ꓢꓲ ꓒ ꓬꓯꓼ ꓡ ꓠꓹ ꓟ ꓙꓵꓹ ꓐꓱ ꓶ ꓧꓪꓸ ꓛꓲꓽ ꓢꓲ ꓔꓬ ꓠꓹ ꓟ

ꓡ ꓞꓳ ꓕꓲ ꓣꓳ ꓬꓲ ꓮ ꓟꓬ ꓓ_ ꓟ ꓔꓯ ꓢꓷꓸ ꓠꓹ ꓟ ꓠꓬ ꓡ ꓞꓳ ꓮ ꓟꓬꓹ ꓐꓰ ꓔꓬ ꓕꓯ ꓮ ꓡꓰ ꓐꓰ ꓔꓬ ꓟ ꓔꓯ ꓛꓳ ꓠ ꓔ ꓡꓳ꓾ ꓬꓲꓸ ꓫꓷꓹ ꓔꓯ ꓢꓷꓸ ꓠꓲꓹ ꓫꓵ ꓠꓬ ꓬꓲ ꓕꓲ ꓣꓳ ꓡꓰ ꓔꓬ ꓟ ꓙꓵꓹ ꓗꓪ ꓮ ꓡꓰ ꓐꓰ ꓔꓬ ꓟ ꓔꓯ ꓛꓳ ꓠ ꓔ ꓡꓳ= ꓞꓳ ꓤ ꓠꓬ ꓕꓲ ꓣꓳ ꓡꓰ ꓔꓬ ꓟ ꓙꓵꓹ꓾ ꓮ ꓡꓰ ꓕꓲ ꓣꓳ ꓡꓰ ꓟꓽ ꓟꓳ_ ꓟ ꓙꓵꓹ ꓕꓯ ꓡꓰ ꓬꓲꓸ ꓫꓷꓹ ꓮ ꓡꓰ ꓔ ꓟ ꓔꓯ ꓟꓬ ꓠꓬꓲ ꓢꓷꓸ ꓪ ꓡꓳ=

ꓖꓳ ꓟ ꓑꓶ ꓓꓴ ꓤ ꓠꓱ ꓤ ꓐꓴ ꓬꓲꓸ ꓐꓹ ꓐ ꓟꓹ ꓟ ꓕꓲ ꓖꓽ ꓖ ꓗꓪ ꓐꓰ ꓡ ꓡ ꓠꓬ ꓮ ꓘꓶꓸ ꓐꓯ ꓓ ꓢꓲ꓾ ꓕꓳ ꓢꓯꓼ ꓕꓵꓼ_ ꓟ꓾ ꓦꓲꓻ ꓘꓴꓽ ꓢꓲ ꓢꓲ ꓫꓬ ꓫꓬ ꓬꓰ ꓦ ꓟ ꓕꓱ ꓡꓱ ꓟꓳ ꓕꓯ ꓐꓹ ꓐ ꓟꓹ ꓟ ꓐꓴ ꓠꓲꓹ ꓟ ꓢ_ ꓟ ꓥꓳ= ꓤ ꓠꓱ ꓐꓴ ꓥꓪ ꓠꓴ ꓟꓽ ꓔꓬ ꓥ ꓟꓲ ꓕꓱ ꓡꓱ ꓬꓰ ꓗꓴꓸ ꓔ ꓡꓳ ꓐꓰ ꓓꓵꓽ ꓙ ꓪ ꓡꓰ ꓝꓲ_ ꓟ ꓥꓳ= ꓕꓲ ꓣꓳ ꓣꓳ ꓡ ꓡ ꓟ ꓪꓴꓸ ꓠꓬꓲ ꓬꓰ ꓟ ꓡꓰ ꓟꓽ ꓥ꓾ ꓬꓰ ꓠ ꓔ ꓟ ꓪꓴꓸ ꓠꓬꓲ ꓣꓱꓽ ꓬꓯꓼ_ ꓟ ꓑꓶ ꓓꓴ ꓬꓰ_ ꓟ ꓕꓱ ꓡꓱ ꓠꓲꓹ ꓟ ꓙꓳ ꓠꓹ ꓟ ꓥ ꓡꓳ=

ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓠꓲꓹ ꓫꓵ_ ꓟ ꓥ ꓡꓳ= ꓢꓲ ꓒ ꓛꓲ ꓡ ꓕꓯ꓾ ꓬꓲ ꓚꓳ ꓑꓸ ꓕꓱ ꓡꓱ ꓬꓰ ꓔꓬ ꓟ ꓔꓯ ꓟꓳ_ ꓠꓬ꓾ ꓚꓳ ꓑꓸ ꓖꓳ ꓕꓲ ꓣꓳ ꓠꓽ ꓶꓼ ꓙꓳ ꓫꓱꓹ ꓙꓳ_ ꓥꓳ꓾ ꓐꓰ ꓐꓯ ꓔ ꓡꓳ= ꓕꓱ ꓟ ꓠꓬ ꓮ ꓕꓯ ꓥ ꓟꓲ ꓙꓲ_ ꓟ ꓔꓯ ꓬꓰ_ ꓟ ꓥ ꓡꓳ= ꓬꓲꓸ ꓢꓲ ꓒ ꓮ ꓡꓰ ꓕꓲ ꓙꓵꓹ ꓕꓯ ꓛꓲ ꓡ ꓟ ꓔꓯ ꓟꓽ ꓢꓷꓸ꓾ ꓖꓳ ꓡꓱ ꓥ ꓟꓲ ꓬꓲꓸ ꓬꓰ ꓠ ꓔ ꓟ ꓟꓬꓱꓽ ꓔꓯ ꓙꓽ ꓣꓳꓽ_ ꓟ ꓠꓲꓹ ꓟ ꓐꓰ ꓬꓰ ꓗꓴꓸ ꓔ ꓟ ꓔꓯ ꓐꓯ_ ꓟ ꓥꓳ=

ꓠꓴ ꓪ_ ꓟꓲ ꓙꓽ ꓖꓶ ꓔ= ꓮ ꓡꓲꓳ ꓐꓯ ꓠꓬ ꓠꓴ ꓪ ꓓꓵꓽ ꓙ ꓡꓯꓼ ꓟꓽ ꓛꓲ_  ꓟ ꓕꓲ ꓙꓵꓹ ꓗꓪ ꓡ-ꓞꓳ-ꓮ-ꓐꓲ ꓡ_ ꓥꓳ꓾ ꓐꓰ ꓐꓯ ꓔ ꓡꓳ= ꓬꓰ-ꓢꓴ ꓡꓰ ꓣꓳ ꓔꓯ ꓮ ꓕꓯ ꓥ ꓟꓲ ꓙꓽ ꓖꓶꓽ ꓢꓲ ꓔꓬ ꓝꓲ_ ꓟ ꓥꓳ= ꓣꓳ ꓢꓯꓸ ꓔꓬ ꓤꓶꓻ ꓗꓪ ꓬꓰ ꓠ ꓔ ꓟ ꓔꓯ ꓬꓰ ꓠꓹ ꓟ ꓥ ꓡꓳ= ꓕꓲ ꓣꓳ ꓡꓰ ꓔꓬ ꓕꓯ ꓥ ꓟꓲ ꓡ ꓞꓳ ꓮ ꓟꓬꓹ ꓐꓰ ꓔꓬ ꓕꓯ ꓥ ꓟꓲ ꓣꓳ ꓬꓰ ꓔꓬ ꓟ ꓔꓯ ꓠꓲꓹ ꓟ ꓘꓴꓽ ꓗꓪ ꓐꓰ ꓔꓱ ꓔꓱ_ ꓐꓰ ꓙꓲ ꓙꓲ ꓡꓰ ꓬꓰ ꓢꓲ꓾ ꓬꓰ-ꓢꓴ ꓬꓯꓼ ꓡ ꓟ ꓙꓵꓹ ꓐꓱ ꓶ ꓙꓽ ꓖꓶ ꓠꓹ ꓟ ꓥꓳ꓾