ꓬꓰ-ꓢꓴ ꓑꓶꓸ ꓓꓴ ꓬꓲ ꓗꓪꓺ ꓗꓪ ꓡꓰˍ ꓟ

ꓣꓳ ꓐꓴ ꓠꓬ ꓫꓸ ꓓꓴ ꓕꓲ ꓫꓵꓽ ꓫꓵꓽ ꓓꓳꓻ ꓡˍ ꓕꓯ ꓮ ꓔꓳꓸ ꓐꓰ ꓔꓯꓺ ꓢꓲ ꓐꓯˍ ꓡꓳ= ꓙ ꓫꓸ ꓟ꓾ ꓠꓲꓹ ꓟ ꓫꓸ ꓟ꓾ ꓓꓵꓽ ꓙ ꓟꓬꓽ ꓓꓵꓽ ꓙ ꓪꓴꓽ ꓧꓶˍ ꓟ ꓠꓬ ꓮ ꓔꓳꓸˍ ꓡꓰ ꓐꓰ ꓞꓻˍ ꓟ ꓥ ꓡꓳ= ꓠꓲꓹ ꓟ ꓫ ꓓꓴ ꓮ ꓘꓶꓸ ꓟꓬꓽ ꓡ ꓮ ꓘꓶꓸ ꓬꓲ ꓘꓴꓽ ꓗꓪ ꓮ ꓟꓬꓹ ꓞꓴ ꓔꓴ ꓡˍ ꓟ ꓥ ꓡꓳ=

ꓖꓳ ꓡꓱ ꓥˍ ꓟꓲ ꓠꓬꓲꓸ ꓠꓬꓲ ꓗꓪ ꓣꓳ ꓵꓻ ꓪˍ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓡꓴ-ꓘ 12ꓽ49-53 ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓕꓱ ꓡꓱ ꓐꓯ ꓡꓳ= “ꓥꓪ ꓠꓬ ꓟꓲ ꓠꓯ ꓗꓪ ꓮ ꓔꓳꓸ ꓔꓯꓹ ꓧꓳꓽˍ ꓐꓰ ꓡˍ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ= ꓝꓮꓲ ꓠꓬ ꓥꓪ ꓠꓬ ꓢꓴ ꓔꓯ ꓬꓲ ꓗꓪꓺ ꓗꓪ ꓡꓰ ꓝꓲ ꓠꓹ ꓟ ꓡˍ ꓟ ꓥ ꓡꓳ꓾ ꓐꓰ ꓐꓯ ꓡꓳ= ꓐꓯ ꓘꓶꓽ ꓕꓱ ꓟ ꓔꓯ ꓑ ꓙˍ ꓕꓯ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓞꓳ ꓤ ꓔꓯ ꓠꓲꓹ ꓠꓵꓻ ꓡꓳ ꓐꓯ ꓔꓬ ꓥˍ ꓟꓲ ꓬꓲ ꓠꓽ ꓮ ꓔꓳꓸ ꓡꓰ ꓣꓳ ꓔꓯ ꓞꓴ ꓠꓲꓹ ꓫꓵˍ ꓥ ꓟꓽ ꓢꓷꓸ꓾ ꓐꓰ ꓓꓵꓽ ꓙ ꓟꓶ ꓡˍ ꓥꓳ=

ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟ ꓮ ꓔꓳꓸ ꓠꓬ ꓠꓲꓹ ꓫ ꓟꓬ ꓫꓸ ꓟ꓾ ꓓꓵꓽ ꓙ ꓟꓬꓽ ꓓꓵꓽ ꓙ ꓪꓴꓽ ꓧꓶˍ ꓟ ꓮ ꓔꓳꓸ ꓔꓯ ꓐꓯ ꓟ ꓟꓽ ꓥ= ꓢꓲ ꓒ ꓬꓲ ꓠꓵꓻ ꓠꓲꓹ ꓔꓯ ꓐꓯ ꓟ ꓥ ꓡꓳ= ꓬꓲ ꓠꓵꓻ ꓠꓲꓹ ꓮ ꓔꓳꓸ ꓠꓬ ꓮ ꓕꓯ ꓟꓲ ꓐꓬꓻ ꓔꓬ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓙꓬꓻ ꓓꓷꓼ ꓓꓷꓼ ꓗꓹ ꓟ ꓠꓲꓹ ꓟ ꓔꓯ ꓡꓱꓻ ꓡꓰ ꓝꓲˍ ꓡꓳ= ꓫꓸ ꓓꓴ ꓔꓳꓹ ꓜꓳꓽ ꓪ ꓡꓰ ꓟ ꓑꓶꓸ ꓓꓴ ꓬꓲ ꓠꓻ ꓓꓴ ꓓꓴ ꓡꓰ ꓟ ꓠꓲꓹ ꓟ ꓔꓯ ꓬꓲ ꓠꓵꓻ ꓠꓲꓹ ꓮ ꓔꓳꓸ ꓗꓪ ꓐꓰ ꓓꓻ ꓡꓰ ꓝꓲˍ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟ ꓮ ꓔꓳꓸ ꓠꓬ ꓕꓱ ꓟ ꓔꓯ ꓐꓯ ꓟ ꓥ ꓡꓳ= ꓬꓲ ꓠꓵꓻ ꓠꓲꓹ ꓔꓯ ꓘꓳ ꓣꓴ ꓪ ꓡꓰ ꓗꓷ ꓗ ꓠꓯꓸ ꓠꓲꓹ ꓟ ꓒꓳꓹ ꓡꓰꓼ ꓡˍ ꓡꓳ= ꓕꓲ ꓦꓲ ꓘꓴꓽ ꓗꓪ ꓡꓰꓽ ꓔꓬ ꓟ ꓕꓲ ꓦꓲꓻ ꓡ ꓞꓳ ꓐꓯ ꓥ ꓟꓲ ꓢꓲ ꓒ ꓠꓵꓻ ꓠꓲꓹ ꓘꓳ ꓣꓴ ꓪ ꓡꓰ ꓢꓲ ꓪꓴ-ꓢ ꓔꓯ ꓙꓵꓻ ꓡꓰ ꓕꓯ ꓠꓽ ꓕꓲ ꓦꓲꓻ ꓘꓴꓽ ꓗꓪ ꓠꓲꓹ ꓟ ꓟꓽ ꓫꓱꓸ ꓡꓯ ꓘꓳ ꓟ꓾ ꓟꓽ ꓥ ꓠꓬ ꓕꓲ ꓪ ꓔꓬ ꓠꓹ ꓟꓽ ꓫꓵ ꓪꓴ-ꓢ ꓐꓱ ꓶ ꓔꓲꓺ ꓖꓶ ꓠꓲꓹ ꓫꓵˍ ꓟ ꓠꓲꓹ ꓟ ꓒꓬꓱꓼ ꓡˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓰ-ꓢꓴ ꓔꓯ ꓙꓵꓻ ꓡꓰ ꓟ ꓑꓶꓸ ꓓꓴ꓾ ꓪꓴ-ꓢ ꓠꓵꓻ ꓠꓲꓹ ꓔꓯ ꓘꓳ ꓣꓴ ꓪ ꓡꓰ ꓢꓲ ꓙꓵꓻ ꓠꓲꓹ ꓠꓯꓸꓼ ꓗꓪ ꓕꓶꓺ ꓞꓹ ꓡꓰ ꓟ ꓑꓶꓸ ꓓꓴ ꓕꓲ ꓦꓲꓻ ꓘꓴꓽ ꓗꓪˍ ꓟ ꓟꓽ ꓪ ꓡꓯ ꓘꓳ꓾ ꓬꓲ ꓗꓪꓺ ꓗꓪ ꓡꓰ ꓓꓴ ꓒꓬꓱꓼ ꓡˍ ꓡꓳ=

ꓞꓳ ꓤ ꓙꓲꓻ ꓖꓴ ꓐꓱ ꓶ ꓮ ꓟꓬꓹ ꓬꓰ ꓗꓷ ꓟ ꓙꓲꓻ ꓫꓬ ꓢꓴ ꓐꓴ꓾ ꓬꓰ-ꓢꓴ ꓗ ꓠꓯꓸ ꓛꓳꓻ ꓔꓬ ꓟ ꓝꓲ ꓓꓴ ꓐꓴ ꓠꓬ ꓪꓴ-ꓢ ꓠꓵꓻ ꓠꓲꓹ ꓔꓯ ꓘꓳ ꓣꓴ ꓪ ꓡꓰ ꓗꓷ ꓗ ꓠꓯꓸ ꓠꓵꓻ ꓠꓲꓹ ꓖꓳ ꓟ ꓔꓯ ꓞꓳ ꓤ ꓐꓴ ꓔꓬ ꓗꓪ ꓛꓲꓺ ꓡꓰ ꓠꓹ ꓟ ꓚꓲꓸ ꓛꓬ ꓔꓯ ꓐꓬꓻ ꓗꓷ ꓢꓴ ꓐꓴˍ ꓡꓰ ꓥ ꓡꓳ=

ꓖꓳ ꓟ ꓑꓶꓸ ꓓꓴ ꓪꓴ-ꓢ ꓬꓲ ꓠꓵꓻ ꓠꓲꓹ ꓔꓯ ꓘꓳ ꓣꓴ ꓟꓶ ꓡꓰ ꓗ ꓠꓯꓸ ꓠꓵꓻ ꓠꓲꓹ ꓮ ꓔꓳꓸ ꓖꓳ ꓟ ꓔꓯ ꓠꓱꓸ ꓐꓯ ꓢꓴ ꓔꓬ ꓗꓪ ꓛꓲꓺ ꓬꓰ ꓠ ꓬꓰ ꓙ ꓠꓹ ꓟ꓾ ꓚꓲꓸ ꓛꓬ ꓔꓯ ꓐꓬꓻ ꓝꓲ ꓠꓹ ꓟ ꓐꓱ ꓶ ꓙꓽ ꓖꓶ ꓗꓷ ꓪ? ꓐꓯ ꓟ ꓠꓬꓲꓸ ꓠꓬꓲ ꓗꓪ ꓣꓳ ꓚꓲꓸ ꓛꓬ ꓠ ꓠꓬꓲ ꓡꓯ=