ ꓛꓲ ꓠꓲꓹ ꓠꓵ_ ꓟ ꓥꓳ= ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓘꓷ-ꓠ ꓤ ꓟꓶ ꓤ ꓕꓲ ꓣꓳ ꓠꓬ ꓬꓲ ꓮ ꓟꓲꓽ ꓗꓪ ꓠꓲꓽ ꓜꓶ ꓞꓹ ꓟ ꓔꓯ ꓬꓰ-ꓢꓴ ꓔꓯ ꓫꓬꓹ ꓖꓶ ꓠꓹ ꓟ ꓶ ꓓꓰꓽ_ ꓟ ꓥꓳ= ꓬꓲꓸ ꓪꓴꓸ ꓕꓲꓽ ꓫꓵꓽ ꓠꓬ ꓬꓲ ꓕꓱ ꓡꓱ ꓐꓯ ꓥ ꓟꓲ ꓬꓰ-ꓢꓴ ꓠꓽ ꓕꓲ ꓘꓶꓽ_ ꓟꓲ ꓟꓽ ꓒꓳꓹ ꓖꓶ_ ꓟ ꓥꓳ= ꓠꓬꓲꓽ ꓫꓵ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓬꓲ ꓔꓯ ꓬꓲꓼ ꓙꓰ ꓝꓲ ꓠꓹ ꓟ ꓬꓰ-ꓢꓴ ꓔꓯ ꓐꓯ_ ꓟ ꓥꓳ= ꓢ ꓫꓵꓽ ꓕꓲ ꓫꓵꓽ ꓠꓬ ꓬꓲ ꓙꓵꓻ ꓠꓲꓹ ꓔꓯ ꓤ ꓠꓬꓲ_ ꓟ ꓫꓸ ꓕꓱ ꓘꓶꓽ ꓬꓰ-ꓢꓴ ꓡꓰ ꓣꓱꓽ ꓟ ꓥꓳ= ꓖꓳ ꓡꓱ ꓥ ꓟꓲ ꓘꓷ-ꓠ ꓤ ꓟꓶ ꓤ ꓠꓬ ꓙꓵꓻ ꓠꓲꓹ ꓕꓶ ꓕꓶ ꓡꓰ ꓶꓽ ꓓꓰ ꓪꓽ ꓘꓴ ꓠꓬ ꓪ ꓡ ꓥꓳ ꓐꓰ ꓙꓵꓻ ꓢꓲ ꓡꓳꓸ ꓔꓬ ꓟ ꓑꓶ ꓓꓴ ꓬꓰ-ꓢꓴ ꓡꓰ ꓬꓲ ꓔꓯ ꓫꓱꓸ ꓖꓶ_ ꓟ ꓥꓳ= ꓙꓵꓻ ꓠꓲꓹ ꓑꓶ ꓓꓴ ꓬꓲ ꓮ ꓟꓲꓽ ꓥ ꓟꓲ ꓓꓻ ꓡꓰ ꓟ ꓔꓯ ꓟꓳ ꓪ_ ꓡꓳ= ꓣꓳ ꓥ ꓟꓲ ꓬꓲ ꓡꓰ ꓐꓰ ꓙꓵꓻ ꓠꓲꓹ ꓐꓰ ꓶꓽ ꓓꓰ ꓪꓽ ꓘꓴ ꓗꓴꓸ ꓠꓹ ꓟ ꓮ ꓫꓵ ꓘꓶꓻ ꓡꓶ ꓓꓴ ꓙꓳ ꓥ ꓟꓲ ꓙꓵꓻ ꓠꓲꓹ ꓐꓰ ꓙ ꓫꓱꓽ ꓠꓹ ꓟ ꓥꓳ=