ꓣꓳ ꓔꓯ ꓬꓲ. ꓪꓻ ꓗꓪ ꓐꓰ ꓡꓲꓹ ꓗꓷ ꓝꓲ ꓢꓴ ꓠꓬ ꓪꓴ-ꓢ ꓥ ꓡꓳ꓾

ꓣꓳ ꓡꓲ-ꓢꓴ ꓫꓵꓽ ꓐꓴ ꓠꓬ ꓧꓪꓽ ꓧꓪ꓾ ꓪ ꓕꓴ꓾ ꓥꓪꓸ ꓧꓪˍ ꓟ ꓟꓬꓱꓽ ꓐꓴ ꓗꓪ ꓮ ꓘꓶꓸ ꓪꓽ ꓠꓬꓲˍ ꓡꓳ= ꓓꓻˍ ꓡꓳ= ꓕꓱ ꓟˍ ꓡꓰ ꓐꓰ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓓꓴ ꓠꓬ ꓣꓳ ꓬꓰ ꓔꓬ ꓟ꓾ ꓧꓪꓽ ꓕꓴ ꓔꓬ ꓟ꓾ ꓠꓬꓹ ꓕꓴ ꓔꓬ ꓟ꓾ ꓝꓮꓲ ꓥꓪꓸ ꓠꓸ ꓔꓬ ꓟ ꓕꓱ ꓡꓱ ꓬꓰˍ ꓕꓯ ꓓꓵꓽ ꓙ ꓠꓬꓲ ꓓꓴ ꓕꓲ ꓟ ꓠꓬ ꓣꓳ ꓕꓴ ꓔ ꓟ ꓬꓲ ꓪ ꓔꓯ ꓙꓱꓽ ꓤ ꓙꓱꓽ ꓟꓲ ꓠꓬ ꓢꓷꓸ ꓟꓽ ꓘꓴ ꓐꓯ ꓟ ꓥ ꓡꓳ= ꓬꓲ ꓪ ꓔꓯ ꓕꓴ ꓔ ꓟ ꓪ ꓥ ꓟ ꓔꓯ ꓬꓲ ꓪ ꓟꓽ ꓢꓷꓸ= ꓮ ꓫꓵꓽ ꓑꓶꓸ ꓓꓴ ꓥ ꓡ? ꓬꓲ ꓪ ꓠꓬ ꓓꓵꓽ ꓙ ꓟꓽ ꓗꓴꓸ= ꓓꓵꓽ ꓙ ꓗꓴꓸˍ ꓥ ꓟꓲ ꓕꓱ ꓟ ꓠꓬ ꓬꓲ ꓪ ꓥꓳ꓾ ꓐꓯ ꓟ ꓬꓲ ꓪ ꓟꓽ ꓢꓷꓸ= ꓮ ꓡꓲꓳ ꓐꓯ ꓠꓬ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓙꓱꓽ ꓤ ꓢꓶꓸ ꓟꓽ ꓞꓲ ꓕꓰˍ ꓟ ꓑꓶꓸ ꓓꓴ꓾ ꓬꓲ ꓪ ꓢꓶꓸ ꓟꓽ ꓞꓲꓺ ꓓꓻˍ ꓟ ꓑꓶꓸ ꓓꓴ ꓧꓪꓽ ꓧꓪꓸˍ ꓟ ꓗꓪ ꓟꓲ ꓠꓯ ꓞꓳ ꓤ ꓪꓴꓸ ꓠꓶꓸ ꓔꓯ ꓧꓪꓸ ꓟꓽ ꓓ= ꓔꓯꓺ ꓥꓳꓽ ꓣꓳ ꓥꓪꓸ ꓠꓸ ꓕꓯ ꓥꓪꓸ ꓠꓬ ꓬꓲ ꓜꓽ ꓓꓴ ꓟꓳꓻˍ ꓕꓯ ꓜꓽˍ ꓥꓳ= ꓕꓱ ꓟˍ ꓡꓰ ꓐꓰ ꓠꓬꓹ ꓤ ꓐꓴ ꓥ ꓟꓲ ꓬꓲ ꓙꓰ ꓚꓱꓹ ꓗꓪ ꓕꓴ ꓔ ꓟ ꓪ ꓔꓯ ꓬꓲ ꓡꓳꓸ ꓟꓽ ꓐ ꓡ= ꓬꓲ ꓔꓯ ꓕꓴ ꓔ ꓟ ꓪ ꓔꓯ ꓬꓲ ꓟꓽ ꓢꓷꓸ=

ꓕꓱ ꓟˍ ꓡꓰ ꓐꓰ ꓠꓬꓲꓸ ꓠꓬꓲ ꓣꓳ ꓓꓵꓽ ꓙ ꓟꓶ ꓓꓴ ꓠꓬ ꓠꓲꓽ ꓢ-ꓓꓯ ꓥˍ ꓟꓲ ꓣꓳ ꓔꓯ ꓬꓲ ꓪ ꓕꓴ ꓔ ꓡꓳ꓾ ꓐꓯ ꓟ ꓥ ꓡꓳ= ꓣꓳ ꓠꓬ ꓠꓬꓹ ꓤ ꓡꓰ ꓐꓰ ꓬꓲ ꓪ ꓥ ꓟꓽ ꓥ ꓣꓳ ꓢꓷꓸ ꓟꓽ ꓘꓴ= ꓠꓬꓹ ꓤ ꓐꓰ ꓙꓱꓽ ꓤ ꓙꓱꓽ ꓟꓲ ꓐꓴ ꓬꓲ ꓪ ꓔꓯ ꓕꓴ ꓔ ꓟ ꓪ ꓔꓯ ꓬꓲ ꓪ ꓟꓽ ꓢꓷꓸ ꓟˍ ꓡꓰ ꓐꓰ꓾ ꓕꓲ ꓖ ꓕꓲ ꓧꓪꓹ ꓟꓲ ꓠꓯ ꓕꓱ ꓟ ꓗꓪ ꓣꓳ ꓞꓳ ꓙꓳ ꓔꓬ ꓕꓯ ꓢ-ꓓꓯ ꓠꓬ ꓬꓲ ꓪ ꓕꓴ ꓔ ꓥˍ ꓟꓲ ꓕꓱ ꓟ ꓠꓬ ꓬꓲ ꓪ ꓥ ꓡ꓾ ꓟꓽ ꓥ ꓡ ꓐꓯ ꓟ ꓔꓯ ꓣꓳ ꓓꓵꓽ ꓙ ꓟꓽ ꓑꓰ꓾ ꓓꓵꓽ ꓙ ꓟꓽ ꓛꓲꓺ ꓟ ꓮ ꓟꓬꓹ ꓙꓳˍ ꓡꓳ= ꓕꓲ ꓐꓱ ꓔꓯ ꓣꓳ ꓢꓷꓸ ꓓꓹ ꓥ ꓟꓲ ꓕꓲ ꓐꓱ ꓔꓯ ꓠꓬ ꓣꓳ ꓢꓷꓸ ꓟꓽ ꓓ= ꓣꓳ ꓧꓪꓽ ꓧꓪꓸˍ ꓕꓯ ꓮ ꓘꓶꓸ ꓕꓰˍ ꓟ ꓙꓱꓽ ꓤ ꓐꓴ ꓠꓬ ꓬꓲ ꓪ ꓕꓴ ꓔ ꓟ ꓔꓯ ꓢꓷꓸˍ ꓟ ꓑꓶꓸ ꓓꓴ ꓪ ꓕꓴ ꓔ ꓟ ꓗꓪ ꓟꓽ ꓡ= ꓕꓱ ꓟˍ ꓡꓰ ꓐꓰ ꓣꓳ ꓠꓬ ꓢ-ꓓꓯ ꓡꓰ ꓕꓴ ꓔ ꓟ ꓬꓲ ꓪ ꓕꓲ ꓐꓱ ꓔꓯ ꓢꓷꓸˍ ꓥ ꓟꓲ ꓕꓲ ꓐꓱ ꓔ ꓠꓬ ꓢꓷꓸ ꓟꓽ ꓐ ꓡ ꓟ ꓥ ꓡꓳ=

 ꓖꓳ ꓡꓱ ꓣꓳ ꓔꓯ ꓬꓲ ꓪ ꓕꓴ ꓔ ꓟ ꓗꓪ ꓐꓰ ꓮꓽ ꓟ ꓡꓰ ꓡꓲꓹ ꓙꓰ ꓝꓲ ꓐ ꓡˍ ꓡ ꓐꓯ ꓟ ꓔꓯ ꓟꓴꓽ ꓖꓪ 91ꓽ3 ꓗꓪ ꓐꓳ ꓔ ꓡꓳ= ꓪꓴ-ꓢ ꓠꓬ ꓣꓳ ꓔꓯ ꓬꓲ ꓪ ꓗꓪ ꓐꓰ ꓡꓲꓹ ꓙꓰ ꓝꓲ ꓢꓴ ꓥ ꓡꓳ꓾ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓔ ꓡꓳ= ꓕꓱ ꓟ ꓠꓬ ꓬꓲ ꓪ ꓥꓳ꓾ ꓕꓱ ꓗꓪ ꓕꓽ ꓓꓵꓽ ꓙꓰ ꓐꓰ ꓐꓯ ꓖꓶ ꓡ ꓟ ꓠꓬ ꓬꓲˍ ꓡꓰꓽ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ ꓟꓲ ꓠꓯ ꓞꓳ ꓤ ꓪꓴꓸ ꓠꓶꓸ ꓗꓪ ꓐꓰ ꓓꓵꓽ ꓙ ꓟꓽ ꓐ ꓡ ꓟ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓢ-ꓓꓯ ꓡꓰ ꓕꓴ ꓔ ꓟ ꓪ ꓔꓯ ꓫꓬꓽ ꓫꓬꓽ ꓡꓰ ꓡꓳꓸ ꓢꓷꓸ ꓡꓰ ꓠꓹ ꓟ ꓪꓴ-ꓢ ꓡꓰ ꓙ ꓖꓴ ꓟꓸ ꓖꓶ ꓔꓬ ꓟ ꓥ ꓡꓳ=

ꓔꓯ ꓥꓳꓽ ꓣꓳ ꓢ-ꓓꓯ ꓡꓰ ꓕꓴ ꓔ ꓟ ꓪ ꓗꓪ ꓪꓴ ꓡꓰˍ ꓥ ꓟꓲ ꓪꓴ-ꓢ ꓡꓰ ꓣꓳ ꓔꓯ ꓚꓬꓴꓸ ꓙ ꓖꓶ ꓡˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓢ-ꓓꓯ ꓪ ꓘꓴꓽ ꓗꓪ ꓟꓽ ꓓꓵꓽ ꓡꓰ ꓠꓹ ꓟ꓾ ꓓꓵꓽ ꓡꓰˍ ꓥ ꓟꓲ ꓣꓳ ꓔꓯ ꓚꓬꓴꓸ ꓙ ꓖꓶ ꓐ ꓡˍ ꓟ ꓠꓬ ꓪꓴ-ꓢ ꓕꓲ ꓣꓳˍ ꓡꓰꓽ ꓥ ꓡꓳ=

ꓖꓳ ꓡꓱ ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓟ ꓗꓪ ꓪꓴ-ꓢ ꓔꓯ ꓡꓰꓽ ꓦ ꓡꓱ ꓡꓯ= ꓬꓲ ꓔꓯ ꓡꓰꓽ ꓡꓯꓼ ꓙꓱ ꓔ ꓡꓯ= ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓬ ꓢ-ꓓꓯ ꓡꓰ ꓕꓴ ꓔ ꓟ ꓪ ꓥ ꓡ꓾ ꓟꓽ ꓥ ꓡ ꓐꓯ ꓟ ꓢꓷꓸ ꓟꓽ ꓓ ꓟ꓾ ꓫꓱꓸ ꓡꓯ ꓘꓳꓹ ꓟ ꓮ ꓟꓬꓹ ꓙꓳˍ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓢꓯꓼ ꓪ ꓗꓪ ꓐꓰ ꓢꓷꓸ ꓟꓽ ꓓ= ꓪꓴ-ꓢ ꓢꓯꓼ ꓪ ꓣꓱꓽ ꓞꓹ ꓡꓳ= ꓔꓯ ꓥꓳꓽ ꓣꓳ ꓚꓲꓸ ꓛꓬ ꓛꓳ ꓚꓲꓸ ꓛꓬ ꓪꓴ ꓡꓰ ꓟ ꓦꓬꓼ ꓠꓬꓲ ꓙꓳ ꓡˍ ꓥ ꓟꓲ ꓕꓱ ꓟ ꓗꓪ ꓐꓰ ꓡꓲꓹ ꓗꓷ ꓝꓲ ꓢꓴ ꓠꓬ ꓪꓴ-ꓢ ꓡꓰꓽ ꓥ ꓡꓳ=

ꓖꓳ ꓡꓱ ꓠꓬꓲ ꓪꓴ-ꓢ ꓔꓯ ꓣꓳ ꓦ ꓡꓱ ꓡꓯ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓟ ꓗꓪ ꓮ ꓙꓵꓽ ꓬꓲ ꓔꓯ ꓡꓯꓼ ꓙꓱ ꓗꓷ ꓢꓲ ꓠꓬꓲ꓾ ꓣꓳ ꓔꓯ ꓙ ꓖꓴ ꓟꓸ ꓖꓶ ꓠꓹ ꓟ ꓓꓰꓽ ꓙꓰ ꓡꓯ ꓐꓰ ꓮ ꓙꓵꓽ ꓔꓯ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ= ꓣꓳ ꓔꓯ ꓬꓲ ꓪ ꓗꓪ ꓐꓰ ꓡꓲꓹ ꓗꓷ ꓝꓲ ꓢꓴ ꓠꓬ ꓪꓴ-ꓢ ꓡꓰꓽ ꓥ ꓡꓳ ꓐꓯ ꓟ ꓔꓯ ꓠꓲꓹ ꓟ ꓗꓪ ꓗꓶ ꓔ ꓢꓲ꓾ ꓚꓲꓸ ꓛꓬ ꓛꓳ ꓚꓲꓸ ꓛꓬ ꓥꓪ ꓓꓻˍ ꓡꓳ꓾ ꓥꓪ ꓬꓰ ꓗꓴꓸˍ ꓡꓳ꓾ ꓥꓪ ꓪꓽ ꓠꓬꓲˍ ꓡꓳ ꓐꓰ ꓓꓵꓽ ꓙˍ ꓟ ꓟꓽ ꓙꓳ ꓙꓳ ꓪꓴ-ꓢ ꓔꓯ ꓮ ꓙꓵꓽ ꓡꓯꓼ ꓙꓱ ꓗꓷ ꓠꓬ ꓣꓳ ꓤꓶꓻ ꓠꓬ ꓗꓹ ꓛꓲꓽˍ ꓟ ꓢꓲ ꓡꓲˍ ꓟ ꓤꓶꓻ ꓒꓬꓱꓼ ꓡˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓗꓪ ꓢꓯꓼ ꓪ ꓖꓶ ꓠꓲꓹ ꓫꓵˍ ꓡꓳ=