ꓪꓳꓽ ꓒꓲꓻ ꓫꓵꓸ_ ꓐꓰ ꓙꓵꓽ ꓧꓶꓽ ꓔꓯ ꓥꓳꓽ

ꓟꓴ ꓗꓪ ꓗꓴꓷꓼ ꓠꓬ ꓪꓳꓽ ꓒꓲꓻ ꓫꓵꓸ ꓕꓲ ꓢꓶꓽ ꓡꓰ ꓗꓹ ꓡꓳ ꓐꓰ ꓬꓰ-ꓢꓴ ꓡꓰ ꓠꓬꓲꓸ ꓠꓬꓲ ꓟ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓯ ꓔ ꓟ ꓥꓳ= 

ꓟꓴ ꓗꓪ ꓗꓴꓷꓼ ꓠꓬ ꓣꓳꓺ_ ꓥ ꓟꓲ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳ_ ꓟ ꓔꓯ ꓐꓯ_ ꓡ? ꓟꓽ ꓥ ꓠꓬ ꓮ ꓘꓶꓸ ꓪꓴꓽ_ ꓟ ꓔꓯ ꓐꓯ_ ꓡ? ꓟꓽ ꓥ ꓠꓬ ꓮ ꓜ ꓜ ꓪꓴꓽ ꓟꓴ ꓡ_ ꓟ ꓚꓱꓹ ꓔꓯ ꓐꓯ_ ꓡ? ꓕꓱ ꓡꓱ ꓮ ꓟꓬꓹ ꓫꓵꓽ ꓓꓵꓽ ꓙ ꓟꓶ ꓓꓴ ꓙꓳ_ ꓟ ꓥꓳ=

ꓥꓪ ꓗꓪ ꓐꓰ ꓠꓬ ꓪꓳꓽ ꓒꓲꓻ ꓫꓵꓸ ꓡꓰ ꓐꓰ ꓮ ꓜ ꓜ ꓪꓴꓽ ꓟꓴ ꓡ_ ꓟ ꓕꓱ ꓕꓲ ꓒꓳꓹ ꓗꓪ ꓐꓰ ꓐꓯ ꓠꓲꓹ ꓫꓵ_ ꓡꓳ=

ꓣꓳ ꓤꓶꓻ ꓠꓬ ꓮ ꓫꓵꓽ ꓐꓰ ꓫꓱꓸ_ ꓡ ꓐꓯ_ ꓠꓬ ꓬꓲꓻ ꓙꓬ ꓬꓲ ꓘꓴ ꓙꓳ_ ꓟ ꓡꓲ ꓡꓰ ꓐꓰ ꓗꓹ ꓡꓳ= ꓕꓱ ꓡꓱ ꓙ ꓫꓱꓽ ꓕꓱ ꓡꓱ ꓓꓵꓽ ꓡ_ ꓟ ꓬꓲꓻ ꓙꓬ ꓔꓯ ꓟꓽ ꓠ ꓠ ꓘꓳꓼ ꓓꓳ ꓠꓹ ꓟ ꓥꓳ꓾ ꓟꓽ ꓘꓳꓼ ꓓꓳ ꓕꓱ ꓡꓱ ꓡꓰ ꓬꓰ ꓠꓬ ꓡꓲ ꓠꓬ ꓔꓵꓸ ꓡꓰ ꓡ ꓟ ꓥꓳ= ꓕꓱ ꓟ ꓡꓰ ꓐꓰ ꓣꓳ ꓤꓶꓻ ꓥ ꓟꓲ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓠꓹ ꓟ ꓥ ꓡꓳ꓾ ꓠꓽ ꓠꓹ ꓟ ꓟꓽ ꓥ꓾ ꓮ ꓕꓯ ꓥ ꓟꓲ ꓙꓻ ꓫꓱꓽ ꓠꓹ ꓟ ꓥ ꓡꓳ=

ꓣꓳ-ꓟ 8ꓽ22 “ꓚꓰꓼ ꓔ ꓟ ꓥ ꓕ ꓑꓳꓸ ꓠꓬ ꓮ ꓟꓶ ꓗꓪ ꓛꓲ ꓕꓲ ꓡꓰꓹ_ ꓐꓰ ꓦꓵꓻ ꓠꓻ ꓜꓲꓽ ꓢꓲ ꓠꓻ ꓪꓴꓽ ꓔꓬ ꓟ ꓣꓳ ꓢꓷꓸ_ ꓡꓳ= ꓝꓮꓲ ꓢꓲ-ꓫꓬ-ꓟ-ꓦ ꓡꓯꓼ ꓫꓴ ꓬꓲ ꓪꓴꓸ ꓟꓶ ꓗꓷ ꓢꓴ ꓣꓳ_ ꓟꓲ ꓚꓲ ꓛꓬ ꓠꓲꓹ ꓟ ꓗꓪ ꓠꓻ ꓪꓴꓽ ꓢꓲ꓾ ꓤ ꓙꓵꓽ ꓪ ꓟꓶ_ ꓟ ꓐꓰ꓾ ꓣꓳ ꓖꓳ ꓓꓱ ꓫꓴꓹ ꓣꓴ ꓟꓶ_ ꓟ ꓔꓯ ꓡꓳꓸ ꓠꓬꓹ ꓔꓬ ꓡꓳ=” ꓐꓰ ꓐꓯ ꓔ ꓡꓳ= ꓕꓱ ꓢꓲ ꓫꓬ ꓕꓳ ꓶ ꓝꓲꓸ ꓔꓯ ꓡꓳꓸ ꓠꓬꓲ ꓠꓬ ꓡ ꓞꓳ ꓡꓰ ꓟꓽ ꓥ ꓢꓲꓹ ꓜꓲ ꓡꓳ ꓜꓲ ꓚꓰꓼ ꓔ ꓟ ꓥ ꓕ ꓑꓳꓸ ꓥ ꓟꓲ ꓬꓰ-ꓢꓴ ꓠꓬꓲ ꓧꓪꓹ ꓕꓲ ꓧꓪꓹ ꓬꓯꓼ ꓡ ꓟ ꓔꓯ ꓡꓳꓸ ꓔꓬ ꓟ ꓥꓳ= ꓝꓴꓲ ꓑꓶ ꓓꓴ ꓞꓳ ꓤ ꓡꓰ ꓫꓸ ꓓꓴ ꓔꓳꓹ ꓜꓳ ꓟ ꓡꓰ ꓟꓽ ꓥ꓾ ꓚꓰꓼ ꓔ ꓟ ꓥ ꓕ ꓑꓳꓸ ꓥ ꓟꓲ ꓫꓸ ꓓꓴ ꓔꓳꓹ ꓜꓳ ꓟ ꓥꓳ= ꓖꓳ ꓟ ꓑꓶ ꓓꓴ ꓬꓲꓸ ꓟꓶꓽ ꓕꓲ ꓠꓬꓲ ꓔꓯ ꓚꓰꓼ ꓔ ꓟ ꓮ ꓙꓵꓽ ꓢꓯꓼ ꓕꓵꓼ ꓢꓲ ꓡꓳꓸ ꓠꓬꓹ ꓔꓬ ꓟ ꓥꓳ= ꓕꓱ ꓟ ꓠꓬ ꓬꓲꓸ ꓟꓶꓽ ꓕꓲ ꓠꓬꓲ ꓟꓽ ꓥ ꓠꓬ ꓣꓳ ꓫꓵꓻ_ ꓟ ꓙꓵꓹ ꓕꓯ ꓣꓳ ꓪ ꓟꓶ ꓠꓹ ꓟ ꓟꓴ ꓗꓪ ꓗꓴꓷꓼ ꓔꓬ ꓟ ꓥꓳ=

ꓕꓲ ꓛꓱ ꓗꓪ ꓥ ꓟꓲ ꓟꓴ ꓗꓪ ꓗꓴꓷꓼ ꓠꓬ ꓣꓳ ꓫꓵꓻ_ ꓟ ꓙꓵꓹ ꓕꓯ ꓡꓰ ꓪ ꓟꓶ_ ꓟ ꓟꓽ ꓥ꓾ ꓣꓳ ꓟꓲ ꓠꓯ ꓗꓪ ꓔꓬ ꓟ ꓙꓵꓹ ꓕꓯ ꓡꓰ ꓪ ꓟꓶ ꓠꓹ ꓟ ꓪꓴ-ꓢ ꓡꓰ ꓖꓶ ꓔ ꓡꓳ= ꓕꓱ ꓟ ꓠꓬ ꓗꓹ ꓛꓲ ꓠꓬꓲ ꓞꓳ ꓗ ꓡ ꓬꓰ_ ꓟ꓾ ꓟꓽ ꓙꓲ_ ꓟ ꓜꓽ ꓫꓵ ꓓꓳ ꓫꓵ ꓣꓱ_ ꓟ ꓕꓱ ꓡꓱ ꓗꓹ ꓛꓲ ꓓꓴ ꓧꓪ_ ꓟ ꓔꓯ ꓐꓯ_ ꓟ ꓟꓽ ꓥ=

ꓣꓳ-ꓟ 14ꓽ17 “ꓪꓴ-ꓢ ꓗꓴꓷꓼ ꓠꓽ ꓙꓲ ꓫꓬ_ ꓟ ꓐꓰ ꓢꓲ ꓡꓲ ꓟ ꓐꓰ ꓢꓲ-ꓫꓬ-ꓟ-ꓦ ꓠꓯꓼ ꓗꓪ ꓟ ꓗꓹ ꓛꓲ_ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ= ꓙꓲ_ ꓟ ꓐꓰ ꓙꓲ ꓫꓬ_ ꓟ ꓐꓰ ꓢꓲ ꓡꓲꓹ ꓟ ꓙꓳ ꓢꓴ ꓠꓬ ꓟꓴ ꓗꓪ ꓗꓴꓷꓼ ꓔꓯ ꓘꓳꓹ ꓣꓴ ꓗꓹ ꓛꓲ ꓟꓶ_ ꓟ ꓥꓳ=

ꓔꓱ_ ꓟ ꓙꓲ_ ꓟ ꓔꓯ ꓡꓰ ꓬꓰ ꓠꓬ ꓠꓲꓹ ꓟ ꓢꓲ ꓡꓲꓹ ꓔ ꓟ ꓥꓳ= ꓠꓵ ꓠꓲꓹ ꓐꓰ ꓙꓻ ꓫꓱ ꓠꓬ ꓗꓹ ꓛꓲ ꓟꓶ_ ꓥꓳ= ꓕꓱ ꓟ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓢꓯꓸ ꓔꓬ ꓟ ꓥꓳ= ꓖꓳ ꓟ ꓑꓶ ꓓꓴ ꓟꓴ ꓗꓪ ꓗꓴꓷꓼ ꓠꓬ ꓪꓳꓽ ꓒꓲꓻ ꓫꓵꓸ ꓡꓰ ꓐꓰ ꓗꓹ ꓡꓳ ꓐꓯ_ ꓟ ꓠꓬ ꓢꓯꓸ ꓔꓬ ꓟ ꓔꓯ ꓐꓯ_ ꓟ ꓥꓳ= ꓣꓳ ꓢꓯꓸ ꓔꓬ ꓟ ꓕꓱ ꓕꓲ ꓤꓶꓻ ꓗꓪ ꓐꓲ ꓜꓲꓼ_ ꓡꓳ ꓫꓵ ꓠꓬ ꓟꓽ ꓙꓳ꓾ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓢꓲ ꓙꓻ ꓫꓱ ꓠꓹ ꓟ ꓡꓰ ꓥꓳ= ꓣꓳ ꓠꓯꓼ ꓗꓪ ꓙꓳ_ ꓟ ꓙꓲ_ ꓟ꓾ ꓔꓱ_ ꓟ ꓔꓯ ꓪꓴꓽ ꓟꓴ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼ_ ꓟ ꓠꓬ ꓟꓴ ꓗꓪ ꓗꓴꓷꓼ ꓔꓯ ꓮ ꓜ ꓜ ꓫꓬꓹ ꓐꓱ_ ꓟ ꓥꓳ꓾ ꓕꓱ ꓟ ꓠꓬ ꓕꓲ ꓠꓬꓲ ꓠꓬꓲ ꓕꓯ ꓣꓳ ꓔꓬ ꓠꓹ ꓟ ꓦꓲꓻ ꓥ ꓟ ꓪꓴꓸ ꓠꓬꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓪꓳꓽ ꓒꓲꓻ ꓫꓵꓸ ꓡꓰ ꓐꓰ ꓪꓴꓽ ꓟꓴ ꓡ ꓠꓹ ꓟ ꓮ ꓘꓶꓸ ꓣꓳꓸ ꓚꓵ_ ꓟ ꓥꓳ ꓢꓯꓼ ꓕꓵꓼ ꓠꓹ ꓟ ꓥꓳ꓾