ꓮ ꓫꓵꓽ ꓒꓵꓽ ꓶˍ ꓟꓲ ꓟꓽ ꓢꓷꓸ ꓔ ꓢꓴ ꓐꓴ ꓐꓱ ꓶ ꓣꓳ ꓬꓲ ꓙꓵꓹ꓾ ꓣꓳ ꓢꓯꓼ ꓪ꓾ ꓣꓳ ꓢꓷꓸ ꓠꓲꓹ ꓔꓯꓕꓽ ꓣꓱꓽ ꓒꓬꓹ

ꓣꓳ ꓟꓲ ꓠꓯ ꓗꓪ ꓛꓳꓻ ꓫꓱꓽ ꓔꓬ ꓕꓯ ꓞꓳ ꓤ ꓕꓲ ꓣꓳ ꓘꓴˍ ꓡꓰ꓾ ꓮ ꓟ ꓥˍ ꓟꓲ ꓒꓵꓽ ꓶ ꓙꓳˍ ꓡꓳ= ꓐꓳ ꓶ ꓙꓳˍ ꓡꓳ= ꓚꓲꓸ ꓛꓬ ꓒꓵꓽ ꓗ ꓚꓰꓸ ꓔ ꓟ꓾ ꓚꓲꓸ ꓛꓬ ꓮ ꓘꓶꓸ ꓠꓲꓹ ꓥꓳˍ ꓟ ꓕꓲ ꓫꓵꓽ ꓫꓵꓽ ꓙꓳˍ ꓡꓳ= ꓣꓳ ꓘ-ꓣꓲ-ꓢ-ꓔꓴ ꓢꓲꓺ ꓤ꓾ ꓙꓲ-ꓢꓴ ꓢꓲꓺ ꓤ ꓐꓴ ꓐꓱ ꓶ ꓠꓬ ꓙꓵꓻ ꓠꓲꓹ ꓐꓯ ꓟ ꓢꓲꓺ ꓒ ꓬꓰ-ꓢꓴ ꓔꓯ ꓙꓵˍ ꓟ꓾ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓔꓬ ꓡꓳ꓾ ꓣꓳ ꓔꓯ ꓚꓬꓴꓸ ꓙ ꓗꓷꓳ꓾ ꓣꓳ ꓠꓬ ꓢꓯꓼ ꓟꓬ ꓟꓶˍꓡꓳ꓾ ꓐꓯ ꓟ ꓠꓬ ꓐꓳ ꓶ ꓓꓽ ꓟ ꓥ ꓡꓳ= ꓒꓵꓽ ꓶ ꓓꓽ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓒꓵꓽ ꓶ ꓕꓱ ꓟ ꓔꓯ ꓣꓳ ꓮ ꓡꓲ ꓐꓰ ꓔꓵꓹ ꓔ ꓡ꓾ ꓐꓳ ꓶ ꓕꓱ ꓟ ꓔꓯ ꓮ ꓡꓲ ꓐꓰ ꓒꓵꓽ ꓗ ꓚꓰꓸˍ ꓡ꓾ ꓐꓯ ꓟ ꓔꓯ ꓣꓳ ꓜꓳꓽ ꓜꓳꓽ ꓓꓵꓽ ꓙ ꓠꓬꓲ ꓠ ꓗˍ ꓡꓳ= 

ꓠꓬꓲꓸ ꓠꓬꓲ ꓣꓳ ꓵꓻ ꓪˍ ꓟ ꓟꓸ ꓟꓲꓽ (ꓟ-ꓕꓲ 7ꓽ6ꓹ12-14) ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ= ꓮ ꓠꓽ ꓔꓯ ꓙꓲꓻ ꓫꓬ ꓟ ꓕꓽ ꓖꓶ꓾ ꓮ ꓪꓯꓼ ꓔꓬ ꓗꓪ ꓒꓵꓽ ꓶ ꓔꓯ ꓕꓽ ꓟꓳꓸ ꓖꓶ= ꓬꓲ ꓪ ꓠꓬ ꓒꓵꓽ ꓶ꓾ ꓐꓳ ꓶ ꓖꓳ ꓟ ꓬꓲ ꓒꓵꓽ ꓔꓯ ꓟꓽ ꓢꓷꓸ ꓠꓬꓲ ꓕꓳꓼ ꓗꓷˍ ꓥꓳ꓾ ꓐꓰ ꓐꓯ ꓡꓳ= 

ꓣꓳ ꓟꓲ ꓠꓯ ꓕꓱ ꓟ ꓗꓪ ꓛꓳꓻ ꓫꓱꓽ ꓔꓬ ꓕꓯ ꓕꓲ ꓖ ꓕꓲ ꓧꓪꓹ ꓣꓳ ꓮ ꓘꓶꓸ ꓒꓵꓽ ꓗ ꓚꓰꓸˍ ꓟ ꓠꓲꓹ ꓠꓵˍ ꓟ ꓔꓯ ꓠꓱꓸ ꓐꓯ ꓢꓴ ꓤꓲꓻ ꓡ ꓗꓸ ꓧꓪ ꓡˍ ꓟ ꓦꓬꓼ ꓠꓬꓲ ꓮ ꓟꓬꓹ ꓔꓳꓹ ꓜꓳꓽ ꓗꓴꓸˍ ꓡꓳ= ꓣꓳ ꓠꓬ ꓣꓳ ꓤꓶꓻ ꓐꓰ ꓕꓲ ꓡꓰꓹ ꓒꓵꓽ ꓗ ꓚꓰꓸˍ ꓟ ꓕꓲ ꓫꓵꓽ ꓫꓵꓽ ꓔꓯ ꓠꓱꓸ ꓐꓯ ꓢꓴ ꓡꓰ ꓐꓯ ꓒꓬꓹ ꓡ ꓕꓯ꓾ ꓗꓸ ꓧꓪ ꓡ ꓕꓯ ꓣꓳ ꓠꓬ ꓝꓮꓲ ꓕꓲ ꓧꓪꓹ ꓟꓸ ꓜꓽ ꓠꓲꓹ ꓫꓵˍ ꓡꓳ= ꓝꓮꓲ ꓕꓲ ꓧꓪꓹ ꓔꓲꓸ ꓠꓲꓹ ꓫꓵˍ ꓡꓳ= ꓕꓱ ꓟ ꓠꓬ ꓮ ꓟ ꓔꓯˍ ꓟꓲ ꓙꓳˍ ꓟ ꓠꓲꓹ ꓟ ꓥ ꓡꓳ= ꓣꓳ ꓐꓱ ꓶ ꓒꓵꓽˍ ꓟ ꓔꓯ ꓠꓱꓸ ꓐꓯ ꓢꓴ ꓡꓰ ꓐꓯ ꓒꓬꓹ ꓡ ꓕꓯ ꓣꓳ ꓠꓬ ꓝꓮꓲ ꓕꓲ ꓧꓪꓹ ꓬꓰ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓡˍ ꓡꓳ= ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓫꓬꓽ ꓫꓬꓽ ꓡꓰꓽ ꓐꓯ ꓖꓶ ꓡˍ ꓡꓳ= ꓮ ꓠꓽ ꓟꓲꓽ ꓕꓯꓽ ꓢꓲꓺ ꓗꓪ ꓙꓲꓻ ꓫꓬ ꓟ ꓕꓽ ꓡꓳ ꓗꓷ= ꓮ ꓪꓯꓼ ꓟꓲ ꓙꓬ ꓗꓪ ꓒꓵꓽ ꓶ ꓔꓯ ꓕꓽ ꓟꓳꓸ ꓖꓶ= ꓬꓲ ꓠꓬ ꓕꓳꓼ ꓗꓷˍ ꓥꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟꓳꓸ ꓖꓶ ꓡˍ ꓟ ꓮ ꓫꓵꓽ ꓪꓴꓸ ꓠꓷꓸ ꓟꓽ ꓙꓳ ꓟ꓾ ꓥ ꓠꓬ꓾ ꓒꓵꓽ ꓶ ꓐꓳ ꓶ ꓐꓯ ꓟ ꓬꓲ ꓪ ꓤꓶꓻ ꓗꓪ ꓮ ꓫꓵꓽˍ ꓟꓲ ꓟꓽ ꓙꓳ ꓢꓴ ꓐꓰ ꓕꓽ ꓒꓬꓳꓸ ꓡꓯ ꓘꓳ= ꓕꓽ ꓓꓶꓽ ꓡꓯ ꓘꓳ= ꓕꓽ ꓔꓲꓸ ꓡꓯ ꓘꓳ= ꓣꓳ ꓠꓬ ꓣꓳ ꓙꓵꓻˍ ꓟ ꓣꓳ ꓐꓳ ꓶ ꓔꓯ ꓕꓶꓻ ꓕꓶꓻ ꓡꓰ ꓪꓳ ꓔ ꓢꓲ ꓠꓬꓲ ꓙꓰ= ꓠꓱꓸ ꓐꓯ ꓢꓴ ꓕꓽ ꓗꓸ ꓧꓪ ꓡꓯ ꓘꓳ꓾ ꓕꓽ ꓓꓶꓽ ꓡꓯ ꓘꓳ꓾ ꓐꓯ ꓟ ꓣꓳ ꓔꓯ ꓟꓳꓸ ꓖꓶ ꓡˍ ꓡꓳ= ꓚꓵꓺ ꓚꓵꓺ ꓠꓴ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓛꓳꓻ ꓢꓴ ꓕꓲ ꓣꓳ ꓥ ꓕꓯ ꓠꓽ꓾ ꓠꓴ ꓒꓵꓽ ꓶ ꓔꓯ ꓠꓴ ꓕꓶꓻ ꓕꓶꓻ ꓡꓰꓽ ꓔꓵꓹ ꓔ= ꓠꓴ ꓐꓳ ꓶ ꓔꓯ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓫ ꓔ ꓢꓲ ꓡꓯ ꓫꓵ ꓙꓰ= ꓬꓲ ꓙꓵꓹ ꓔꓯ꓾ ꓣꓳ ꓢꓯꓼ ꓪ ꓔꓯ꓾ ꓣꓳ ꓢꓷꓸ ꓠꓲꓹ ꓔꓯ ꓣꓱꓽ ꓟꓽ ꓬꓯꓼ ꓟ ꓞꓳ ꓤ ꓐꓴ ꓐꓱ ꓶ ꓕꓽ ꓣꓱꓽ꓾ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓟ ꓥ ꓡꓳ= 

ꓖꓳ ꓡꓱ ꓠꓬꓲ ꓣꓳ ꓠꓬꓲꓸ ꓠꓬꓲ ꓓꓵꓽ ꓙ ꓓꓴ ꓠꓬ ꓣꓳ ꓒꓵꓽ ꓶ ꓔꓯ ꓕꓶꓻ ꓕꓶꓻ ꓡꓰ ꓔꓵꓹ ꓔ= ꓐꓳ ꓶ ꓔꓯ ꓪꓳ ꓔ ꓢꓲ ꓠꓬꓲ ꓢꓲꓺ ꓒ ꓬꓰ-ꓢꓴ ꓐꓰ ꓕꓲ ꓡꓰꓹ ꓟꓲ ꓙꓬ ꓙꓰˍ ꓟ ꓦꓬꓼ ꓠꓬꓲ ꓗꓪ ꓞꓳ ꓙꓳ ꓙꓰ ꓡꓯ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓩꓴ ꓡ ꓟ ꓥ ꓡꓳ= ꓪꓴ-ꓢ ꓠꓬ ꓮ ꓕꓯ ꓟꓲ ꓠꓴ ꓪ ꓔꓯ ꓶꓽ ꓥꓳꓽ ꓙꓱꓽ ꓖꓶ ꓝꓲ=