ꓚꓳ ꓑꓸ ꓐꓴ ꓔꓯ ꓒꓴ ꓡꓯꓼ ꓙꓱ_ ꓟ ꓔꓯ ꓥꓳꓽ

Wednesday, November 16, 2022

ꓪꓴ-ꓢ ꓡꓰ ꓚꓰꓼ ꓔ ꓟ ꓮ ꓙꓵ ꓠꓯꓼ ꓗꓪ ꓠꓬ ꓪꓴ-ꓢ ꓡꓰ ꓖꓶ ꓔ ꓟ ꓶꓽ ꓤ ꓫꓱꓸ ꓤ ꓙꓳ_ ꓟ ꓥꓳ= ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓞꓳ ꓤ 3 ꓫꓵꓽ ꓔꓯ ꓟꓳ ꓪ ꓡꓳ= ꓢꓲ ꓒꓽ ꓕꓲ ꓣꓳ ꓠꓬ ꓶꓽ ꓤ ꓟ ꓟꓵꓽ ꓗꓪ ꓟꓽ ꓙꓰ ꓟꓲ ꓕꓯ ꓬꓲ ꓚꓳ ꓑꓸ ꓞꓲ ꓣꓳ ꓔꓯ ꓘꓴ ꓕꓯꓹ ꓡ ꓢꓲ ꓬꓲ ꓪ ꓔꓯ ꓒꓴ ꓕꓲ ꓣꓳ ꓕꓲ ꓟꓲ-ꓠ ꓖꓶ_ ꓡꓳ= ꓬꓲ ꓪꓴꓸ ꓕꓲ ꓣꓳ ꓠꓬ ꓞꓲ ꓟꓲ-ꓠ ꓒꓳꓹ ꓟꓶ ꓡꓰ ꓟ ꓡꓰ ꓐꓰ ꓠꓬꓲꓽ ꓣꓳ ꓕꓲ ꓣꓳ ꓠꓬ ꓥꓪꓽ ꓟꓲ-ꓠ ꓒꓳꓹ ꓟꓶ ꓡꓰ ꓟ ꓥꓳ= ꓕꓱ ꓡꓱ ꓬꓲ ꓢꓲ ꓒꓽ ꓡꓰ ꓖꓶ ꓔ ꓟ ꓒꓴ ꓔꓯ ꓟꓬ ꓡ ꓠꓹ ꓟ ꓒꓳꓹ ꓟꓶ ꓟ ꓑꓶ ꓓꓴ ꓬꓲ ꓪꓴꓸ ꓕꓲ ꓣꓳ ꓔꓯ ꓡꓳ ꓒꓱ ꓞꓲ ꓟ ꓙꓵꓽ ꓝꓲ_ ꓡꓳ꓾ ꓠꓬꓲꓽ ꓣꓳ ꓕꓲ ꓣꓳ ꓔꓯ ꓡꓳ ꓒꓱ ꓥꓪꓽ ꓟ ꓙꓵꓽ ꓝꓲ_ ꓟ ꓕꓱ ꓡꓱ ꓡꓯꓼ ꓫꓴꓺ ꓖꓶ_ ꓟ ꓥꓳ=

ꓝꓮꓲ ꓕꓲ ꓣꓳ ꓠꓬ ꓒꓴ ꓕꓲ ꓟꓲ-ꓠ ꓟ ꓔꓯ ꓟꓬ ꓡ ꓠꓹ ꓟ ꓟꓽ ꓬꓰ ꓔ ꓟ ꓡꓰ ꓟ ꓞꓲ ꓖꓳ ꓒꓴ ꓕꓲ ꓟꓲ-ꓠ ꓟ ꓔꓯ ꓫ ꓔ ꓢꓲ ꓬꓲ ꓢꓲ ꓒꓽ ꓔꓯ ꓡꓯꓼ ꓛꓱ_ ꓡꓳ= ꓬꓲ ꓡꓰ ꓙꓲ ꓖꓴ ꓟꓽ ꓙꓳ_ ꓟ ꓚꓳ ꓑꓸ ꓠꓲ ꓚꓲ ꓛꓬ ꓐꓯ ꓘꓶꓽ ꓗꓪ ꓐꓰ ꓠꓴ ꓔꓯ ꓥꓪ ꓐꓯ ꓟꓴ ꓞꓷꓹ_ ꓥꓳ ꓐꓰ ꓐꓯ_ ꓡꓳ= ꓬꓲ ꓠꓯꓼ ꓗꓪ ꓖꓶ ꓔ ꓟ ꓶꓽ ꓤ ꓫꓱꓸ ꓤ ꓔꓯ ꓟꓽ ꓣꓱꓽ ꓟ ꓑꓶ ꓓꓴ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓥ ꓟꓲ ꓕꓱ ꓞꓳ ꓤ 3 ꓫꓵꓽ ꓗꓪ ꓐꓰ ꓮ ꓡꓰ ꓕꓲ ꓣꓳ ꓐꓰ ꓪ_ ꓡ? ꓐꓰ ꓓꓵꓽ ꓙ ꓠꓹ ꓟ ꓥꓳ= ꓬꓲ ꓪꓴꓸ ꓕꓲ ꓣꓳ ꓐꓰ ꓠꓬꓲꓽ ꓣꓳ ꓕꓲ ꓣꓳ ꓡꓰ ꓐꓰ ꓗꓷ ꓠꓬ ꓪꓴ-ꓢ ꓡꓰ ꓖꓶ ꓔ ꓟ ꓶꓽ ꓤ ꓫꓱꓸ ꓤ ꓔꓯ ꓟꓬ ꓠꓬꓲ ꓢꓯꓼ ꓔꓵꓼ ꓢꓲ ꓪꓴ-ꓢ ꓐꓱ ꓶ ꓟꓲ ꓠꓯ ꓞꓳ ꓤ ꓐꓱ ꓶ ꓢꓯꓼ ꓕꓵꓼ ꓔꓬ ꓟ ꓥ ꓢꓲ꓾ ꓢꓽ ꓣꓳ ꓕꓲ ꓣꓳ ꓡꓰ ꓐꓰ ꓥ ꓠꓬ ꓣꓳ ꓚꓲ ꓛꓬ ꓔꓱꓹ ꓕ ꓢꓲ ꓟꓬ ꓠꓬꓲ ꓙꓲ_ ꓟ ꓤꓶꓻ ꓗꓪ ꓐꓰ ꓪꓴ-ꓢ ꓐꓰ ꓞꓳ ꓤ ꓐꓱ ꓶ ꓙꓲ ꓖꓴ ꓙꓳ_ ꓟ ꓬꓰ ꓙ ꓐ ꓡ ꓢꓴ ꓒꓬꓱꓼ ꓡ ꓠꓹ ꓟ ꓪꓴ-ꓢ ꓡꓰ ꓖꓶ ꓔ ꓟ ꓶꓽ ꓤ ꓫꓱꓸ ꓤ ꓔꓯ ꓣꓱꓽ ꓗꓴꓸ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ=