ꓫꓵꓻ ꓢꓴ ꓐꓴ ꓦ ꓐꓱ ꓶ ꓪꓽ ꓘꓴ ꓙ ꓠꓹ ꓟ

ꓟꓶꓽ ꓡꓰ ꓢꓴ ꓔꓯ ꓧꓪ ꓠꓬ ꓧꓪ ꓟꓳ_ ꓥꓳ꓾ ꓫꓵꓻ ꓢꓴ ꓔꓯ ꓟꓶꓻ ꓫꓵꓻ ꓡꓳꓼ ꓠꓬ ꓟꓲ ꓡꓰ ꓥꓳ ꓐꓰ ꓟꓬ- ꓟ ꓐꓯ ꓘꓶꓽ ꓙꓳ_ ꓟ ꓥꓳ= ꓕꓱ ꓟ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓐꓱ ꓶ ꓠꓬ ꓕꓲ ꓐꓱ ꓜꓳ ꓢꓲ ꓕꓲ ꓐꓱ ꓠꓬ ꓥꓳꓽ ꓡꓰ_ ꓥꓳ= ꓟꓶꓽ ꓡꓰ ꓢꓴ ꓔꓯ ꓧꓪ ꓠꓬ ꓧꓪ ꓟꓳ_ ꓥꓳ ꓐꓯ_ ꓟ ꓜꓳ ꓢꓲ꓾ ꓫꓵꓻ ꓢꓴ ꓔꓯ ꓟꓶꓻ ꓫꓵꓺ ꓗꓷ ꓡꓰ ꓠꓬ ꓟꓲ ꓡꓰ_ ꓥꓳ ꓐꓯ_ ꓟ ꓠꓬ ꓥꓳꓽ_ ꓟ ꓥꓳ= ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓐꓱ ꓶ ꓠꓬ ꓫꓵꓻ ꓢꓴ ꓔꓯ ꓮ ꓕꓯ ꓥ ꓟꓲ ꓟꓽ ꓟꓲ ꓡꓰ_ ꓟ ꓡꓰ ꓟꓽ ꓞꓲ 11 ꓦ ꓕꓯ ꓫꓵꓻ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ_ ꓟ ꓦ ꓐꓰ ꓘꓴ ꓜꓲꓼ ꓞꓳ ꓗꓪ ꓐꓰ ꓢꓯꓼ ꓖꓶ_ ꓟ ꓥꓳ= ꓕꓲ ꓐꓱ ꓠꓬ ꓬꓲ ꓠꓬ ꓫꓵꓻ ꓡꓰꓳ ꓝꓮꓲ ꓟꓽ ꓡ ꓡ ꓪ꓾ ꓬꓲ ꓪ ꓐꓱ ꓶ ꓪꓽ ꓘꓴ ꓖꓶ ꓥ ꓟꓲ ꓮ ꓫꓵꓽ ꓙꓲ ꓖꓴ ꓙꓳ_ ꓡ ꓐꓰ ꓓꓵꓽ ꓙ ꓗꓴꓸ ꓐꓷ_ ꓥꓳ꓾ ꓠ ꓠꓬꓲ ꓗꓴꓸ ꓐꓷ_ ꓥꓳ=

ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓡꓰ ꓙꓵꓻ_ ꓟ ꓠꓬ ꓤꓶꓻ ꓢꓽ ꓤꓶꓻ ꓙꓳ_ ꓟ ꓥꓳ= ꓟꓴ ꓗꓪ ꓗꓴꓷꓼ꓾ ꓮ ꓔꓳꓸ ꓛꓬꓼ ꓟꓵꓽ ꓐꓰ ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓤꓶꓻ ꓥ ꓡꓳ= ꓕꓱ ꓟ ꓠꓬ ꓕꓲ ꓟ ꓐꓰ ꓕꓲ ꓟ ꓫꓱꓹ ꓡꓯ ꓘꓳ_ ꓟ ꓥꓳ= ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓡ ꓞꓳ ꓐꓴ ꓠꓬ ꓫꓵꓻ ꓢꓲ ꓬꓲ ꓪ ꓚꓲ ꓛꓬ ꓮ ꓫꓵ ꓡꓰ ꓬꓰ ꓟꓽ ꓐ ꓡ ꓢꓲ ꓣꓳꓺ_ ꓟ ꓛꓬꓼ ꓟꓵꓽ ꓗꓪ ꓛꓲ ꓬꓰ ꓢꓴ ꓬꓲ ꓪ ꓝꓴꓲ ꓐꓱ ꓶ ꓛꓲ ꓬꓰ ꓢꓴ ꓐꓴ ꓦ ꓡꓲꓹ ꓙꓰ ꓪ ꓡꓰ ꓠꓹ ꓟ ꓐꓱ ꓶ ꓪꓽ ꓘꓴ ꓖꓶ_ ꓟ꓾ ꓬꓲ ꓪ ꓐꓱ ꓶ ꓔꓶꓻ ꓙꓱꓼ ꓚ ꓢꓲ ꓙꓲ_ ꓟ ꓟꓬꓱꓽ ꓬꓰ ꓖꓶ_ ꓟ꓾ ꓕꓱ ꓡꓱ ꓬꓰ ꓙ ꓪ ꓽ ꓘꓴ ꓖꓶ_ ꓟ ꓗꓪ ꓐꓰ ꓣꓳꓺ_ ꓟ ꓛꓬꓼ ꓟꓵꓽ ꓗꓪ ꓐꓰ ꓡꓲꓹ ꓙꓰ ꓪ ꓠꓹ ꓟ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓠꓹ ꓟ ꓬꓰ ꓙ_ ꓟ ꓥꓳ= ꓕꓱ ꓡꓱ ꓣꓳꓺ_ ꓟ ꓛꓬꓼ ꓟꓵꓽ ꓗꓪ ꓐꓰ ꓡꓲꓹ ꓙꓰ ꓢꓲ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓢꓴ ꓡꓰ ꓟꓲ ꓠꓯ ꓗꓪ ꓢꓯꓸ ꓔꓬ ꓢꓴ ꓬꓲ ꓪ ꓐꓱ ꓶ ꓪꓽ ꓘꓴ ꓙ_ ꓢꓴ ꓔꓯ ꓓꓵꓽ ꓙ ꓢꓲ꓾ ꓪꓽ ꓘꓴ ꓙ_ ꓟ꓾ ꓬꓰ ꓙ ꓡꓳꓸ ꓙ ꓖꓶ_ ꓟ ꓥꓳ= ꓖꓳ ꓟ ꓑꓶ ꓓꓴ ꓘꓴ ꓜꓲꓼ ꓞꓳ ꓗꓪ ꓐꓰ 11 ꓦ ꓟ 2 ꓠꓬꓲ ꓕꓯ ꓫꓵꓻ ꓢꓴ ꓐꓴ ꓦ ꓐꓱ ꓶ ꓪꓽ ꓘꓴ ꓙ_ ꓟ ꓦꓬꓼ ꓠꓬꓲ ꓐꓰ ꓔꓶ ꓔ ꓟ ꓥꓳ=

ꓖꓳ ꓟ ꓑꓶ ꓓꓴ ꓫꓵꓻ ꓢꓴ ꓐꓴ ꓦ ꓐꓱ ꓶ ꓮ ꓘꓶꓸ ꓓꓵꓽ ꓙ ꓪꓽ ꓘꓴ ꓖꓶ ꓬꓲ ꓪ ꓐꓱ ꓶ ꓙꓲ_ ꓟ ꓟꓬꓱꓽ ꓬꓰ ꓖꓶ_ ꓟ꓾ ꓟꓲ-ꓢ ꓪꓽ ꓘꓴ ꓶꓽ ꓓꓰꓽ ꓖꓶ_ ꓟ꓾ ꓕꓱ ꓡꓱ ꓬꓰ ꓖꓶ ꓢꓲ꓾ ꓫꓵꓻ ꓢꓴ ꓐꓴ ꓦ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓮ ꓘꓶꓸ ꓪꓽ ꓘꓴ ꓙ ꓓꓴ ꓬꓰ ꓡꓯ=