ꓥꓪꓸ ꓮ ꓟꓬꓹ ꓓꓳꓽ ꓟꓶˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲ-ꓟꓴ ꓒꓲ-ꓕꓱ ꓠꓬ “ꓥꓪ ꓠꓬ ꓝꓴꓲꓸ ꓮ ꓟꓬꓹ ꓙꓳ ꓢꓴ ꓥ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒꓽꓳ ꓠꓴ ꓥꓪ ꓔꓯˍ ꓐꓰ ꓧꓹ ꓙꓰ”= ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓐꓯ ꓖꓶˍ ꓟ ꓔꓯ ꓣꓳ ꓟꓳ ꓪ ꓓꓹ ꓡꓳ= ꓢꓲ-ꓟꓴ ꓒꓲ-ꓕꓱ ꓠꓽ ꓮ ꓡꓰ ꓟꓬ ꓛꓲꓺ ꓪꓴꓽˍ ꓟ ꓝꓴꓲꓸ ꓬꓰ ꓗꓷ ꓟ ꓑꓶꓸ ꓓꓴ ꓕꓱ ꓡꓰ ꓐꓯ ꓡ? ꓢꓲ-ꓟꓴ ꓒꓲ-ꓕꓱ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓠꓬ ꓕꓲ ꓦꓬꓽ ꓡꓱꓸꓼ ꓥꓪꓸ ꓧꓪ ꓔꓬ ꓥˍ ꓟꓲ ꓕꓲ ꓟˍ ꓟꓲ ꓧꓪ ꓟꓽ ꓟꓶ= ꓖꓳ ꓡꓱ ꓠꓬꓲ ꓪꓴꓽ ꓧꓶ ꓠꓬꓲ ꓠꓲꓹ ꓟ ꓙꓬ ꓠꓬꓲ ꓐꓰ ꓥꓪꓸ ꓑꓱꓸ ꓫꓬꓹ ꓔꓬ ꓖꓴˍ ꓡꓳ=  ꓢꓲꓺ ꓒ ꓬꓰ-ꓢꓴ ꓡꓰ ꓚꓺ ꓟꓸ ꓖꓶ ꓔꓬ ꓟ ꓶꓼ ꓓꓳ ꓫꓱꓹ ꓓꓳ ꓔꓯ ꓠ ꓠꓹ ꓢꓲ ꓥꓪ ꓑꓱꓸ ꓔꓯ ꓫꓬꓹ ꓔꓬ ꓖꓴˍ ꓟ ꓥ ꓡꓳ=

 ꓢꓲꓺ ꓒ ꓬꓰ-ꓢꓴ ꓡꓰ ꓟꓸ ꓟꓲꓽ ꓚꓺ ꓓꓳ ꓡꓰ ꓗ ꓠꓯꓸ ꓬꓲ ꓪ ꓥꓪ ꓑꓱꓸ ꓔꓯ ꓬꓲ ꓙꓬ ꓠꓯꓸ ꓟ ꓗꓪ ꓗꓷ  ꓠꓹ ꓟ ꓐꓯ ꓖꓶˍ ꓡꓳ=  ꓶꓼ ꓓꓳ ꓫꓱꓹ ꓓꓳ ꓠꓬ ꓠ ꓠꓹ ꓓꓴˍ ꓡꓰꓽ ꓥ ꓢꓲ ꓚꓲ ꓛꓬ ꓤꓶꓻ ꓗꓪ ꓛꓳ ꓫꓱꓽ ꓠꓹ ꓟ ꓔꓯ꓾ ꓞꓳ ꓤ ꓤꓶꓻ ꓐꓰ ꓗꓴꓸ ꓙꓲꓽ ꓙꓳˍ ꓟ ꓔꓯ ꓒꓲ-ꓕꓱ ꓠꓬ ꓟꓽ ꓢꓷꓸ ꓐꓰ ꓓꓵꓽ ꓙ ꓓꓹ ꓡꓳ=  ꓟꓷꓽ ꓠꓷꓹ ꓝ ꓒ ꓕꓲ ꓣꓳ ꓐꓯ ꓖꓶ ꓡˍ ꓟ ꓐꓯ ꓘꓶꓽ ꓔꓯ ꓠꓬ ꓮ ꓡꓰ ꓥˍ ꓟꓲ ꓠ ꓠꓹ ꓓꓴ ꓥꓳ ꓐꓰ ꓓꓵꓽ ꓙ ꓢꓲ ꓥꓪꓸ ꓑꓱꓸ ꓔꓯ ꓬꓲꓻ ꓙꓬ ꓠꓯꓸˍ ꓟ ꓗꓪ ꓧꓳꓽ ꓗꓷ ꓟ ꓥ ꓡꓳ= ꓥꓪꓸ ꓟꓶ ꓡˍ ꓥꓳ ꓐꓰˍ ꓟꓲ ꓟꓽ ꓥꓳ ꓡꓳꓸ ꓔ= ꓖꓳ ꓡꓱ ꓥˍ ꓟꓲ ꓥꓪꓸ ꓑꓱꓸ ꓧꓽ ꓡꓰ ꓠ ꓗꓪ ꓛꓲꓺ ꓥꓪꓸ ꓓꓳꓽ ꓟꓶˍ ꓕꓯ ꓚꓲꓸ ꓛꓬ ꓟꓽ ꓙꓵꓻ ꓗꓷ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓯ ꓝꓴꓲꓸ ꓣꓷꓠˍ ꓟ ꓥ ꓡꓳ= ꓣꓳ ꓐꓴ ꓥˍ ꓟꓲ ꓪꓴ-ꓢ ꓐꓯ ꓘꓶꓽ ꓐꓰ ꓶꓼ ꓓꓳ ꓫꓱꓹ ꓓꓳꓽ ꓔꓯ ꓑ ꓙ ꓢꓲ ꓟꓽ ꓙꓵꓻ ꓗꓷ ꓟ ꓦꓬꓼ ꓠꓬꓲ ꓐꓱ ꓶ ꓪꓴ-ꓢ ꓔꓯ ꓘꓴ ꓓꓰꓽ ꓡꓯ= ꓝꓴꓲꓸ ꓣꓷꓠꓸ ꓡꓯ=