ꓥꓪꓸ ꓢꓰꓼ ꓒꓽ ꓡꓲ ꓣꓳ ꓔꓯ ꓘꓴ_ ꓟ

Wednesday, November 30, 2022

ꓠꓬꓲ ꓠꓬꓲ ꓢꓲ ꓫꓬ ꓕꓳ ꓶ ꓶꓽ ꓓꓳ ꓫꓱꓹ ꓓꓳꓽ ꓗꓪ ꓬꓰ-ꓢꓴ ꓠꓬ ꓬꓲ ꓠꓯꓼ ꓗꓪ ꓛꓳ ꓠꓹ ꓟ ꓝꓲ ꓓꓴ ꓗꓷ ꓡꓰ ꓠꓹ ꓟ ꓥꓪꓸ ꓢꓰꓼ ꓒꓽ ꓢꓲ-ꓟꓴ ꓐꓰ ꓬꓲ ꓠꓬꓲ ꓤ ꓯ-ꓓꓯ-ꓣꓴ꓾ ꓬ-ꓗꓴ ꓐꓰ ꓬꓲ ꓠꓬꓲ ꓤ ꓬꓳ-ꓦ ꓬꓲ ꓪ ꓡꓲ ꓣꓳ ꓔꓯ ꓘꓴ_ ꓟ ꓥꓳ= ꓬꓲ ꓪ ꓠꓬ ꓬꓲ ꓪ ꓟꓬꓱꓽ ꓮ ꓙꓵ ꓔꓯ ꓡꓳ ꓒꓲꓹ ꓗꓷ ꓡꓰ ꓟ ꓡꓰ ꓟꓽ ꓞꓲ ꓬꓲ ꓪ ꓐꓹ ꓐꓽ ꓔꓯ ꓗꓶ ꓔ ꓬꓰ ꓢꓲ ꓬꓰ-ꓢꓴ ꓔꓯ ꓛꓳ ꓙꓰ_ ꓟ ꓥꓳ= ꓕꓱ ꓟ ꓠꓬ ꓬꓲ ꓪ ꓠꓬ ꓬꓰ-ꓢꓴ ꓔꓯ ꓬꓲ ꓪꓴꓸ ꓢꓷꓸ ꓔ ꓟ ꓟꓽ ꓥ꓾ ꓬꓲ ꓪ ꓠꓬ ꓬꓰ-ꓢꓴ ꓚꓱꓹ ꓔꓯ ꓢꓷꓸ ꓢꓴ ꓥ ꓡꓳ= ꓬꓲ ꓪ ꓠꓬ ꓬꓰ-ꓢꓴ ꓐꓱ ꓶ ꓮ ꓙꓵ ꓒꓲꓹ ꓗꓷ ꓟ ꓥꓳ= ꓬꓲ ꓪ ꓐꓱ ꓶ ꓮ ꓙꓵ ꓠꓬ ꓟꓽ ꓣꓳꓸ ꓚꓵ ꓫꓵ ꓟꓽ ꓥ꓾ ꓖꓳ ꓡꓱ ꓥ ꓟꓲ ꓟꓬ ꓠꓬꓲ ꓣꓳꓸ ꓚꓵ_ ꓟ ꓚꓱꓹ ꓙꓳ_ ꓟ ꓑꓶ ꓓꓴ ꓬꓲ ꓪ ꓔꓯ ꓘꓴ_ ꓥꓳ=

ꓡ ꓞꓳ ꓮ ꓟꓬꓹ ꓔꓯ ꓑꓱꓸ ꓗꓶ ꓔ ꓢꓴ ꓗꓷ ꓡꓰ ꓠꓹ ꓟ ꓪꓴ-ꓢ ꓗꓴꓷꓼ ꓐꓱ ꓶ ꓝꓲ ꓓꓴ ꓗꓷ ꓡꓰ ꓠꓹ ꓟ ꓥ ꓡꓳ= ꓪꓴ-ꓢ ꓬꓲ ꓟꓬꓱꓽ ꓒꓬꓱꓽ ꓘꓶꓽ ꓔꓯ ꓐꓲ ꓞꓲꓼ ꓠꓹ ꓟ ꓬꓲ ꓪ ꓠꓬ ꓕꓲ ꓦꓲ ꓡ ꓞꓳ ꓚꓱꓹ ꓔꓯ ꓙ ꓢꓲ ꓙ ꓜꓲꓼ ꓠꓹ ꓟ꓾ ꓮ ꓙꓵ ꓔꓯ ꓬꓲ ꓪ ꓬꓲꓼ ꓠꓬꓲ ꓤ ꓡꓰ ꓐꓰ ꓠꓲꓹ ꓡꓱ ꓘꓳꓹ ꓣꓴ ꓢꓲ ꓡ ꓞꓳ ꓮ ꓟꓬꓹ ꓐꓱ ꓶ ꓙꓲ ꓖꓴ ꓙꓳ ꓠꓹ ꓟ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓥ ꓟꓲ ꓖꓳ ꓓꓱ ꓔꓲꓹ ꓢꓲ꓾ Confirmation Sacrament ꓔꓯ ꓘꓳꓹ ꓣꓴ ꓟꓶ_ ꓟ ꓗꓪ ꓐꓰ ꓪꓴ-ꓢ ꓡꓰ ꓘꓴ ꓟꓶ_ ꓟ ꓥꓳ= ꓣꓳ ꓥ ꓟꓲ ꓬꓰ-ꓢꓴ ꓠꓯꓼ ꓗꓪ ꓛꓳ ꓠꓹ ꓟ ꓝꓲ ꓓꓴ ꓐꓴ ꓡꓰ ꓐꓰ ꓮ ꓙꓵ ꓔꓯ ꓒꓲꓹ ꓗꓷ ꓢꓲ ꓮ ꓙꓵ ꓔꓯ ꓫꓱꓸ ꓤ ꓠꓵ ꓠꓲꓹ ꓐꓰ ꓪꓴ-ꓢ ꓟꓬꓱꓽ ꓚꓱꓹ ꓔꓯ ꓬꓰ ꓐ ꓡ_ ꓡ ꓛꓳ ꓐ ꓡ_ ꓡ ꓐꓰ ꓚꓲ ꓛꓬ ꓔꓱ, ꓕ ꓠꓹ ꓟ ꓥꓳ= ꓬꓰ-ꓢꓴ ꓠꓯꓼ ꓗꓪ ꓐꓰ ꓙꓲ_ ꓟ ꓝꓲ ꓓꓴ ꓗꓷ ꓡꓰ ꓠꓹ ꓟ ꓪꓴ-ꓢ ꓙꓲ_ ꓟ ꓤ ꓠꓱ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ=