ꓟꓴ ꓗꓪ ꓪꓰ ꓤ

ꓟꓹ ꓟ ꓟ-ꓡꓲ ꓠꓬ ꓬꓲ ꓖꓳ ꓓꓱ ꓗꓪ ꓶꓻ ꓞꓹ ꓟ ꓤ ꓠꓱ ꓐꓰ ꓬꓲ-ꓡꓲ-ꓫ-ꓑꓓ ꓔꓬ ꓗꓪ ꓙꓰ_ ꓟ ꓥꓳ= ꓬꓲ ꓫꓵ ꓜꓳ ꓥ ꓟꓲ ꓬꓲ-ꓡꓲ-ꓫ-ꓑꓷ ꓕꓲ ꓦꓲ ꓐꓱ ꓶ ꓠꓬ ꓪꓰ ꓤ ꓥ ꓡꓳ= Advent ꓐꓯ_ ꓟ ꓠꓬ Christmas ꓟꓽ ꓛꓲ ꓢꓲ 4 ꓫꓵ ꓠꓽ ꓔꓯ ꓐꓯ_ ꓟ ꓥꓳ= ꓗꓳꓸ ꓛꓲ ꓡ_ ꓟ ꓙꓵꓹ ꓬꓯꓼ ꓡ_ ꓟ ꓙꓵꓹ ꓥ ꓟ Advent ꓐꓯ_ ꓟ ꓘꓶꓽ ꓠꓬ Latin ꓗꓪ ꓐꓰ ꓡ_ ꓟ ꓘꓶꓽ ꓥ ꓡꓳ= ꓬꓰ-ꓢꓴ ꓟꓲ ꓠꓯ ꓗꓪ ꓬꓯꓼ ꓡ_ ꓟ ꓙꓵꓹ ꓔꓯ ꓐꓯ_ ꓟ ꓥ ꓡꓳ= ꓬꓰ-ꓢꓴ ꓙꓲ ꓢꓴ ꓬꓯꓼ ꓡ_ ꓟ (3) ꓫꓵꓽ ꓙꓳ_ ꓟ ꓥꓳ=

ꓓꓽ ꓪꓴꓸ ꓕꓲ ꓧꓪꓹ ꓬꓯꓼ ꓡ_ ꓟ꓾ ꓕꓱ ꓟ ꓠꓬ ꓒꓬꓱꓼ ꓓꓳ ꓡꓰ ꓟ ꓥꓳ= ꓡꓳꓹ ꓬꓰ ꓟ 2000 ꓘꓳꓼ ꓛꓲ ꓕꓯ ꓬꓰ-ꓢꓴ ꓠꓬ ꓟꓲ ꓠꓯ ꓗꓪ ꓤ ꓠꓱ ꓤ ꓡꓰ ꓐꓰ ꓬꓯꓼ ꓡ ꓟ ꓥꓳ=

 ꓠꓬꓲꓽ ꓧꓪꓹ ꓕꓲ ꓧꓪꓹ ꓬꓯꓼ ꓡ ꓟ꓾ ꓕꓱ ꓟ ꓠꓬ ꓣꓳ ꓐꓰ ꓫꓱꓹ ꓔ ꓟ ꓥꓳ꓾ ꓣꓳ ꓗꓪ ꓐꓰ ꓗꓸ ꓘꓶꓽ ꓒꓴ ꓖꓶ ꓕꓯ ꓢꓲ ꓬꓲ ꓓꓵꓽ ꓙꓰ ꓡ  ꓥꓳ= ꓣꓳ ꓗꓪ ꓐꓰ ꓠꓲꓹ ꓡꓱ ꓡꓱ ꓒꓴ ꓖꓶ ꓕꓯ ꓢꓲ ꓬꓲ ꓬꓯꓼ ꓡ  ꓥꓳ=

ꓢ ꓧꓪꓹ ꓕꓲ ꓧꓪꓹ ꓬꓯꓼ ꓡ ꓟ꓾ ꓕꓱ ꓟ ꓠꓬ ꓡ ꓠꓹ ꓟ ꓙꓵꓹ ꓔꓯ ꓐꓯ_ ꓟ ꓥꓳ= ꓕꓱ ꓕꓲ ꓧꓪꓹ ꓟ ꓠꓬ ꓮ ꓐꓲ ꓡꓰ ꓐꓰ ꓟꓽ ꓥ꓾ ꓪ ꓔꓲ ꓕꓲ ꓣꓳ ꓡꓰ ꓐꓰ ꓬꓯꓼ ꓡ  ꓥꓳ=

ꓕꓲ ꓧꓪꓹ ꓙꓳ_ ꓕꓯ ꓔꓲꓺ ꓒ ꓓꓽ ꓕꓲ ꓣꓳ ꓡꓰ ꓔꓲꓺ ꓒ ꓐꓴ ꓔꓯ ꓟꓸ ꓟꓲ ꓚ ꓖꓶ_ ꓟ ꓠꓬ ꓬꓰ-ꓢꓴ ꓠꓬ ꓟꓲ ꓠꓯ ꓡ ꓞꓳ ꓮ ꓙꓵ ꓐꓱ ꓶ ꓚꓬꓴ ꓙ ꓠꓹ ꓟ ꓟꓬꓱꓽ ꓔꓯ ꓙꓱꓽ ꓤ ꓡꓴꓻ ꓕꓴ ꓗꓪ ꓐꓰ ꓟꓬꓱꓽ ꓪꓴꓸ ꓔꓴ_ ꓟ ꓥꓳ= ꓪꓰ ꓤ ꓡ ꓥꓳ ꓐꓰ ꓢꓷꓸ ꓔ ꓠꓬ ꓕꓲ ꓦꓲ ꓡ ꓞꓳ ꓐꓴ ꓠꓬ ꓮ ꓡꓲ ꓐꓰ ꓘꓳꓹ ꓣꓴ ꓠ ꓔ ꓟ꓾ ꓮ ꓫꓵ ꓖꓶ ꓜ ꓠ ꓔ ꓟ꓾ ꓦꓲ ꓘꓴꓽ ꓢꓲ ꓫꓬ ꓠ ꓔ ꓟ ꓕꓱ ꓡꓱ ꓮ ꓟꓬꓹ ꓫꓵ ꓓꓵꓽ ꓙ ꓢꓲ ꓙ ꓖꓶ ꓠ ꓔ  ꓥꓳ= ꓝꓮꓲ ꓟꓽ ꓝꓲ ꓪꓰ ꓤ ꓐꓰ ꓐꓯ ꓠꓬ ꓣꓳ ꓚꓲ ꓛꓬ ꓥ ꓟꓲ ꓪꓰ ꓤ ꓡꓰ ꓐꓰ ꓘꓳꓹ ꓣꓴ ꓟꓶ ꓠꓬꓲ ꓔꓳꓹ ꓜꓳ ꓠꓬꓲ ꓐꓶ_ ꓥꓳ= ꓖꓳ ꓡꓱ ꓥ ꓟꓲ ꓔꓲꓺ ꓒ ꓓꓽ ꓟꓽ ꓥ ꓠꓬ ꓔꓲꓺ ꓒ ꓕꓱ ꓡꓱ ꓮ ꓘꓶꓸ ꓣꓳꓸ ꓚꓵ_ ꓟ ꓪꓰ ꓤ ꓥ ꓠꓬ ꓟꓬ ꓠꓬꓲ ꓙ ꓖꓶ ꓠ ꓔ ꓟ ꓥꓳ= ꓐꓯ ꓠꓲ ꓫꓵ ꓟ ꓠꓬ ꓬꓲ ꓪ ꓥ ꓟꓲ ꓟꓲ ꓠꓯ ꓪꓰ ꓤ ꓥ ꓡꓳ= ꓟꓲ ꓠꓯ ꓪꓰ ꓤ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓕꓱ ꓡꓱ ꓙꓵꓽ ꓪ ꓬꓲꓸ ꓕꓲꓸ ꓔꓯ ꓕꓱ ꓟꓬ ꓚꓬꓹ ꓔ ꓠꓬ ꓕꓱ ꓟꓲ ꓠꓯ ꓞꓳ ꓤ ꓔꓯ ꓚꓰꓼ ꓔ ꓢꓴ ꓟꓴ ꓗꓪ ꓪꓰ ꓤ ꓔꓯ ꓣꓳ ꓮ ꓡꓲ ꓐꓰ ꓙ ꓖꓶ ꓢꓲ ꓘꓳꓹ ꓣꓴ ꓠ ꓔ ꓡ? ꓟꓲ ꓠꓯ ꓞꓳ ꓤ ꓠꓬ ꓬꓲꓸ ꓙꓵꓹ ꓛꓲ ꓡ ꓕꓯ ꓔꓬ ꓦꓲꓻ ꓗꓪ ꓡ ꓙꓰ ꓠꓹ ꓟ ꓥꓳ= ꓖꓳ ꓡꓱ ꓥ ꓲ ꓟꓴ ꓗꓪ ꓪꓰ ꓤ ꓠꓬ ꓣꓳ ꓠꓲꓹ ꓡꓱ ꓡꓱ ꓘꓳꓹ ꓣꓴ ꓠꓬ ꓣꓳ ꓐꓰ ꓕꓲ ꓞꓲꓼ ꓔꓬ ꓡ ꓟ ꓥꓳ=