ꓛꓳꓽ ꓒꓯꓹ ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴˍ ꓟ

ꓠꓬꓲꓸ ꓠꓬꓲ ꓗꓪ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓚꓱꓹ ꓟꓸ ꓖꓶˍ ꓡꓳ= ꓬꓲ ꓡꓰ ꓐꓯ ꓟ ꓠꓬ ꓟꓴ ꓗꓪ ꓗꓴꓷꓼ ꓠꓶꓽ ꓡꓻꓳ꓾ ꓐꓰ ꓟꓸ ꓟꓲꓽ ꓚ ꓠꓹ ꓟ ꓬꓲ ꓡꓰ ꓕꓵꓼ ꓪ ꓖꓶˍ ꓡꓳ= ꓬꓰ-ꓢꓴ ꓡꓰ ꓝꓲ ꓓꓴ ꓐꓴ ꓔꓯ ꓞꓳ ꓠꓻ ꓔꓯ ꓠꓻ ꓫꓬꓹ ꓖꓶ ꓠꓹ ꓟ꓾ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ ꓠꓹ ꓟ꓾ ꓔꓸ ꓟꓼ ꓩꓴ ꓓꓲ ꓢꓴ ꓔꓯ ꓢꓲ ꓫꓬ ꓡꓰ ꓝꓲ ꓠꓹ ꓟ꓾ ꓐꓰ ꓠꓲꓽ ꓔꓯ ꓖꓼ ꓓꓳ ꓩꓴ ꓗꓷ ꓠꓹ ꓟ ꓪꓽ ꓠꓬꓲˍ ꓟ ꓢꓯꓼ ꓪ ꓖꓶˍ ꓡꓳ=

ꓝꓮꓲ ꓠꓬ ꓬꓰ-ꓢꓴ ꓡꓰ ꓝꓸ ꓢꓲ ꓬꓲ ꓪ ꓔꓯ ꓡꓳꓺ ꓡꓳꓺ ꓡꓰꓽ ꓙꓰ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓒꓴꓻ ꓟꓽ ꓔꓯꓹ ꓠꓹ ꓟ꓾ ꓐꓵ ꓞꓶ ꓠꓬꓲꓽ ꓘꓳꓹ ꓟꓽ ꓔꓯꓹ ꓠꓹ ꓟ꓾ ꓛꓲ ꓠꓲ ꓐꓰ ꓙꓽ ꓥꓳꓽˍ ꓟꓲ ꓟꓽ ꓔꓯꓹ ꓔꓯꓹ ꓡꓳꓺ ꓡꓳꓺˍ ꓡꓰꓽ ꓙꓰ ꓠꓹ ꓟ ꓕꓵꓼ ꓪ ꓖꓶˍ ꓟ ꓥ ꓡꓳ= ꓬꓲ ꓪ ꓡꓰ ꓟꓸ ꓟꓲꓽ ꓚꓺ ꓙꓰ ꓛꓲꓺ ꓬꓰˍ ꓟ ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓬꓲ ꓪ ꓔꓯ ꓜꓽ ꓓꓴ꓾ ꓓꓳ ꓓꓴ꓾ ꓔꓬ ꓖꓴ ꓖꓶ ꓡˍ ꓥꓳ꓾ ꓛꓲꓸ ꓟꓽ ꓛꓵꓽ ꓐꓯ ꓟ ꓔꓯ ꓙꓵꓻ ꓠꓹ ꓟ ꓬꓰ-ꓢꓴ ꓡꓰ ꓐꓯ ꓖꓶˍ ꓡꓳ= ꓬꓲ ꓪ ꓣꓱꓽ ꓬꓯꓼˍ ꓟ ꓔꓯ ꓬꓲ ꓪ ꓐꓱ ꓶ ꓖꓶꓽ ꓡˍ ꓥꓳ ꓐꓯ ꓟ ꓔꓯ ꓙꓵꓻ ꓠꓹ ꓟ ꓐꓯ ꓖꓶˍ ꓡꓳ= ꓬꓰ-ꓢꓴ ꓐꓯ ꓘꓶꓽ ꓔꓯ ꓬꓲ ꓪ ꓑ ꓙˍ ꓕꓯ ꓝꓲ ꓓꓴ ꓐꓴ ꓠꓬ ꓓꓵꓽ ꓙ ꓟꓶˍ ꓥꓳ꓾ ꓫꓰꓸ ꓡꓰˍ ꓥꓳ꓾ ꓓꓵꓽ ꓙ ꓪꓴ ꓧꓶꓻ ꓡˍ ꓥꓳ= ꓣꓳ ꓔꓯ ꓢꓷꓸ ꓢꓴ ꓟꓽ ꓙꓳ ꓟ ꓗꓪ ꓙꓰˍ ꓕꓯ꓾ ꓶ ꓤ ꓗꓪ ꓓꓴ ꓓꓳ ꓙꓰˍ ꓕꓯ ꓕꓱ ꓟꓬ ꓠꓬꓲ ꓐꓱ ꓶ ꓒꓴꓻ ꓕꓽ ꓔꓯꓹ꓾ ꓐꓵ ꓞꓶꓽ ꓠꓬꓲꓽ ꓘꓳꓹ ꓕ ꓔꓯꓹ ꓐꓯ ꓟ ꓠꓽ ꓮ ꓡꓰ ꓗꓹ ꓠꓬꓲ ꓐꓯ ꓟꓽ ꓢꓷꓸ ꓐꓰ ꓓꓵꓽ ꓙˍ ꓟꓲ ꓓꓵꓽ ꓙˍ ꓥꓳ=

ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓥ ꓕꓯ ꓠꓽ꓾ ꓠꓬꓲꓸ ꓠꓬꓲ ꓗꓪˍ ꓟꓲ ꓬꓲ ꓡꓰ ꓣꓳ ꓔꓯ ꓞꓳ ꓠꓻ ꓔꓯ ꓠꓻ ꓫꓬꓹ ꓖꓶ ꓠꓹ ꓟ꓾ ꓔꓸ ꓟꓼ ꓩꓴ ꓓꓲ ꓢꓴ ꓔꓯ ꓢꓲꓽ ꓫꓬ ꓡꓰ ꓝꓲ ꓠꓹ ꓟ ꓐꓰ ꓠꓲꓽ ꓔꓯ ꓖꓼ ꓓꓳ ꓠꓹ ꓟ ꓪꓽ ꓠꓬꓲˍ ꓟ ꓢꓯꓼ ꓪ ꓣꓳ ꓔꓯ ꓬꓲ ꓡꓰ ꓖꓶꓽ ꓡˍ ꓥꓳ= ꓮ ꓟꓶ ꓣꓳ ꓚꓲꓸ ꓛꓬ ꓕꓲ ꓑꓹ ꓤ ꓠꓺ ꓠꓬꓲ ꓠꓬꓲ ꓡꓯ꓾ ꓓꓵꓽ ꓙ ꓠꓬꓲ ꓡꓯ= ꓮ ꓘꓶꓸ ꓫ ꓙꓵ ꓔꓬ ꓢꓴ ꓕꓲ ꓣꓳ ꓐꓱ ꓶ ꓥꓪ ꓮ ꓡꓰ ꓐꓰ ꓬꓰ ꓙ ꓐ ꓡˍ ꓡ= ꓠꓬꓲꓸ ꓠꓬꓲ ꓕꓲ ꓠꓬꓲ ꓡꓱꓸꓼ ꓗꓪ ꓔꓳꓹ ꓜꓳ ꓪˍ ꓟ꓾ ꓟꓳꓻ ꓪˍ ꓟ ꓞꓳ ꓤ ꓐꓴ ꓐꓰ ꓗꓹ ꓛꓲꓽ ꓓꓴ꓾ ꓥꓳ ꓡꓳꓸ ꓓꓴ꓾ ꓐꓰ ꓠꓲꓹ ꓟ ꓗꓴ ꓖꓶˍ ꓟ꓾ ꓕꓱ ꓟꓬ ꓟ ꓔꓯ ꓮ ꓡꓰ ꓐꓱ ꓖꓶ ꓐ ꓡˍ ꓡ꓾ ꓐꓯ ꓟ ꓔꓯ ꓬꓲ ꓙꓵꓹ ꓣꓴ ꓢꓲ ꓕꓲ ꓑꓹ ꓤ ꓓꓵꓽ ꓙ ꓠꓬꓲ ꓡꓯ=

ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓴ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱꓽ ꓛꓰꓽ ꓡꓯ ꓫꓴ ꓖꓶ ꓔꓬ ꓟ ꓥ ꓢꓲ ꓠꓬꓲ ꓣꓳ ꓤꓶꓻ ꓐꓰ ꓟꓲ ꓠꓯ ꓗꓪ ꓟ ꓞꓳ ꓤ ꓐꓴ ꓔꓯ ꓣꓳ ꓘꓳꓹ ꓣꓴ ꓟꓶ ꓔ ꓟ ꓣꓱꓽ ꓛꓰꓽ ꓡꓯ ꓫꓴ ꓐꓴ ꓔꓯ ꓐꓱ ꓖꓶ ꓠꓹ ꓟ ꓣꓳ ꓐꓴ ꓔꓯ ꓘꓴ ꓔꓬ ꓟ ꓥ ꓡꓳ= ꓐꓯ ꓪˍ ꓠꓬ ꓢꓴ ꓔꓯ ꓐꓱ ꓖꓶ ꓪˍ ꓟ ꓣꓱꓽ ꓛꓰꓽ ꓡꓯ ꓫꓴ ꓠꓬ ꓣꓳ ꓐꓴ ꓐꓱ ꓶ ꓬꓳꓸ ꓚꓵˍ ꓟ ꓟꓽ ꓥ꓾ ꓖꓳ ꓟꓬ ꓛꓲꓺ ꓟꓽ ꓬꓳꓸ ꓚꓵ꓾ ꓐꓰ ꓣꓳ ꓓꓵꓽ ꓙ ꓠꓬꓲ ꓗꓴꓸˍ ꓡꓳ= ꓢꓴ ꓔꓯ ꓬꓰ ꓙˍ ꓟ꓾ ꓛꓳ ꓒꓯꓹ ꓟꓽ ꓙꓳ꓾ ꓕꓲ ꓣꓳ ꓔꓵꓸ ꓔꓬ ꓪ ꓢꓴ꓾ ꓠꓲꓹ ꓟ ꓙꓬ ꓔꓬ ꓢꓴ ꓔꓬꓹ ꓗꓪ ꓙꓰ ꓢꓲ ꓫꓸ ꓕꓱ ꓖꓶ꓾ ꓬꓲ ꓫꓸ ꓕꓱˍ ꓟ ꓔꓯ ꓠ ꓠꓹ꓾ ꓝꓮꓲ ꓠꓬ ꓢꓯꓼ ꓓ ꓟ ꓩꓴ ꓢꓲ ꓟꓬꓱꓽ ꓬꓰ ꓪꓴꓽ ꓧꓶ ꓔꓬ ꓢꓴ ꓐꓴ ꓔꓯ ꓧꓶꓼ ꓟꓸ ꓖꓶ꓾ ꓐꓽ ꓫꓱ ꓐ ꓠꓲꓽ ꓬꓰ ꓟꓳꓸ ꓖꓶ ꓾ ꓕꓱ ꓟ ꓠꓬ ꓪꓴ-ꓢ ꓖꓶ ꓡˍ ꓟ ꓣꓱꓽ ꓛꓰꓽ ꓡꓯ ꓫꓴ ꓢꓴ ꓔꓯ ꓣꓳ ꓐꓱ ꓖꓶ ꓔꓬ ꓟ ꓥ ꓡꓳ=

ꓢꓰꓻ ꓢꓰꓻ ꓡꓰꓽ ꓔꓬ= ꓠꓬꓲꓸ ꓠꓬꓲ ꓗꓪ ꓠꓴ ꓘꓳꓹ ꓣꓴ ꓟꓶ ꓔ ꓟ ꓣꓱꓽ ꓛꓰꓽ ꓠꓱꓸ ꓐꓯ ꓢꓴ ꓔꓯ ꓐꓱ ꓖꓶ ꓠꓹ ꓟ ꓐꓲ ꓜꓲꓼˍ ꓟ ꓒꓵꓽˍ ꓟ ꓬꓲ ꓙꓵꓹ ꓐꓱ ꓶ ꓢꓯꓸ ꓔꓬ ꓪˍ ꓟ ꓣꓱꓽ ꓛꓰꓽ ꓠꓴ ꓔꓯ ꓖꓶ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓐꓽ ꓧꓶꓼ ꓬꓰ ꓟꓳꓸ ꓖꓶˍ ꓟ꓾ ꓐꓽ ꓫꓱ ꓐꓽ ꓠꓲꓽ ꓬꓰ ꓟꓳꓸ ꓖꓶˍ ꓟ꓾ ꓠꓵꓻ ꓠꓲꓹ ꓗꓪ ꓐꓰ ꓬꓲ ꓪ ꓐꓴ ꓔꓯ ꓠ ꓠꓹ ꓖꓶ ꓟ ꓬꓰ ꓢꓲ ꓠꓱꓸ ꓐꓯ ꓢꓴ ꓔꓯ ꓬꓰ ꓙ= ꓥ ꓡꓳ꓾ ꓕꓱ ꓟ ꓕꓯ ꓢꓲ ꓪꓴꓽ ꓓꓰˍ ꓟ ꓡꓯꓼ ꓫꓴ ꓟꓽ ꓙꓳꓻꓳ=