ꓛꓬ ꓢꓴ ꓔꓯ ꓖꓽ ꓖꓶ ꓠꓯꓹ ꓟ

    ꓚꓲ ꓛꓬ ꓠꓶꓽ ꓛꓳ ꓕꓲ ꓛꓳ ꓡꓰ ꓛꓬ ꓡˍ ꓟ ꓝꓴꓲꓸ ꓔꓯ ꓖꓽ ꓖꓶ ꓟꓽ ꓐ ꓡ ꓠꓬꓲ ꓪꓽ ꓛꓴ ꓚꓱꓹ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓢꓴ ꓐꓴ ꓔꓯ ꓠꓽ ꓗꓷ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓐꓴ ꓔꓯ ꓟꓸ ꓖꓶ ꓔꓬ ꓟ ꓥ ꓡꓳ= ꓪꓽ ꓛꓴ ꓚꓱꓹ ꓠꓲꓹ ꓫꓵˍ ꓟ ꓠꓲꓹ ꓟ ꓠꓬ ꓡ ꓞꓳ ꓠꓲꓹ ꓟ ꓔꓯ ꓙꓱꓽ ꓤ ꓠꓲꓹ ꓟ ꓒꓬꓱꓼ ꓡꓰ ꓠ ꓒꓳꓹ ꓡꓶꓸ ꓗꓷ ꓐ ꓡˍ ꓡꓳ= ꓙꓳꓺ ꓠꓲꓹ꓾ ꓦꓶ ꓠꓲꓹ ꓐꓰ ꓟꓽ ꓠꓲꓹ ꓠꓵꓻ ꓟ ꓠꓲꓹ ꓟ ꓠꓬ ꓪꓽ ꓛꓴ ꓚꓱꓹ ꓠꓲꓹ ꓫꓵˍ ꓟ ꓗꓸ ꓠꓯ ꓢꓲꓺ ꓗꓪ ꓑꓬ ꓔꓬ ꓥꓳ= ꓪꓽ ꓛꓴꓽ ꓚꓱꓹ ꓐꓯ ꓟ ꓠꓬ ꓣꓳ ꓔꓯ ꓢꓴ ꓡꓰ ꓟꓽ ꓙꓲꓻ ꓟ ꓬꓰ ꓡˍ ꓕꓯ꓾ ꓟꓽ ꓔꓱꓹ ꓟ ꓬꓰ ꓡˍ ꓕꓯ꓾ ꓣꓳ ꓔꓯ ꓮ ꓔꓳꓺ ꓔꓳꓺ ꓟꓽ ꓒꓵꓽ ꓟꓽ ꓚꓬꓹ ꓬꓰ ꓗꓷ ꓕꓯ ꓖꓳ ꓕꓲ ꓣꓳ ꓔꓯ ꓣꓳ ꓠꓲꓹ ꓟ ꓦꓶˍ ꓟ ꓡꓰ ꓐꓰ ꓦꓶ ꓡꓰ ꓠ꓾ ꓣꓳ ꓠꓲꓹ ꓟ ꓫ ꓗꓷ ꓟ ꓡꓰ ꓐꓰ ꓫꓸ ꓡꓰ ꓠ ꓬꓲ ꓔꓯ ꓝꓮꓲ ꓕꓲ ꓧꓪꓹ ꓬꓰ ꓖꓶˍ ꓟ ꓔꓯ ꓐꓯ ꓟ ꓥ ꓡꓳ= ꓟꓽ ꓠꓲꓹ ꓠꓵꓻ ꓟ ꓐꓰ ꓪꓽ ꓛꓴꓽ ꓚꓱꓹ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓡˍ ꓕ ꓑꓳꓸ ꓣꓳ ꓧꓪꓽ ꓖꓳ ꓓꓱꓽ ꓗꓪ ꓐꓰ ꓓꓳꓼ ꓕꓲ ꓫꓵꓽ ꓓꓳ ꓡˍ ꓟ ꓐꓰ ꓕꓱ ꓟ ꓠꓬ ꓞꓳ ꓤ ꓔꓯ ꓮ ꓤ ꓤ ꓫꓵꓻ ꓡꓰ ꓝꓲˍ ꓟ ꓠꓻ ꓔꓯ ꓒꓬꓱꓼ ꓡ ꓝꓲˍ ꓟ ꓔꓯ ꓠꓯꓻ ꓞꓲꓼ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓔ ꓟ ꓙꓳˍ ꓡꓳ=

   ꓕꓲ ꓣꓳ ꓣꓳ ꓔꓯ ꓮ ꓘꓶꓸ ꓠꓬꓲ ꓐꓴˍ ꓕꓯ꓾ ꓠꓲꓹ ꓢꓲꓼ ꓡˍ ꓕꓯ ꓫꓵꓽ ꓓꓯˍ ꓟ꓾ ꓛꓲ ꓒꓯꓹ ꓡꓯ ꓒꓯꓹ ꓛꓱꓽˍ ꓟ꓾ ꓠꓲꓹ ꓟ ꓠꓻ ꓒꓬꓱꓼ ꓡˍ ꓟ ꓾ ꓦꓰꓼ ꓟ ꓠꓻ ꓡˍ ꓟ꓾ ꓬꓲ ꓙꓴꓽ ꓠꓽ ꓡꓰˍ ꓟ ꓒꓬꓱꓼ ꓡ ꓗꓴꓸˍ ꓡꓳ= ꓪꓽ ꓛꓴꓽ ꓚꓱꓹ ꓠꓲꓹ ꓫꓵˍ ꓟ ꓠꓲꓹ ꓟ ꓠꓬ ꓡ ꓞꓳ ꓕꓲ ꓣꓳ ꓬꓲ ꓪꓽ ꓠꓬꓲˍ ꓟ꓾ ꓬꓲ ꓬꓰ ꓐ ꓡˍ ꓟ ꓔꓯ ꓠꓲꓸ ꓡꓰ ꓝꓲ ꓞꓰ ꓡꓰ ꓝꓲ ꓢꓲ ꓠꓬꓲ꓾ ꓬꓲ ꓒꓵꓽ ꓒꓵꓽˍ ꓟ ꓣꓳ ꓬꓲ ꓙꓵꓹ ꓥ ꓟꓲ ꓮ ꓔꓳ ꓗꓷ ꓡꓰ ꓝꓲˍ ꓡꓳ= ꓪꓽ ꓛꓴꓽ ꓚꓱꓹ ꓠꓲꓹ ꓫꓵˍ ꓟ ꓠꓲꓹ ꓟ ꓠꓬ ꓞꓳ ꓤ ꓧꓪꓽ ꓖꓳ ꓓꓱꓽ ꓐꓱ ꓶˍ ꓟꓲ ꓙꓲꓻ ꓖꓴ ꓟꓽ ꓙꓳ ꓠꓬꓲ ꓚꓲ ꓛꓬ ꓤꓶꓻ ꓪꓴꓽ ꓡ ꓟꓴ ꓡ ꓠꓲꓹ ꓫꓵ ꓢꓴ ꓠꓬ ꓮ ꓕꓯ ꓟꓲ ꓪꓽ ꓛꓴꓽ ꓚꓱꓹ ꓟ ꓟꓽ ꓬꓰ= ꓣꓳ ꓑꓶꓸ ꓓꓴ ꓾ ꓣꓳ ꓟꓽ ꓙꓲꓻ ꓟ ꓑꓶꓸ ꓓꓴ ꓮ ꓟꓬꓹ ꓠꓲꓹ ꓟ ꓫ ꓡꓰ ꓟ ꓠꓱꓸ ꓐꓯ ꓢꓴ ꓗꓪ ꓐꓰ ꓥ ꓟꓲ꓾ ꓪꓴ-ꓢ ꓗꓪ ꓐꓰ ꓥˍ ꓟꓲ ꓝꓴꓲꓸ ꓖꓼ ꓖꓶˍ ꓟ ꓟꓶ ꓠꓲꓹ ꓫꓵ ꓢꓴ ꓥ ꓟ ꓣꓳ ꓐꓴ ꓠꓬ꓾ ꓣꓳ ꓔꓯ ꓠꓻ ꓡꓰ ꓝꓲ ꓢꓴ꓾ ꓣꓳ ꓔꓯ ꓟꓽ ꓙꓲꓻ ꓢꓴ ꓐꓴ ꓔꓯ ꓫꓱꓸ ꓤ ꓠꓲꓹ ꓗꓪ ꓐꓰ ꓖꓽ ꓖꓶ ꓠ ꓗˍ ꓡꓳ=

“ ꓠꓴ ꓪ ꓮꓽ ꓟ ꓥˍ ꓟꓲ꓾ ꓠꓲꓹ ꓟ ꓠꓯꓸꓼ ꓗꓪ ꓐꓰ ꓠꓴ ꓬꓲꓼ ꓠꓴ ꓠꓬꓲ ꓔꓯ ꓟꓽ ꓖꓽ ꓖꓶ ꓠꓬ꓾ ꓟꓴ ꓗꓪ ꓗꓪ ꓔꓬ ꓟ ꓥꓪ ꓐꓹ ꓐꓽˍ ꓟꓲ ꓖꓳ ꓟˍ ꓡꓰ ꓐꓰ ꓠꓴ ꓪ ꓔꓯ ꓬꓰ ꓖꓶ ꓡˍ ꓥꓳ꓾” (ꓟ-ꓕꓲ 18ꓽ35)