ꓤ ꓟꓶ ꓝꓱ ꓑꓮꓲ ꓔꓯ ꓥꓳꓽ

ꓟꓲ ꓠꓯ ꓕꓱ ꓟ ꓕꓯꓽ ꓢꓲꓺ ꓗꓪ ꓢꓯꓼ ꓟꓽ ꓐꓽ ꓢꓴ ꓟꓽ ꓙꓳ ꓟˍ ꓡꓰ ꓐꓰ꓾ ꓝꓴꓲꓸ ꓟꓽ ꓬꓰ ꓠꓬꓲ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ= ꓚꓲ ꓛꓬ ꓬꓰ ꓛꓬꓻ ꓗꓷ ꓟ ꓝꓴꓲꓸ ꓔꓯ ꓪꓴ-ꓢ ꓟꓲ ꓙꓬ ꓗꓪ ꓐꓰ ꓚꓵ ꓔ ꓟꓽ ꓐ ꓡ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟꓸ ꓖꓶ ꓔ ꓟ ꓥ ꓡꓳ=  ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓕꓲ 22ꓽ1-14 ꓗꓪ ꓠꓬ ꓟꓴ ꓗꓪ ꓗꓴꓷꓼ ꓠꓬ ꓪ ꓔꓲ ꓕꓲ ꓣꓳ ꓡꓰ ꓬꓲ ꓤ ꓐꓱ ꓶ ꓤ ꓟꓶ ꓝꓱ ꓑꓮꓲ ꓕꓲ ꓟ ꓬꓰ ꓖꓶˍ ꓟˍ ꓡꓰ ꓐꓰ ꓗꓹ ꓡꓳ꓾ ꓐꓰ ꓬꓰ-ꓢꓴ ꓡꓰ ꓐꓯ ꓡꓳ= ꓪ ꓔꓲ ꓠꓬ ꓡꓯ ꓒꓯ ꓝ ꓑꓮꓲ ꓗꓪ ꓡ ꓠꓹ ꓟ ꓘꓴ ꓔ ꓢꓴ ꓐꓴ ꓔꓯ ꓘꓴ ꓬꓰ ꓠꓹ ꓟ ꓬꓲ ꓚꓳ ꓑ ꓐꓴ ꓔꓯ ꓝꓲ ꓩꓴ ꓗꓷˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓬ ꓕꓲ ꓣꓳ ꓠꓬ ꓶ ꓡꓯꓼ ꓟꓴ ꓙꓰ꓾ ꓕꓲ ꓣꓳ ꓠꓬ ꓚꓲ ꓛꓬ ꓦ ꓟꓲ ꓗꓪ ꓙꓰ꓾ ꓜꓰꓻ ꓞꓹ ꓢꓴ ꓐꓴ ꓠꓬ ꓚꓳ ꓑ ꓐꓴ ꓔꓯ ꓣꓴ ꓢꓲ ꓘꓶꓻ ꓙꓵ ꓠꓬꓲ ꓬꓰ ꓢꓲ ꓬꓲ ꓪ ꓔꓯ ꓢꓰꓼ ꓗꓷˍ ꓡꓳ= ꓖꓳ ꓕꓯ ꓪ ꓔꓲ ꓠꓬ ꓠꓲꓹ ꓟ ꓦꓶ ꓡꓰ ꓢꓲ ꓠꓬꓲ ꓟꓯꓼ ꓜꓴ ꓝꓲ ꓩꓴ ꓗꓷ ꓢꓲ ꓚꓳ ꓑ ꓔꓯ ꓢꓰꓼ ꓢꓴ ꓖꓳ ꓕꓲ ꓧꓳꓽ ꓟ ꓔꓯ ꓛꓴ ꓛꓰꓹ ꓡꓰ ꓝꓲ ꓢꓲ ꓠꓬꓲ ꓬꓲ ꓪ ꓡꓳ ꓒꓱ ꓔꓯˍ ꓟꓲ ꓛꓴ ꓗꓷˍ ꓡꓳ=

ꓝꓮꓲ ꓪ ꓔꓲ ꓡꓰ ꓬꓲ ꓚꓳ ꓑꓸ ꓔꓯ ꓙ ꓖꓴ ꓙ ꓐꓽ ꓗꓪ ꓔꓳꓹ ꓜꓳꓽˍ ꓟ ꓡ ꓞꓳ ꓥ ꓕ ꓑꓳꓸ꓾ ꓞꓳ ꓥꓶ ꓞꓳ ꓙꓲꓻ ꓮ ꓙꓵꓽ ꓔꓯ ꓘꓴ ꓜꓲꓼ ꓡ ꓢꓲ ꓠꓬꓲ ꓑꓮꓲ ꓬꓰ ꓖꓴ ꓗꓪ ꓐꓲ ꓡꓰ ꓝꓲˍ ꓡꓳ꓾ ꓐꓰ ꓐꓯ ꓔ ꓡꓳ= 

ꓡꓯ ꓒꓯꓹ ꓝ ꓑꓮꓲꓽ ꓐꓯ ꓗꓷ ꓠꓬ ꓑꓮꓲꓽ ꓗꓪ ꓞꓳ ꓤ ꓮ ꓟꓬꓹ ꓡˍ ꓟ ꓔꓯ ꓣꓳ ꓢꓷꓸ ꓔ ꓟ ꓥ ꓡꓳ= ꓩꓴ-ꓡꓲ-ꓫꓵ ꓗꓪ ꓬꓰˍ ꓟ ꓡꓯ ꓒꓯꓹ ꓝ ꓑꓮꓲꓽ ꓠꓬ ꓞꓳ ꓦꓲꓻ ꓕꓲ ꓦꓲꓻ ꓑꓮꓲꓽ ꓡꓰꓽ ꓟꓽ ꓥ꓾ ꓕꓲ ꓫꓵꓽ ꓕꓲ ꓧꓪꓺ ꓡꓱꓸꓼ꓾ ꓞꓳ ꓜꓴ ꓕꓲ ꓜꓴ ꓟ ꓑꓮꓲꓽ ꓥ ꓡꓳ= ꓟꓯꓸ ꓡꓯꓸ ꓒ ꓐꓰ ꓟꓯꓸ ꓡꓯꓸ ꓟ ꓐꓴ ꓡꓰꓽ ꓗꓹ ꓛꓲꓽ ꓪˍ ꓟ ꓑꓮꓲꓽ ꓟꓽ ꓥ꓾ ꓕꓲ ꓫꓵꓽ ꓕꓲ ꓧꓪ ꓡꓱꓸꓼ ꓗꓹ ꓛꓲꓽ ꓪˍ ꓟ ꓑꓮꓲꓽ ꓥ ꓡꓳ=

ꓖꓳ ꓡꓱ ꓥ ꓠꓬꓲ ꓡꓯ ꓒꓯ ꓝꓸ ꓑꓮꓲꓽ ꓗꓪ ꓡ ꓢꓴ ꓡ ꓞꓳ ꓮ ꓟꓬꓹ ꓟ ꓘꓴꓽ ꓗꓪ ꓕꓲ ꓣꓳ ꓠꓬ ꓠꓱꓸ ꓐꓯ ꓢꓴ ꓐꓰ ꓕꓲ ꓪ ꓟꓽ ꓔꓬ= ꓕꓱ ꓟꓬ ꓟꓬꓽˍ ꓟ ꓞꓳ ꓜꓴ ꓗꓪ ꓕꓱ ꓕꓲ ꓣꓳ ꓟ ꓡꓰꓽ ꓔꓲꓺ ꓢꓲꓽ ꓢꓲꓽ ꓡꓰ ꓠꓱ ꓫꓳꓸ ꓟꓸ ꓗꓪ ꓖꓳ ꓩꓴ ꓗꓷˍ ꓟ ꓟꓶˍ ꓡꓳ= ꓠꓯ ꓞꓲꓹ ꓟ ꓗꓪ ꓡꓳ ꓧꓳ ꓗꓷ ꓟꓶˍ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓡꓯ ꓒꓯꓹ ꓝ ꓑꓮꓲꓽ ꓗꓪ ꓖꓪ ꓓꓴ ꓑꓮꓲꓽ ꓐꓵ ꓞꓶꓽ ꓟꓽ ꓖꓪ ꓔ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓠꓬ ꓑꓮꓲꓽ ꓐꓰ ꓟꓽ ꓒꓵ ꓢꓴ ꓒꓬꓱꓼ ꓬꓰꓳ=

ꓣꓳ ꓐꓴ ꓥˍ ꓟꓲ ꓝꓴꓲꓸ ꓙꓳˍ ꓟ ꓤꓶꓻ꓾ ꓝꓴꓲꓸ ꓬꓰˍ ꓟ ꓚꓱꓹ ꓗꓪ ꓞꓳ ꓙꓳ ꓔꓬ ꓠꓬ ꓪꓴ-ꓢ ꓬꓲ ꓣꓱꓽ ꓛꓰꓽ ꓔꓯ ꓘꓳꓹ ꓣꓴ ꓠꓹ ꓟ ꓟꓽ ꓒꓵꓽ ꓢꓴ ꓒꓬꓱꓼ ꓡꓰˍ ꓥꓳ= ꓖꓳ ꓟ ꓪꓴꓸ ꓠꓬꓲ ꓚꓵꓺ ꓔ ꓟꓽ ꓓ ꓟ꓾ ꓚꓵꓺ ꓔ ꓟꓽ ꓠ ꓟ ꓝꓴꓲꓸ ꓐꓱ ꓶ ꓠꓲꓹ ꓟ ꓡꓶꓸ ꓗꓷ ꓢꓲ ꓒꓳꓹ ꓡꓰꓼ ꓡ ꓢꓲ ꓠꓬꓲ ꓣꓱꓽ ꓛꓰꓽ ꓔꓯ ꓘꓳꓹ ꓣꓴ ꓓꓴ ꓡꓯ=